Македонија
Купувале дрога и оружје од Албанија и Косово и ги продавале во Скопје – обвинителството со детали за големата полициска акција
Обвинителството ги објави деталите за големата полициска акција што утрово се одвиваше на повеќе локации низ Скопје.
Како што информираа станува збор за неовластена продажба на дрога и оружје, пришто приведени се 15 лица.
Специјалците претресувале 27 локации во Арачиново, Сингелиќ, Кисела Вода, Карпош и Шуто Оризари.
Под истрага се 18 лица за кои постои основано сомнение дека се сторители на кривични дела и тоа дванаесетмина на кривично дело Неовластено производство и пуштање во промет на наркотични дроги, петмина за неовластено тргување со оружје, додека едно лице според дејствијата опишани во диспозитивот ги сторило и двете дела, соопшти Обвинителството.
„Во временскиот период од јули 2022 до мај 2023 првоосомничениот и седум други осомничени се здружиле како повеќе лица заради неовластена продажба и пуштање во промет на наркотични дроги – кокаин и марихуана. Првоосомничениот неовластено, заради продажба ја купувал наркотичната дрога од непознати лица по потекло од Косово и Албанија и ја криел на безбедни локации во селото Сингелиќ – Скопје. Потоа од седуммина осомничени организирал мрежа на препродавачи кои воспоставувале контакти со заинтересирани купувачи на наркотична дрога од Скопје, Велес и други градови и вршеле неовластена продажба на дрогата за сума од 4500 денари до 6000 денари за еден грам кокаин, од 200 денари до 300 денари за еден грам марихуана и од 1000 денари до 1500 денари за еден грам амфетамин. Парите од продажбата му ги предавале на првоосомничениот кој им давал процент од парите на „рака“.
Во истиот временски период по идентичен modus operandi функционирала уште една петчлена организирана криминална група, чии членови неовластено продавале и пуштале во промет наркотична дрога – кокаин, хероин и марихуана. Деветоосомничениот, исто како првоосомничениот, неовластено, заради продажба, ја набавувал наркотичната дрога од НН лица по потекло од Косово и Албанија и ја држел скриена на безбедни локации. Потоа четворица од осомничените ги организирал како мрежа на препродавачи на кои им давал задачи да наоѓаат купувачи на наркотична дрога од Скопје и други градови. Откако ќе се договореле за видот, количината и цената на наркотичната дрога, деветоосомничениот им давал задачи на останатите да ја пренесат наркотичната дрога од безбедна локација од с.Арачиново до местата каде нелегално ја пуштале во промет – продавајќи ја на крајните купувачи.
Во временскиот период, пак од декември 2022 до мај 2023 година деветоосомничениот заедно со петмина осомничени, како група, се здружиле заради неовластено држење, продавање и набавување на поголемо количество огнено оружје и муниција и огнено оружје и муниција што им се забранети на граѓаните. Така, деветоосомничениот неовластено набавил огнено оружје автоматска пушка марка „Калашников“ калибар 7.62 мм, од НН лице од Косово, а во повеќе наврати од двајца осомничени, кои се сопственик и управител на правно лице – стрелиште и кои нелегално продавале муниција набавена за потребите на стрелиштето, нелегално набавил поголема количина на муниција – куршуми, по цена од 40 – 45 денари за еден куршум и тоа: 800 куршуми калибар 7.65 мм, 300 куршуми калибар 7.62мм. По што за чие понатамошно држење и продажба ги ангажирал останатите осомничени на кои, откако претходно ќе најдел купувачи за оружјето, им давал инструкции да го донесат оружјето на претходно договорена локација и да го продадат на заинтересираното лице по цена од 1000 евра, додека нелегално набавената муниција за цена од 70-75 денари за еден куршум. Од продажбата деветоосомничениот за извршениот транспорт на огненото оружје исплаќал по 50 евра, додека пак останатите пари од нелегалната продажба ги задржувал за себе.
Петнаесет осомничени во текот на денот ќе бидат изведени пред судија на претходна постапка при Основниот кривичен суд Скопје, додека тројца се недостапни на органите на прогонот. Предметниот обвинител од Основното јавно обвинителство за гонење на организиран криминал и корупција, ценејќи дека постојат околности што го оправдуваат стравот oд опасност од бегство, дека ќе ги сокријат, фалсификуваат или уништат трагите на кривичното дело и дека со влијание врз сведоци и соучесниците ќе ја попречат истрагата, на судијата на претходна постапка ќе му предложи определување на мерката притвор за сите осомничени.
Согласно одредбите од Кривичниот законик на сторителите на кривичното дело Неовластено производство и пуштање во промет на наркотични дроги, психотропни супстанции и прекурсори од чл.215 ст.3 од Кривичниот законик им се заканува казна затвор од најмалку пет години, додека за кривичното дело Неовластено изработување, држење, посредување и тргување со оружје или распрскувачки материи од чл. 396 ст.3 од Кривичниот законик е предвидена казна затвор од најмалку осум години“, обајви обвинителството.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Oбединетата македонска дијаспора: Инаугурацијата на Силјановска е историска
Организацијата Обединета Македонска Дијаспора (ОМД), и честита на професорката Гордана Силјановска Давкова за нејзината значајна инаугурација како прва жена претседател на Македонија.
