Црна хроника
Викендов имало 23 сообраќајки, во кои 17 лица се повредени

Изминативе денови се случиле 23 сообраќајни незгоди, во кои едно лице добило тешки телесни повреди и 17 лица добиле телесни повреди. На подрачјето на Секторот за внатрешни работи Скопје преземени се мерки и активности и констатирано е дека 159 возачи управувале возила со брзина поголема од дозволената. Од сообраќај се исклучени 61 возач, од кои: 50 возачи управувале возила без да стекнат право за управување моторно возило и 11 возачи затоа што биле возачи почетници. Исто така, исклучени од сообраќај се и 66 возила бидејќи 62 биле нерегистрирани и четири возила биле технички неисправни.
Санкционирани се 16 возачи поради поминување крстосница на црвено светло, четворица поради недавање првенство на минување пешаци, еден возач поради неправилно престигнување, пет поради неправилно престројување, 51 возач поради некористење заштитен шлем при управување мотоцикл, 11 возачи поради неносење сигурносен појас за време на управување моторно возило, двајца возачи поради недвање првенство на минување крстосница и 29 возачи поради користење мобилен телефон при управување возило. Во однос на пешаците, санкционирани се двајца пешаци поради поминување коловоз надвор од пешачки премин. Во текот на изминативе денови издадени се 206 мандатни платни налози и 139 возила се подигнати со „пајакот“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Црна хроника
Швеѓанец за да избегне ќотек останал без маица на Широк Сокак

Во четвртокот околу 19:50 часот, во СВР Битола, С.Х.Д. (32) од Шведска, кој моментално престојува во Дебар, пријавил напад на улицата Широк Сокак во Битола.
Според пријавителот, на него му пристапиле неколку непознати лица на возраст околу 20 години, кои се обиделе да му ја соблечат маицата со исцртани симболи на друга држава.
Како што информира МВР, откако увидел дека не може да се одбрани, С.Х.Д. ја соблекол маицата и им ја предал на напаѓачите, кои потоа заминале во непознат правец.
„Се вршат проверки за настанот и се преземаат мерки за пронаоѓање на сторителите“, наведуваат од МВР.
Црна хроника
Истурил течност и запалил „лaнд ровер“, утрово гореше возило во Куманово

Рано утрово луксузен „ланд ровер“ беше опожарен на улицата Моша Пијаде во Куманово.
Настанот бил пријавен во СВР Куманово на 30 август 2025 година, околу 05:10 часот, од лицето Б.Ц. Пожарот бил забележан на возилото сопственост на А.Г., кое веднаш било гаснато со помош на сопственикот и негов сосед, спречувајќи поголема катастрофа.
По насоки на дежурен јавен обвинител, увид извршила увидна екипа на ОКТУПА при СВР Куманово. Констатирано е дека станува збор за подметнат пожар. Засега непознат сторител со непозната течност го испрскал возилото на повеќе места, ја запалил и потоа успеал да побегне без да биде забележан.
Од полицијата информираат дека е причинета материјална штета во износ од околу 120.000 денари, а истрагата е во тек.
Црна хроника
17-годишник и 15-годишник со сила ограбиле доставувач, му го украле ранецот со пратки

Полицијата во Скопје спречи грабеж извршен од двајца тинејџери, кои нападнале доставувач и му го украле ранецот со пратки.
На 29 август 2025 година, околу 18:20 часот, полициски службеници од СВР Скопје ги лишиле од слобода 17-годишен и 15-годишен малолетник, двајцата од скопско.
Според информациите, истиот ден околу 16:40 часот, малолетниците со употреба на физичка сила го нападнале 23-годишниот У.Д. од Скопје, кој во моментот извршувал работни задачи како доставувач на пратки. Тие му го одзеле ранецот со пратки, по што се обиделе да избегаат.
Брзата реакција на полицијата довела до нивно пронаоѓање и приведување во Визбегово. По целосното документирање на случајот, против нив ќе биде поднесен соодветен поднесок.