Вчера, околу 16.15 часот, во Полициската станица Струга било пријавено дека на регионалниот пат во с. Велешта, Струшко, се случила сообраќајна несреќа помеѓу патничко возило „опел астра“, со ресенски регистарски ознаки, управувано од С. К. (61) од с. Долно Дупени, Ресенско, и мотоцикл „хонда“, без регистарски ознаки, управуван од А. И. (30) од с. Велешта, по што мотоциклот удрил во паркирано патничко возило „фолксваген кеди“, со струшки регистарски ознаки, сопственост на Х. Х. (66) од с. Велешта.

По несреќата, мотоциклистот А. И. бил пренесен во болницата „Св. Еразмо“ во Охрид, каде што му биле констатирани тешки телесни повреди. Увид на местото на несреќата извршила екипа од Полициската станица Струга.

Полициски службеници на Единицата за брзо распоредување во подножјето на планинскиот врв Стрижак на планината Јабланица го лишиле од слобода албанскиот државјанин Ф. Н. (41), затекнат при нелегална сеча на шума, поради што се сомничи дека сторил кривично дело пустошење шума, казниво по член 226 од Кривичниот законик.

При преглед на теренот била пронајдена и локацијата на која исечените дрва биле складирани и подготвени за транспорт, каде што бил затекнат и И. Б. (50) од с. Велешта, Струшко, со патничко возило „ауди“, а на местото биле пронајдени околу 25 м3 дрва, багер, пили, секира и други предмети поврзани со кривичното дело.

Двете лица се приведени и ќе бидат предадени во полициска станица за понатамошна постапка, а по документирање на случајот, против нив ќе следува соодветна пријава.

Полицијата вчера го приведе 63-годишниот Х. Е. од гостиварско село, кој во семејниот дом физички ја нападнал поранешната 65-годишна сопруга.

Тој е задржан во Полициската станица Гостивар за расчистување и документирање на случајот, велат од МВР.