Економија
(Видео) Ковачевски на СЕФФ 2023: Местото на Северна Македонија е во ЕУ, со најдобрите и економски најразвиени земји

Со воведно обраќање премиерот Димитар Ковачевски го отвори третиот Скопски економски и финансиски форум (СЕФФ), на тема „Европа – ДА, Европа – СЕГА“, во организација на Министерството за финансии.
На конференцијата свои официјални обраќања имаа и министерот за финансии, Фатмир Бесими, како и еврокомесарот за буџет и администрација, Јоханес Хан.
„Како никогаш досега Европа е свртена кон и е посветена на државите од Западен Балкан. За релативно кратко време земјите од регионот имаат можност да ги интензивираат институционалните и структурните реформи и да ја зајакнат конкурентноста на глобалниот пазар, да ги искористат придобивките на дигитализацијата, технолошкиот и зелениот развој, како идни земји членки на Европската Унија.
Членството во Европската Унија зависи и од ентузијазмот во Унијата за проширување и продлабочување на европските интеграции, но и од напорите на државите кандидати да ги исполнат потребните високи критериуми и стандарди преку почитување на фундаменталните европски вредности. Овој процес е од заемна корист и за едната и за другата страна.
Земјите од регионот на Западен Балкан се соочуваат со многубројни предизвици. Глобалните случувања изминативе години, кои го променија светот во целост, имаа големо влијание и врз економиите на земјите од регионот. Европската Унија за земјите од Западен Балкан даде вистинска шанса да се интегрираме во Унијата.
Особено е важен најавениот план за Западен Балкан од страна на претседателката на Европската комисија, Урсула Фон дер Лајен, која на форум во Братислава во мај годинава ја промовира заедничката цел на забрзување на процесот на евроинтеграциите. Овој план ни отвори можности за многу побрза интеграција во Унијата“, рече премиерот Ковачевски.
„Гледајќи низ објективни показатели, Северна Македонија во последните неколку години, со отворената европска политика на оваа Влада, ја одржува економската стабилност и во услови на повеќе кризи одеднаш.
Нашата европска ориентација како Влада носи резултати. Ќе направам неколку споредби, со членството на Северна Македонија во НАТО, каде што овозможивме стабилен безбедносен амбиент во државата, со што се отвори можност инвеститорите да ја препознаат нашата земја како значајна порта за влез на европскиот пазар. Стапката на невработеност за разлика од 2016 кога беше речиси 24 %, денес е намалена на 14 %. За само една година, имаме зголемена вработеност од 9,5 % во државата.
Споредбата за овие години е огромна и во делот на странски директни инвестиции, ако во 2016 година изнесуваа 338 милиони евра, во 2022 година, по пандемијата на Ковид-19 и во ек на глобална економска и енергетска криза, изнесуваа речиси 754 милиони евра. Двојно повеќе од тоа што биле во 2016 година.
Инвестициите во ТИРЗ во 2016 изнесувале кумулативно 600 милиони евра, додека во 2023 заклучно со она што денес е постигнато, изнесуваат 2 милијарди евра. Ако во тоа време изнесувале 600 милиони евра, денес само во една година новите договорени инвестиции се на ниво над 1 милијарда евра.
За споредба, во 2016 година минималната плата во државата изнесуваше 10.000 денари, а сега од март годинава изнесува 21.000 денари, значи двојно повеќе во однос на тоа што го затекнавме. Просечната нето-плата во 2016 година изнесувала нешто над 22.000 денари, а во 2023 година просечната нето-плата е историски највисока и изнесува 37.000 денари. Тоа се цели 230 евра месечно повеќе во семејниот буџет на работниците во државата.
Првпат донесовме и системско решение за раст на пензиите. Просечната пензија е зголемена 40 % во однос на тоа што беше во 2016 година, просечната пензија изнесуваше околу 13.700 денари, а денес во 2023 година таа изнесува над 19.000 денари и ќе следува ново покачување од 6 % овој месец.
Нашите пензионери се вградиле во оваа држава и заслужуваат достоинствен и пристоен живот и тоа на уште повисоко ниво со блиското членство на нашата држава доколку се донесат потребните одлуки во Собранието.
Во изминатите 5 години Северна Македонија е носител на позитивни политички и економски текови, обезбедуваме можности за стопанството, бизнис-заедницата, вложуваме во функционално, модерно, поврзување на нашата земја со целиот регион, со капитални инвестиции во патната инфраструктура се отвораат нови европски рути“, изјави премиерот Ковачевски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Очекуваме ЕУ наскоро да излезе со нов план за економски раст, рече Османи на работниот појадок во Њујорк

