Економија
Заев на средба со Сојузот на синдикати: Се стремиме кон иста цел- минимална плата од 20.000 денари
Се стремиме кон иста цел – да реализираме минимална плата од 20.000 денари, со што го остваруваме и барањето на синдикатите за минимална плата која е речиси 60% од просечната плата, а просечната нето плата очекуваме да порасне до 34.000 денари до крајот на мандатот, истакна премиерот, Зоран Заев во изјавата за медиуми пред почетокот на денешната средба со претставници на Сојузот на синдикати.
„Целосно сме посветени на заштита на правата на работниците со новиот Закон за работни односи кој ќе ги содржи европските и светските тенденции во работно правните односи. Договорите за вработување на определено време ќе бидат само во исклучителни објективни услови и со траење до 1 година. Преку стабилизирање на Фондот за пензиско и инвалидско осигурување гарантираме редовна и одржлива исплата на пензиите. Воведуваме можност и за предвремено пензионирање до максимум 5 години пред остварувањето на правото на пензија. Не ги забораваме ни ранливите категории. Ќе воведеме државна социјална пензија за секое лице над 65 години кое во последните 20 години живеело на територијата на нашата држава и не ги остварува условите за старосна пензија. Исто така, ќе овозможиме повозрасното земјоделско население, со стаж од 15 години и со старост од 64 години, да биде корисник на пензија“, истакна премиерот Заев.
Осврнувајќи се на заштитата и унапредувањето на првата на жените работнички, премиерот Заев подвлече дека посветено се работи на гарантирано враќање на истото работно место по породилно отсуство и задржување на истото во наредната година, како и на заедничко користење на родителско отсуство на двајцата родители за првите 1-3 месеци на породилното отсуство.
На крај, премиерот Заев ги увери претставниците на Сојузот на синдикати дека во време на пандемија со КОВИД-19, Владата ќе продолжи да ги презема сите потребни мерки за заштита на сите работници и нивните работни места.
„Нашата грижа за работниците и владеењето на работничките права продолжува со построга, темелна и редовна контрола на работното време. Недела ќе биде неработен ден за сите кои сакаат да бидат со своите семејства, а ќе обезбедиме и целосно остварување на правото на годишен одмор. Со оваа средба уште еднаш ја потврдуваме нашата силна волја да бидеме вистински социјален партнер на сите прогресивни чинители во нашата држава и да вложуваме во човечкиот капитал“, заклучи премиерот Заев.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
(Видео) „Фероинвест“ изгради фотонапонска електрана на покривот на „Веро Центар“
„Веро Центра“ доби кровна фотонапонска електрана благодарение на која до 40% од својата потрошувачка на електрична енергија од мрежа ќе ја замени со електрична енергија произведена од сонце.
Веро центарот, кој е лоциран во центарот на Скопје, ќе ја користи кровната електрана за своите сопствени потреби, што беше основна идеја на инвеститорот кога се обрати до ФЕРОИНВЕСТ за изведување на проектот.
Електраната со инсталирана моќност од 730 kW е поставена и пуштена во пробна работа во рок од два месеци во текот на летниот период, во услови на топлотен бран, но со засилено темпо на работа од страна на инженерите и техничарите на ФЕРОИНВЕСТ и ЕМС, со цел клиентот да може што повеќе да искористи од периодот на поволно сончево зрачење за производство на електрична енергија.
Со овој проект, компанијата „Верополус Груп“ се постави во редот на еколошки ангажирани компании кои инвестираат во енергетски проекти значајни за енергетската транзиција на државата, и кои долгорочно носат финансиска заштеда за инвеститорот.
ФЕРОИНВЕСТ нуди изградба на електрани од обновливи извори по принципот клуч на рака, односно од нивно проектирање, изградба, пуштање во употреба, па се до обезбеден откуп на енергијата и 24-часовен мониторинг и одржување на електраната.
ПР
Економија
Некои од горивата од ноќеска поевтинуваат
Регулаторната комисија за енергетика, водни услуги и услуги за управување со комунален отпад на Република Северна Македонија (РКЕ) донесе Одлука со која се врши намалување на малопродажните цени на нафтените деривати во просек за 0,52 % во однос на одлуката од 2.9.2024 година.
Референтните цени на нафтените деривати на светскиот пазар во споредба со претходната пресметка бележат намалување во просек: кај бензините за 5,683%, кај дизелот за 1,869%, кај екстра лесното масло за 2,561% и кај мазутот има намалување за 3,570%.
Курсот на денарот во однос на доларот во изминатиот период по кој беа формирани цените со претходната пресметка е повисок за 0,6747%.
Од 7.9.2024 година од 00:01 часот максималните цени на нафтените деривати ќе изнесуваат:
Моторен бензин ЕУРОСУПЕР БС – 95 74,50 (денари/литар)
Моторен бензин ЕУРОСУПЕР БС – 98 78,50 (денари/литар)
Дизел гориво ЕУРОДИЗЕЛ БС (Д-Е V) 69,50 (денари/литар)
Масло за горење Екстра лесно 1 (ЕЛ-1) 68,50 (денари/литар)
Мазут М-1 НС 44,780 (денари/килограм)
Малопродажната цена на бензинот ЕУРОСУПЕР БС-95 се намалува за 2,00 ден/лит.
Малопродажните цени на бензинот ЕУРОСУПЕР БС-98, како и на ЕУРОДИЗЕЛ (Д-Е V), Екстра лесното масло за домаќинство на (ЕЛ-1) и на Мазутот М-1 НС не се менуваат
Економија
Благ пад на светските цени на храната во споредба со јули
Светските цени на храната благо паднаа во август во споредба со јули, објави денеска Организацијата за храна и земјоделство на Обединетите нации (ФАО).
Светскиот индекс на цените на храната за август изнесува 120,7 поени, што е нешто помалку од 121 во јули, соопшти ФАО. Ова резултира со пад на индексот на цените на месото, шеќерот и житото, а во исто време е забележан и раст на растителните масла и млечните производи. Вредноста на индексот на цените на месото во август изнесува 119,5 поени, што е 0,7 отсто помалку од јули, а пад е забележан и кај живината, свинското и овчото месо.
Како што е наведено, индексот на цените на шеќерот падна 4,7 отсто, на 113,9 поени во август, пред сѐ, поради подобрувањето на производствените изгледи за сезоната 2024/2025 на Тајланд и во Индија по врнежите што се значајни за културите на шеќерна трска. Вредноста на индексот на цените на житото беше на ниво од 110,1 поен, 0,5 отсто помалку од јули, откако неколку месеци по ред цените на пченицата паѓаат поради слабата побарувачка и силната конкуренција меѓу извозниците, пренесува „Танјуг“.
Растителните масла поскапеа и индексот на цените на овие производи месечно се зголеми 0,8 отсто, на 136 поени, особено поради повисоките цени на палминото масло, кои растат веќе три месеци по ред. Најмногу поскапува просечната цена на млечните производи, 2,2 отсто месечно, на 130,6 поени. Во август е забележан значителен пораст на цените на путерот, како и на обезмасленото млеко, сирењето и другите производи.