Управата за финансиска полиција поднесе кривични пријави до Основното јавно обвинителство Тетово против неколкумина вработени во Центарот за информатички технологии при државниот универзитет во Тетово поради несовесно работење. Како што информира финасиската полиција, тие платиле за интегриран информациски систем, кој воопшто не бил ставен во функција, со што предизвикале штета на буџетот на ДУТ во вкупен износ од 5.009.188 денари.

„Кривични пријави се поднесени против Р.Ф. во својство на раководител на Центар за информатички технологии при Државниот универзитет во Тетово, М.В. во својство на советник за информатички и компјутерски технлогии при ДУТ и Ѓ.А. – соработник за информатички и компјутерски технологии при ДУТ, поради постоење основано сомнение за несовесно работење во службата од член 353-в од Кривичниот законик“, се наведува во соопштението. Во него се додава дека тројцата несовесно постапувале во вршењето на своите овластувања и должности, на начин што второпријавениот М.В. и третопријавената Ѓ.А. на 22.12.2016 година, а по претходно добиена наредба од првопријавениот Р.Ф., потпишале и потврдиле прием, имплемантација и овозможиле плаќање на интегриран информациски систем, кој потоа воопшто не бил ставен во функција, со што предизвикале штета на буџетот на ДУТ во вкупен износ од 5.009.188 денари.