Делегација предводена од гувернерката на Народната банка, Анита Ангеловска-Бежоска и министерката за финансии, Нина Ангеловска, учествува на Годишните средби на Меѓународниот монетарен фонд (ММФ) и групацијата на Светскатa банка (СБ) во Вашингтон, САД. Предвидено е делегацијата да оствари средби со високи претставници на ММФ, СБ, Европската инвестициска банка (EИБ) и Меѓународната финансиска корпорација (ИФЦ), како и со претставници на други меѓународни финансиски организации и институции.

Како што соопшти Народната банка, закажани се одделни состаноци на делегацијата со директорот на ММФ за Европа, Пол Томсен, со извршниот директор на ММФ задолжен за Конституенцата во којашто членува нашата земја, Антони де Ланој и неговиот заменик, Ричард Дорнбош, како и со вишата резидентна претставничка на ММФ за Западен Балкан, Штефани Ебле и со шефицата на мисијата на ММФ за Република Северна Македонија, Берглјот Бјорнсон Баркбу. Се очекува дека на овие состаноци, акцентот ќе биде ставен и на монетарната политика, економскиот развој и економските показатели коишто ги следи централната банка, како и на состојбите во банкарскиот сектор кај нас.

Постигнатите резултати од досегашната успешна соработка меѓу Народната банка и ММФ, подетално ќе бидат анализирани на состаноците коишто гувернерката Ангеловска-Бежоска ќе ги оствари со раководителите на неколку дирекции на оваа меѓународна организација, вклучително и дирекциите за статистика, за монетарни и капитални пазари и за фискални прашања. На нив ќе продолжат веќе започнатите дискусии во врска со можностите за поддршка од ММФ за дополнително унапредување на работата на Народната банка, преку техничка и советодавна соработка во неколку сфери на централнобанкарското работење.

Предвидено е делегацијата да оствари состаноци и со потпретседателот на СБ за Европа и Централна Азија, Сирил Мулер, со регионалната директорка на СБ за Западен Балкан, Линда ван Гелдер, како со извршниот директор на СБ за Конституенцата во којашто членува нашава земја, Кун Дависе. На овие состаноци ќе се говори и за финансискиот и банкарскиот систем, како и воопшто за финансиската стабилност на нашата земја.

Гувернерката на Народната банка и министерката за финансии ќе остварат средби и со потпретседателката на ИФЦ за Латинска Америка, Карибите, Европа и Централна Азија, Георгина Бејкер и со потпретседателот на ЕИБ, Андре Мекдовел. На средбата со Мекдовел се очекува дека ќе се дискутира и за остварувањето на зацртаното во меморандумот за соработка меѓу Народната банка и ЕИБ во спроведувањето на Анкетата за кредитната активност за земјите од Централна, Источна и Југоисточна Европа, којшто беше склучен во април годинава, во рамки на Пролетните средби на ММФ и СБ.

Како претставник на шесте земји од регионот коишто сѐ уште не се членки на Европската Унија, во рамки на Средбите во Вашингтон, Ангеловска-Бежоска ќе учествува и на состанок на надзорниот одбор на Виенската иницијатива 2.

Годишните средби на ММФ и СБ се одржуваат секоја година и на нив учествуваат гувернерите на централните банки и министрите за финансии на земјите членки. Редовно, во дискусиите на Средбите, акцентот е ставен на актуелните случувања во светската економија и на важни теми како што се поттикнувањето на економскиот раст, намалувањето на сиромаштијата и промовирањето одржлив и инклузивен економски развој за сите целни групи во општеството.

Во Клубот на органите на државната управа беше извршено отворање на доставените понуди за изградба на фотоволтаични централи на приватно земјиште по претходно објавениот јавен повик на Министерството за економија. За вкупно понудени 27 мегавати инсталирана моќност, пристигнати се 44 понуди, од кои за фотоволтаици со инсталирана моќност од 0 до 200 КВ има 11 понуди; од 201 до 500 КВ вкупно 10 понуди; од 501 КВ до 1.000 МВ има 19 понуди, а од од 1 до 3 МВ пристигнати се 4 понуди. Кога ќе се земат предвид и доставените понуди за изградба на фотоволтаици на државно земјиште, за вкупно 62 МВ инсталирана моќност пристигнати се 126 понуди од заинтересирани инвеститори.

Заменик-претседателот на Владата задолжен за економски прашања, Кочо Анѓушев, по отворањето на јавните понуди, информира дека со донесувањето на новиот Закон за енергетиката се овозможи зголемено производство на електрична енергија од обновливи извори, а двете тендерски постапки, за изградба на фотоволтаици на државно и на приватно земјиште, се спроведени максимално транспарентно, при што компаниите изразија голем интерес и се отвори една конкурентна постапка.

