Владата на последната седница донесе одлука за давање согласност за склучување договор за продажба на земјоделско земјиште во државна сопственост врз кое има изградено оранжерии и помошни објекти во функција на оранжеријата, односно објекти во стопанскиот двор.

На последниот јавен повик 8 компании ги исполнија условите и со нив ќе се потпишат договори. Со овој јавен повик сопствениците на оранжерии ќе може да си го купат земјиштето на кое се наоѓа оранжеријата, а кое во моментот е во државна сопственост. На тој начин ќе стекнат имотни листови и ќе може да влезат во инвестиции во делот на проширување на објектите, водено ќе може да подигнат кредити за реновирање и модернизација на објектите.

Она што е најважно за овој тип производство е што со стекнување имотен лист ќе им се овозможи и на овие агробизнисмени да конкурираат за мерките од европската ИПАРД-прогама, кои овозможуваат покривање дел од трошоците за инвестиции во изградба и реконструкција на објетктите. Крајниот ефект ќе биде врз целокупното земјоделство, односно самите инвестиции ќе придонесат кон зголемување на обемот и квалитетот на производството, соопшти Министерството за земјоделство, шумарство и водостопанство.

РЕК „Битола“ ја информира јавноста дека пристапи кон исклучување на Блокот 2 поради намалување на неговото корисно дејство, а како последица на појавената неисправност на групата загревачи за висок притисок (ЗВП). Напоменуваме дека ова исклучување е последица на задоцнетиот капитален ремонт на блокот, кој во согласност со инструкциите на производителите на опремата мораше да биде реализиран пред две години.

„Очекуваме Блокот 2 да биде приклучен на мрежата за неколку дена, а планираниот капитален ремонт на оваа постројка предвидено е да почне на 15 август. Краткотрајното исклучување нема да се одрази врз вкупното производство на електрична енергија од страна на АД ЕСМ, а со тоа и на снабдувањето со електрична енергија на потрошувачите, како и на остварувањето на планираното производство на РЕК ‘Битола’ за годинава имајќи предвид дека заклучно со денес производството е натфрлено 18 проценти“, соопшти РЕК „Битола“.

Преку Програмата за конкурентност, иновации и претприемаштво за 2019 година овозможивме директна финансиска поддршка на микро, мали и средни претпријатија во вкупен износ од 21 милион денари, рече министерот за економија, Крешник Бектеши, во своето обраќање на свеченото доделување на решенијата за исплата по мерките од оваа Програма.

„Станува збор за кофинансирање на 70 отсто од докажаните трошоци за набавка на опрема и алати, за дизајн на производ или за учество на домашни саеми за износ до 300.000 денари“, посочи министерот додавајќи дека сето ова е со цел на претприемачите да им се помогне во унапредување на нивното работење, подобрување на квалитетот на производство и поголема конкурентност.

Бектеши нагласи дека збирно за три годни (2017, 2018, 2019), сo вкупно обезбедени 59 милиони денари, субвенционирани се 240 микро, мали и средни претпријатија.

„Колку е навистина голем интересот за оваа мерка кажува фактот дека средствата во вкупен износ од 21 милион денари предвидени за оваа мерка се исцрпија уште пред завршување на рокот определен во јавниот повик. Гледано во бројки, годинава се веќе субвенционирани 87 микро, мали и средни претпријатија, но во 2019 предвидено е да се поддржуваат претпријатија чија претежна дејност е преработувачката индустрија или градежништвото“, рече министерот истакнувајќи дека за два јавни повика сè уште трае рокот за аплицирање до 30 јуни, и тоа за јавниот повик за субвенционирање претпријатија во сопственост и управувани од жени и за јавниот повик за субвенционирање занаетчии.