СВР Струмица поднесе кривична пријава против 51-годишниот В.С. од село Едрениково, општина Василево и 45-годишниот Л.Н. исто така од село Василево поради постоење основи на сомнение за сторено кривично дело „злоупотреба на службена положба и овластување“.

„Во периодот од 27.02.2014 до октомври 2017 година пријавениот, како градоначалник на општина Василево, спротивно на Законот за изменување и дополнување на законот за јавните претпријатија, донел пет решенија за именување на второпријавениот за вршител на должноста директор на ЈПКД ‘Турија’ – Василево, и покрај тоа што не ги исполнувал предвидените квалификации за потребниот степен на образование за наведеното работно место“, се наведува во соопштението на полицијата.

На 21 ноември 2016 година второпријавениот, како што додаваат од МВР, како вршител на должноста директор на ЈПКД „Турија“ – Василево, спротивно на Законот за административните службеници, изготвил и потпишал решение за распоредување на јавен службеник на раководно работно место во наведеното јавно претпријатие, кој не ги исполнувал предвидените квалификации за потребниот степен на образование за наведеното работно место.