Црна хроника
Мароканец осомничен за напад врз полицаец кај Гевгелија: му ја фатил десната рака и му го скршил прстот

Јавен обвинител од Основното јавно обвинителство Гевгелија донесе наредба за спроведување истражна постапка против државјанин на Мароко, кој е осомничен дека сторил кривично дело напад врз службено лице при вршење работи на безбедноста од член 383 став 3 од Кривичниот законик.
„На 28 октомври осомничениот нападнал полициски службеник кој постапувал по наредба за вршење патролна служба. Полицаецот, заедно со двајца словачки полициски службеници од Фронтекс, добил известување дека на бензинска пумпа на автопатот А1 во правец Гевгелија – Скопје, непознато лице – мигрант се качил на товарно моторно возило со унгарски регистарски ознаки.
Тие отишле на бензинската пумпа, каде што шоферот на камионот им потврдил дека во неговото возило се качил мигрант, кој одбива да се симне. Полицајците му дале наредба да се симне од возилото, но осомничениот, движејќи се по покривот, се префрлил на предниот дел од возилото, од каде што скокнал и почнал да бега“, соопшти Обвинителството.
Македонскиот полициски службеник тргнал по него и го фатил, но осомничениот почнал да дава активен отпор, му ја фатил десната рака на полицаецот и почнал да му ги витка прстите. На тој начин му задал повреда – фрактура на прстот, со дислокација на фрагментите. Во тој момент на помош дошле колегите и заедно го совладале осомничениот.
Бидејќи постојат околности што го оправдуваат стравот дека осомничениот ќе се даде во бегство, дека ќе ја попречува кривичната постапка со влијание врз сведоците и дека ќе го повтори кривичното дело, надлежниот јавен обвинител до Основниот суд во Гевгелија достави предлог за определување мерка притвор, се додава во соопштението на Обвинителството.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Црна хроника
Апсења во Чаир по насилен инцидент и закана со пиштол

Полицијата во Чаир синоќа привела четири лица од Скопје, меѓу кои и малолетник.
Сè започнало околу 22:50, кога 24-годишните Бе.Р. и Б.Р. – физички го нападнале Б.С. од Скопје. Едниот од нив извадил и пиштол со намера да пука, но потоа сите си заминале од местото на настанот, соопшти МВР.
Кога полицијата ги пронашла, тие заедно со нивниот татко К.Р. и 14-годишниот брат физички ги нападнале полицајците. По ова, биле приведени.
Откако ќе заврши истрагата и ќе се соберат сите докази, ќе им бидат поднесени пријави.
Црна хроника
Повредени повеќе странски државјани во две сообраќајки на македонските автопати

Две сообраќајни несреќи со тешки телесни повреди се случија на македонските автопати во текот на 5 август, во кои се повредени патници од Србија, Велика Британија и Босна и Херцеговина.
Првата несреќа се случила околу 11:15 часот на автопатот Куманово – Граничен премин Табановце, кога патничко возило „Фолксваген“ со српски регистарски таблички удрило во метален столб од бензинска пумпа. Возилото го управувал 29-годишен државјанин на Србија, а повредени се неговите сопатници – двајца британски државјани, на возраст од 29 и 56 години, како и 53-годишен Србин. Повредените се пренесени во Комплекс клиники „Мајка Тереза“ во Скопје, каде што им се констатирани тешки телесни повреди.
Неколку часа подоцна, околу 16:45 часот, друга несреќа се случила на делницата од автопатот А1, во правец од Велес кон Градско. Возач на „БМВ“ со регистарски таблички од Босна и Херцеговина изгубил контрола и излетал од патот. Неговата 26-годишна сопатничка се здобила со тешки телесни повреди, додека возачот (32) е полесно повреден. Двајцата се згрижени во Општата болница во Велес.
Полицијата изврши увид на местата на несреќите, а причините се предмет на натамошна истрага.
Топ
Лихварска шема во Гостивар: Заем од 35.000 евра со камата од 15.000 за една година, па по 3.000 евра месечно

Против две лица, меѓу кои еден нотар од Гостивар и една фирма, тетовската полиција поднесе кривични пријави поради сомнение за низа тешки кривични дела, меѓу кои лихварство, фалсификување и злоупотреба на лични податоци.
Главниот осомничен е Т.В. (39) од селотото Неготино, Гостиварско, кој од 2022 година до моментот на пријавувањето, ја искористувал тешката материјална состојба на едно лице од Гостивар и во повеќе наврати му позајмувал пари со екстремно високи камати. За заем од 35.000 евра, побарал 15.000 евра камата за една година, а потоа, месечно, дополнително по 3.000 евра камата.
Кога оштетениот не можел да ги врати парите, Т.В. со присила и закани го натерал да потпише договор за купопродажба на недвижен имот, заверен кај нотар.
Истиот осомничен, на 27 септември 2023, изготвил и фалсификуван договор за купопродажба на моторно возило кај нотар, во време кога оштетениот бил надвор од државата.
Кривична пријава доби и второосомничениот Ј.Д. (48) од село Добри Дол, кој во својство на овластено лице во нотарската канцеларија во Гостивар, без присуство на оштетениот, на истиот датум заверил договор за купопродажба на возило вредно 1.000 евра на име на И.А. од Гостивар. Од МВР појаснуваат дека без согласностна оштетениот, прибрал, обработувал и користел негови лични податоци и заверил лажен договор.
Истрагата се води за кривични дела: „лихварство“, „употреба на исправа со невистинита содржина“, „фалсификување на исправа“, „злоупотреба на лични податоци“ и „несовесно вршење на службата“.