Економија
Ангеловска-Бежоска и Ангелов: Економската активност во првата половина од годината се совпаѓа со проекциите на Народната банка

Бруто-домашниот производ, во првата половина од оваа година, оствари раст којшто речиси во целост се совпаѓа со проекциите на Народната банка, поттикнат и од кредитната поддршка од банкарскиот сектор. Се очекува натамошно постепено закрепнување на економијата, што во голема ќе зависи од закрепнувањето на нашите најзначајни трговски партнери, што, пак, е условено главно од ризиците поврзани со епидемиолошката состојба. За ова беше разговарано на работната средба помеѓу гувернерката на Народната банка, Анита Ангеловска-Бежоска, и амбасадорот на Република Бугарија во земјава, Ангел Ангелов, и со генералниот конзул на Република Бугарија во Битола, Димитар Иванов. На средбата стана збор за општата економска состојба, како и за мерките коишто се преземаат за поттикнување на економската активност.
Гувернерката Ангеловска-Бежоска истакна дека состојбите во македонската економија, како високо отворена економија, во голема мера зависат од движењата во еврозоната и во Германија, којашто е наш главен трговски партнер. Со оглед на проекциите на ЕЦБ за нивно натамошно закрепнување, се очекува дека тоа позитивно ќе влијае и врз нашата економија. Гувернерката се осврна и на состојбата на македонската економија годинава, при што посочи дека олабавената монетарна политика придонесува за закрепнување на економијата. Во првата половина од оваа година е остварен раст од 5,2%, што речиси во целост се совпаѓа со проекциите на Народната банка (5,4%). Согласно со последните макроекономски проекции, очекувањата се дека економската активност ќе се врати на преткризното ниво на почетокот на 2022 година.
Во однос на монетарната политика во услови на пандемија, гувернерката посочи дека од особено значење за нејзиното олабавување е комфорното ниво на девизните резерви, а во тој контекст, и пристапот до девизна ликвидност овозможен за првпат преку репо-линијата одобрена од страна на Европската централна банка. Иако Народната банка немаше потреба од користење на средствата, сепак подготвеноста на Европската централна банка значително придонесе за одржување на стабилноста на домашната валута при променливи пазарни движења во текот на здравствената криза.
Гувернерката Ангеловска-Бежоска посочи дека мерките на Народната банка овозможија намалување на цените на кредитите и постојан кредитен раст во текот на пандемијата. Банкарскиот сектор досега добро се справува со ризиците од пандемијата, за што говори и растот на депозитите и солидниот кредитен раст. Исто така, добрите остварувања на банките и претпазливите регулаторни барања во изминатиот период овозможуваат соодветна капитализираност на банкарскиот систем и негова подготвеност за справување со предизвиците и во следниот период. Постепеното закрепнување на економијата, коешто е во тек, позитивно придонесува за одржување на макроекономската и финансиската стабилност и ги ублажува системските ризици. Сепак, неизвесниот карактер на корона-кризата наметнува потреба од постојана подготвеност и будно следење на состојбите, заради преземање соодветни мерки за справување со предизвиците.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Во тек е исплатата на правата од социјална и детска заштита

Министерството за труд и социјална политика информира дека денеска започна исплатата на правата од социјална, детска и цивилна заштита за месец мај 2023 година.
Корисниците на парични права коишто поседуваат дебитна картичка ќе можат да подигнат готовина на банкоматите на банките, да ги користат средствата за безготовински плаќања во продажната мрежа или преку електронско и мобилно банкарство од денеска, 6 јуни 2023 година.
Со цел да се избегне метеж пред и во банките при исплата на правата, за корисниците кои не користат картички, исплатата ќе се спроведе во 2 групи во сите отворени филијали и експозитури на банките, согласно со утврдениот распоред по азбучен ред, според првата буква од презимето и тоа:
06.06.2023– А, Б, В, Г, Д, Ѓ, Е, Ж, З, Ѕ; И, Ј, К, Л, Љ
07.06.2023– М, Н, Њ, О;П, Р С, Т, Ќ, У, Ф, Х, Ц, Ч, Џ, Ш
Економија
Кинеска и турска компанија лажирале документација за мегапроект во Босна и Херцеговина