Министерот за надворешни работи, Бујар Османи, во својство на претседавач со Процесот за соработка во Југоисточна Европа (ПСЈИЕ), беше домаќин на работниот појадок на министрите за надворешни работи на земјите-членки на иницијативата, што се одржа во рамки на Генерално собрание на OН, во Њујорк. Настанот беше организиран во соработка со Советот за регионална соработка (СРС).
Фокусот на дебатата беше ставен врз европскиот интегративен процес на земјите од Југоисточна Европа, гледано преку призма на континуираната руска агресија врз Украина, која има длабоко влијание врз безбедноста и стабилноста на европскиот континент.
Осврнувајќи се на мотото на претседавањето на Северна Македонија со иницијативата – „Премостување поделби, градење доверба“, Османи направи осврт врз приоритетите на нашето претседавање. Меѓу другите, зајакнувањето на демократијата, помирувањето, регионалната соработка и забрзувањето на евро-атлантските интеграции.
Со оглед дека ПСЈИЕ е најсеопфатна регионална иницијатива во Југоисточна Европа, Османи ја потенцира неопходноста од заеднички ангажман, за сите прашања од витален интерес за регионот.
Пред присутните колеги и гости, го претстави концептот „Повеќе интеграција пред членство“ за кандидатите и потенцијалните кандидати за влез во ЕУ, кој предвидува конкретни придобивки додека трае преговарачкиот процес пред формалното членство.
„Очекуваме Европската Унија наскоро да излезе со нов план за раст кој треба да ни помогне како кандидати да го заживееме процесот, да го поттикнеме економскиот раст и да ги забрзаме реформите кои исто така се скапи за имплементација. Целта е нашите економии да имаат поголем економски раст, за што е потребна поддршка на земјите-членки на ПСЈИЕ, кои се и членки на ЕУ, како и прогресивна интеграција во eдинствениот пазар, проследено со зголемено учество во институциите на ЕУ “, нагласи Османи.
Северна Македонија е претседавач со ПСЈИЕ, во периодот 1 јули 2023 – 30 јуни 2024 г., како трето претседавање, по она од 2000-2001 и 2012-2013 година.
Економија
„Хјундаи“ инвестира повеќе од 12 милијарди долари во САД

Јужнокорејскиот производител на автомобили Hyundai Motor Group објави дека ќе инвестира 12,6 милијарди долари во изградба на погони за електрични возила и батерии во САД. Компанијата ќе потроши 7,6 милијарди долари на фабрика во округот Брајан, Џорџија, која ќе вработи повеќе од 8.500 работници. Во соработка со SK Ona, компанијата ќе инвестира и пет милијарди долари во фабрика за батерии во округот Бартоу, која ќе вработи околу 3.500 работници.
Техничкиот државен универзитет „Џорџија“ и неговиот Технолошки институт потпишаа меморандум за разбирање со Hyundai Motor Group, во кој се наведени соработката за истражување и примена на нови технологии вклучувајќи ја економијата на водород и развојот на работната сила.
Hyundai истакна дека во наредните години ќе создаде економска вредност во Грузија, која ќе се мери во десетици милијарди долари и ќе помогне да се отворат околу 40.000 работни места.
Економија
Бочварски и Закоњшек во Дојран ја промовираа Европската недела на мобилноста

Зелената агенда е висок приоритет на Министерството за транспорт и врски, со што преземаме низа мерки и активности за нејзина промоција како политика на Владата за заштита на животната средина и намалување на аерозагадувањето, истакна министерот за транспорт и врски, Благој Бочварски, при денешната посета на општина Дојран.
Тој заедно со директорот на Постојаниот секретаријат на транспортната заедница, Матеј Закоњшек, и градоначалникот на општина Дојран, Анго Ангов, ја одбележаа Европската недела на мобилноста, каде што се вклучија во промоција на велосипедот како алтернативно средство за превоз сè со цел да се подигне свеста кај граѓаните за заштита на животната средина.
„Доколку сакаме поздрава животна средина, подобра иднина за нас и нашите деца, мораме да ги смениме нашите секојдневни навики и затоа сметам дека реформата во транспортните системи е неопходна. Ова е еден од алтернативните видови на превоз преку кој, почнувајќи од најмладите и вклучувајќи ги сите граѓани, сакаме да ја подигнеме свеста за користење на алтернативните видови на превоз, кои не само што го намалуваат аерозагадувањето туку заштедуваат и енергија. Ова е особено изразито во користење на автомобилите. Министерството за транспорт и врски е особено посветено на реализација на агендата за зелен транспорт, каде што се обидуваме преку транспортниот сектор да наметнеме нови мерки во намалување на загадувањето на животната средина“, изјави министерот Бочварски.
„Активно сме посветени на тоа како можеме да се движиме во нашите градови, нашите населени места на поинаков начин, на зелен и одржлив начин, на поздрав начин. Ова не е само во Европската Унија, туку во цела Европа и навистина се радувам што денеска со министерот Бочварски и овие ученици сме во Дојран, каде што го промовираме токму велосипедизмот. Со ова даваме одличен пример како преку поздрав алтернативен превоз можеме да влијаеме на подобрување на квалитетот на животната средина“, изјави директорот на Транспортната заедница, Матеј Закоњшек.
Оваа година општина Дојран е дел од глобалната недела на урбана мобилност, во која учествуваат 2.695 града од 43 земји во Европа и светот.
„Како локална самоуправа се стремиме кон заштитата на животната средина и за таа цел презедовме низа активности за заштита на Дојранското Езеро како врвен приоритет. Во наредниот период е санација на колекторскиот систем и изградба на пречистителна станица како децениски проблем кој заедно го решаваме со Владата и со поддршка на словенечката амбасада. Како активност што ја преземаме во глобалната недела на мобилноста, Општина Дојран набави и 20 електрични велосипеди како придонес за заштита на животната средина, кои ќе им ги понудиме на туристите и сите заинтересирани граѓани“, изјави градоначалникот на општина Дојран, Анго Ангов.