„Претседателката Силјановска Давкова на историската церемонија го реафирмираше уставното име на нашата Македонија, потврдувајќи го основното право на Македонците на самоопределување. ОМД ја поздравува нејзината непоколеблива заложба за зачувување на нашиот национален идентитет и суверенитет, чувство што се повторува во нејзините обемни придонеси, вклучително и основниот труд „За „Договорот од Преспа“ и понатаму“, објавен од ОМД во октомври 2018 година, достапен на нашата веб-страница со кликнување овде.
Во оваа значајна пригода, додека го славиме Денот на мајката, ОМД упатува срдечни честитки не само до претседателката Силјановска Давкова, туку и до сите извонредни мајки ширум светот. Денешниот ден симболизира не само триумф на родовата еднаквост, туку и доказ за силата и издржливоста на жените лидери насекаде.
Историската победа на претседателката Силјановска Давкова означува ново поглавје во патувањето на Македонија, влевајќи надеж и оптимизам за посветла иднина. ОМД со нетрпение очекува да соработува со нејзината администрација за зајакнување на врските меѓу македонската дијаспора и нашата татковина, поттикнувајќи просперитет и напредок за генерациите што доаѓаат.
Додека ја славиме оваа значајна пригода, да ја потврдиме нашата посветеност на единството, напредокот и трајниот дух на македонскиот народ“, се наведува во реакцијата.
Обединета македонска дијаспора (ОМД) е водечка меѓународна невладина организација која се занимава со интересите и потребите на Македонците и македонските заедници ширум светот. ОМД работи на промовирање на кохезивна глобална македонска заедница.
Македонија
Бугарскиот претседател и премиерот: Не прифаќаме изјави од Северна Македонија кои се во спротивност со меѓународните договори
Бугарија не прифаќа изјави и однесувања што се во спротивност со Договорот за пријателство, добрососедство и соработка од 2017 година, како и со другите меѓународни договори што ги има потпишано Северна Македонија. Бугарија постојано и јасно го кажува својот став дека договорите мора да се реализираат, наведува во својот став бугарскиот претседател, Румен Радев.
„Европската перспектива на Северна Македонија зависи од строгото спроведување на меѓународните договори во кои таа е страна, како и од преговарачката рамка одобрена од Европскиот совет во јули 2022 година, која нема да се ревидира“, нагласува шефот на бугарската држава.
Реагираше и премиерот Димитар Главчев.
„По повод церемонијата на инаугурација на новиот претседател на Република Северна Македонија, Бугарија не прифаќа изјави и однесување кои се во спротивност и со Договорот за пријателство, добрососедство и соработка од 2017 година и, во принцип, со договорите меѓу Европската Унија и Република Северна Македонија“, се наведува во реакцијата, пренесе БНР.бг.
Главчев додава и дека Северна Македонија земја-членка на НАТО, од која произлегуваат соодветните обврски и одговорности.
Новоизбраната претседателка, Гордана Силјановска-Давкова вчера предизвика остра реакција и предупредувања од Грција и ЕУ, откако при полагањето заклетва како шеф на државата изјави дека ќе го почитува Уставот и ќе ја брани независноста на Македонија, користејќи го името што го имаше земјата пред Договорот од Преспа со Грција во 2018 година, потсетуваат бугарските медуими.
Македонија
МНР повика на внимателност од државните функционери: Со Грција развивме политички дијалог на високо ниво
Министерството за надворешни работи објави дека ја потврдува цврстата определба на земјата кон недвојбено почитување на Уставните одредби како и сите меѓународно преземени обврски како што е целосното почитување на Договорот за стратешко партнерство меѓу Северна Македонија и Грција, познат како Договорот од Преспа.
„Изминативе седум години, двете соседни земји развија исклучително високо ниво на политички дијалог, кое резултираше и со неколкукратно зголемување на економската соработка и изградбата на позитивни врски меѓу луѓето. Овие придобивки резултираа со членството на земјата во НАТО, Отворање на преговорите со Европската Унија, како и со надградба на Стратешкото партнерство во Стратешки дијалог со САД“, велат од МНР.
Повикуваат на внимателност од страна на сите политички чинители, особено на избраните државни функционери.
Од тука додаваат дека задржувањето на евроатлантскиот курс на земјава претставува основен стратешки интерес и гарант за долгорочната безбедност и стабилност на земјата.
Новоизбраната претседателка Гордана Силјановска-Давкова, на вчерашната инаугурација во Собранието положи заклетва за претседател во која го употреби името Македонија, што предизвика реакции во Грција, а грчката амбасадорка демонстративно ја напушти пленарната сала во Собранието. Грчкото МНР излезе со остра реакција, коментирајќи дека се прекршува договорот од Преспа. ЕУ повика на почитување на договорите кои, како што велат, се неопходни за продолжување по патот во Европската Унија. Утрово реагираше и грчкиот премиер Киријакос Мицотакис кој рече дека нема да прифатат слични лапсузи.