СВР Тетово поднесе кривична пријава против С. С. (56) од Тетово, самостоен советник за правни работи и управување со човечки ресурси во одделението за заеднички работи при СВР Тетово, поради постоење основи на сомнение за сторени кривични дела злоупотреба на службената положба и овластувањето и за измама.

Во текот на 2017 година пријавениот му ветил на Н. З. (54) од Гостивар дека може да ја вработи ќерка му и му побарал пари за услугата. Н. З. му дал 5.000 евра, но до пријавување на настанот тоа не се случило. Полициски службеници извршиле разговор со пријавениот, при што тој рекол дека паричните средства ги зел на заем од оштетениот, кои му биле потребни за реновирање на домот, и долгот од 5.000 евра му го вратил во текот на август 2018, со писмена изјава заверена на нотар преку лицето А. А.. По преземените мерки, бил пронајден А. А. и тој посочил дека парите ги дал на синот на пријавителот. Според неговото кажување, во текот на ноември 2019 се сретнале со оштетениот пред СВР Тетово, каде што дошол и пријавениот и понудил дополнителни парични средства во износ од 8.000 евра за да не му наштетат на неговиот углед, но тие не прифатиле и настанот го пријавиле во СВР Тетово.