Полицијата затекна гости во пекарница во Гостивар, а сопственикот е приведен.

Според информациите на МВР, утрово, во 10.05 часот, полициски службеници го привеле И. Е. (48) од с. Форино, сопственик на пекарница на улицата Илинденска, постапувајќи по претходна пријава дека во локалот има гости што биле послужувани.

Тој бил приведен во полициска станица и ќе биде поднесена соодветна пријава, а од страна на Државен пазарен инспекторат локалот бил пломбиран.

63-годишен скопјанец бил приведен откако истражните органи за него распишале централна потерница.

Од Министертсвото за внатрешни работи известуваат дека денеска во 14:10 часот, од страна на полициски службеници од Сектор за меѓународна полициска соработка – Отсек за потрага, врз основа на издадена централна потерница од МВР и добиена судска наредба, на ул. Ѓорче Петров е лишен од слобода Р.С.(63) од Скопје, за издржување казна затвор од две години казниво по Кривичниот законик.

Лицето со иницијали Р.С. бил предаден во полициска станица за понатамошна постапка.

Попладнево околу 13:15 часот, тетовската полиција во гаража помеѓу тетовските села Нераште и Беловиште, го уапсила 45-годишниот Ш.Ш. од Нераште.

Тој се сомничи дека е извршител на четири тешки кражби во трговски објекти во Тетово и во регионот на Теарце, во кои со употреба на сила влегувал и одземал пари и поголема количина разновидни производи.

Ш.Ш, исто така, се барал по централна потерница од затворот „Идризово“ во Скопје за доиздржување на затворска казна од 3 години и 28 дена за сторено кривично дело разбојништво.

Се преземаат мерки за расчистување и документирање на случајот, по што против него ќе биде изготвен соодветен поднесок.