„Со оваа спроведена постапка за фотоволтаици на приватно земјиште и онаа претходно, која е во фаза на евалуација, за фотоволатици на државно земјиште, доаѓаат резултатите – во државава ќе се изградат над 62 МВ инсталирана моќност во фотоволтаици. Тоа се дел од оние 200 МВ што ветивме дека ќе ги направиме како Влада. Ова се првите 62 МВ и овие електрани ќе бидат, во споредба со она што досега е направено во текот на годините, кога се направени фотоволтаици од само 18 МВ, зголемување од трипати за една година. Наредната недела ќе биде потпишан договорот за изградба на фотоволтаична електрана од 10 МВ во Осломеј, каде што инвестира ЕСМ, а би сакал да го најавам и проектот за 100 МВ на местото на Осломеј, термоелектраната во чија близина јагленот е исцрпен, а има трафостаноца која е во можност да прими до 120 МВ електрична енергија. Ова ќе биде првиот пример за енергетска транзиција, односно претворање на стариот рудник во фотоволтаична електрана. Таму се подготвува тендерска документација за два лота по 50 МВ, значи вкупно 100 МВ над овие 10 МВ што Осломеј сам ги инвестира. Со сите овие инвестиции, овие 62 МВ, десетте мегавати во Осломеј и стоте магавати дополнителни во Осломеј, како и планираната фотоволтаична електрана во РЕК ‘Битола’, која се проектира на 20 МВ, ќе ја постигнеме инсталираната моќност од 200 МВ, што ја ветивме на почетокот“, потенцира Анѓушев.

Министерот за економија, Крешник Бектеши, оцени дека успешноста на овој јавен повик и големиот интерес на инвеститорите ја потврдуваат заложбата на Владата и Министерството за економија за промоција и поттикнување производство на електрична енергија од обновливи извори.

„Кога го донесовме новиот Законот за енергетиката, го променивме моделот на кој ќе се фокусираме во иднина за производство на електрична енергија и преминавме од фидин на премиум-тарифа и тогаш многу луѓе беа скептични дека овој модел нема да успее. Денеска се докажува спротивното, со тоа што има многу голем интерес од компаниите што учествуваат на овој јавен повик да изградат нови капацитети за производство на електрична енергија од обновливи извори во Северна Македонија и тие капацитети да бидат во склоп со начелата за заштита на животната средина. По процедурата од тендерската постпака, следува избор на оние што доставиле најповолна понуда во согласност со критериумите пропишани во јавниот оглас. Овој јавен повик е извонредна можност за сите граѓани, правни и физички лица, да реализираат инвестиции во енергетски проекти, а со тоа да се зголеми и производството на електрична енергија од обновливи извори“, истакна министерот Бектеши.

„Лански, Ганзѕер + Партнер, Скопје“ го најави отворањето на новата канцеларија во Скопје. Настанот беше оранизиран од страна на партнерот од Сверна Македонија, господин Арлинд Зеќири, и одржан во Националната галерија на Северна Македонија „Даут-паша“ кога го најави новиот почеток на партнерот „Лански, Ганзѕер + Партнер“ во Скопје, Северна Македонија, и ги поздрави гостите. На настанот беа присутни високи претставници на Владата на Северна Македонија, амбасадори во Северна Македонија, политички претставници, претставници од деловниот сектор во Северна Македонија.

Поздравни говори на настанот имаа господин Габриел Лански и господин Гералд Ганзѕгер, основачи и управни партнери во Виена, господин Арлинд Зеќири, извршен партнер во Скопје, господин Бујар Османи, вицепремиер за европски прашања во Скопје, Северна Македонија, господин Ото Граф, заменик-шеф на мисијата во австриската амбасада во Северна Македонија, господин Волфганг Петрич, советник на „Лански Ганзѕер плус“ (ЛГП), поранешен специјален пратеник за Косово и висок претставник за Босна и Херцеговина, и господин Шаболц Фазакас, поранешен министер за економија на Унгарија и член на Европскиот парламент.

„Промената бара голема количина дух и малку човечка волја и затоа ние денес сме тука да ја промовираме соединетоста на знаењето и храброста со прославување на отворањето на канцеларијата „Лански и Ганзѕер“ во Скопје“, истакна партнерот во Скопје, г. Арлинд Зеќири.

„Лански, Ганзѕес плус партнер“ (ЛГП) е една од најголемите меѓународно ориентирани правни фирми од Централна Европа и отворањето на канцеларија во Скопје е уште еден факт што ја поддржува оваа важна вредност на „Лански Ганзѕер плус Партнер“ (ЛГП). Сега сите бизниси и инвеститори што работат на северномакедонскиот пазар може да уживаат во придобивките од стратешките и прагматични се во едно решенија од страна на нашите експерти со долгогодишно работно искуство. Канцеларијата на ЛГП во Скопје ќе служи со почитување и посветеност на овие вредности.

(ПР-текст)