Тешка сообраќајна несреќа се случила на 27 декември попладнето на магистралниот пат Штип–Кочани, на излезот од селото Чардаклија.

Според информациите од СВР Штип, околу 16:13 часот дошло до судир меѓу патничко возило „пежо 607“, управувано од 28-годишен жител на Радовиш, и товарно возило „форд транзит“, зад воланот на кое бил 60-годишен маж од селото Горни Подлог, кочанско.

Во несреќата, возачот на „пежото“ се здобил со тешки телесни повреди, додека со телесни повреди биле повредени и возачот на товарното возило, како и неговите две сопатнички – жени на возраст од 58 и 62 години.

Сите повредени биле пренесени и згрижени во Клиничка болница Штип, каде што им биле констатирани повредите.

На местото на несреќата бил извршен увид од полициска екипа од СВР Штип.

Обид за поткуп е регистриран на граничниот премин Ќафасан во попладневните часови на 27 декември.

Како што информира полицијата, околу 14:30 часот, полициски службеници го лишиле од слобода 41-годишниот В.К. од Република Албанија. За време на граничната и пасошката контрола, тој ѝ понудил поткуп на полициска службеничка, оставајќи пари преку прозорецот од кабината на шалтерот.

По настанот, лицето било приведено во полициска станица, а по целосно документирање на случајот против него ќе биде поднесена соодветна пријава.

Две сериозни сообраќајни несреќи со тешко повредени лица биле пријавени на 27 декември на различни локации во земјава, при што во двата случаи е утврдено присуство на алкохол кај возачите.

Првата несреќа се случила околу 10:25 часот на автопатот во изградба Охрид – Кичево, кај влезот за селото Требеништа, во општина Дебарца. Во судирот учествувале три возила – „рено меган“, „хјундаи“ и „рено канго“.

Во несреќата, тешки телесни повреди добил 59-годишен сопатник од возилото „хјундаи“, додека со телесни повреди се здобил и возачот на истото возило. Повредените биле пренесени во Специјалната болница Св. Еразмо во Охрид.

По извршениот увид, полицијата го лишила од слобода возачот на „рено меган“, откако било утврдено дека управувал возилото под дејство на алкохол. Кај него биле измерени 1,25 промили алкохол во крвта, а против него ќе следува кривична пријава по член 300 од Кривичниот законик.

Втората сообраќајна несреќа била пријавена во 18:48 часот на регионалниот пат во селото Кадрифаково, во светиниколскиот регион. Во судирот учествувале товарно возило „мерцедес“ и патничко возило „фолксваген голф“.

Тешки телесни повреди добил 44-годишниот возач на „голфот“, кој најпрво бил згрижен во Клиничка болница Штип, а поради сериозноста на повредите бил пренесен во Комплекс клиники Мајка Тереза во Скопје. Полицијата утврдила дека тој управувал возилото со 2,56 промили алкохол во крвта.

За двата настана бил извршен увид од надлежните полициски екипи, а истрагите за причините за несреќите продолжуваат.