Во попладневните часови на 26 октомври, припадници на тетовската полиција го привеле 27-годишниот Р. Б. од долнореканското Врбјане, кого го барале за издржување затворска казна за сторено кривично дело тешка кражба.

Во истиот период тетовската полиција го привела и 48-годишниот тетовец Х. Ф., осуден на затворска казна за сторено кривично дело напад врз службено лице при вршење работи на безбедноста.

Двајцата осуденици по брза постапка биле спроведени во тетовскиот затвор за издржување на казните.

Вчера, во 10.50 часот, било пријавено дека во Битола, при вршење ископ кај старата трибина од стадионот „Под Тумбе-кафе“, во правец кон старата касарна, биле пронајдени стари артилериски гранати во калибар 75 мм од Првата светска војна. Од страна на Дирекцијата за заштита и спасување, подрачна единица Битола, тие биле безбедно подигнати за понатамошна постапка, соопшти полицијата.

Вчера, во СВР Скопје било пријавено дека во Градската општа болница „Св. Наум Охридски“ бил донесен И. Л. (26) од селото Смесница, кој добил тешки телесни повреди при работа во селото Зелениково. На местото на настанот излегле полициски службеници од Полициската станица Драчево, а известен е и трудов инспектор, соопшти полицијата.