Кинеската групација „China Gezhouba Group Co.“ ДОО во понудата за изградба на тунелот Прењ доставила неточни информации и лажна документација.
Тунелот треба да се изгради на трасата на автопатот на коридорот 5С, на југот на Босна и Херцеговина.
Ова за Радио Слободна Европа (РСЕ) го потврдија од Јавното претпријатие автопат на Федерацијата Босна и Херцеговина. Станува збор за компанија од Вухан.
Во септември минатата година, државната компанија „Автопати“ на Федерацијата Босна и Херцеговина отвори тендер за доставување документација за изведувачот за изградба на тунелот Прењ.
Ова е најважниот инфраструктурен проект во Босна и Херцеговина, велат од оваа компанија. Додаваат дека тоа е деветти најдолг патен тунел во Европа. Планирано е да биде долг околу 11 километри.
Од „Автопати“ ги провериле податоците и утврдиле дека оваа кинеска компанија нема валидна документација, поради што е дисквалификувана. Кинеската групација не одговорила на барањето на „Радио Слободна Европа“, зошто доставиле лажни и неточни информации.
Во исто време, „Автопати“ потврдиле дека „China Gezhouba Group Co.“ ДООЕЛ никогаш не учествувала во проектите на овој субјект компанија.
За изградба на тунелот пристигнаа осум понуди. Меѓу нив имаше уште една понуда од компанија од Кина, три од Турција и една од Индија. Покрај тоа, на тендерот се пријавија и два конзорциуми од Турција и Јужна Кореја. Освен кинеската групација, лажна документација доставила и компанија од Турција.
„Неточни податоци во понудата за изградба на тунелот Прењ доставила и компанијата од Турција, „Озалтин Инсаат Тицарет“ ве Санаји А.С.“, велат за РСЕ од „Автопати“.
Нелогичности во понудите утврдила комисијата формирана од оваа компанија.
Босна и Херцеговина побара заем од ЕБОР за финансирање на изградбата на приоритетните делови од автопатот на Коридорот 5С. Износот на заемот е 97 милиони евра. Во финансирањето на изградбата на тунелот ќе учествува и Европската инвестициска банка (ЕИБ).
Како дел од овој проект, проценетата вредност на изградбата на тунелот Прењ е околу 500 милиони марки (250 милиони евра).
Изградбата ќе започне кон средината на оваа година, а работите ќе траат шест години. Планирано е да се заврши до крајот на 2028 година, со што ќе се заокружи целиот Коридор 5С.
Економија
Манасков: ЕВН и Регулаторна го осиромашуваат народот на рекетарски начин

Стопанската комора за енергетика е на став дека ЕВН и Регулаторната Комисија го осиромашуваат народот на, како што велат, монополски рекетарски начин.
Претседателот на комората, Ѓорги Манасков, порача до претседателот на Регулаторната комисија, Марко Бислимоски да каже која институција ја контролира ЕВН на терен во државата и како.
„Дали се сериозни. По барање на ЕВН , да се зголеми цената на сметките за мрежарина и воведување на нови мерни броила за полесно да врши МОБИНГ и манипулација врз граѓаните и компаниите во Македонија, замислете дека Бислимовски и Регулаторна Комисија ќе им го одобри? Нека каже Бислимовски која институција ја контролира ЕВН на терен во државава и како? До кога ЕВН и Регулаторна Комисија ќе го осиромашува овој народ на овој монополски рекетарски начин???… Засрамете се , и престанете да правите штета. Бидете сигурни дека за ова ЕВН и Регулаторна, ќе мора да сносат сериозни последици еден ден“, пишува Манасков.