Економија
Поврзување на искуството и лидерството во насока на нудење повеќе придобивки за потрошувачите
Интервју со менаџерот за експанзија во Тиго и комерцијалниот директор во Електрометал за нивната најнова соработка
Дека едно партнерство може да се реализира и да почне да се развива во добра насока, без оглед на различностите, доказ се Тиго Фајнанс и Електрометал. Овие две компании во јуни започнаа заедничка приказна која се темели на споделување заеднички вредности и високи професионални стандарди, а е во насока на нудење што поголеми придобивки за своите клиенти. Преку спојување на услугите од двата субјекта на едно место, поточно преку отворање на Тиго филијали во неколку маркети на Електрометал, пристапот до финансиски средства во најпотребните моменти станува уште подостапен за граѓаните, а пазарувањето на производи за домот и градината финансиски целосно безгрижно.
За најновата соработка меѓу двете компании, за актуелната понуда, но и за идните планови разговаравме со Дејан Манев, менаџер за експанзија во Тиго Фајнанс и Иван Калинов, комерцијален директор во Електрометал.
- Неодамна Тиго Фајнанс и Електрометал започнаа партнерска соработка, поврзувајќи ги своите дејности преку отворање на филијали на Тиго во три маркети на Електрометал (Маџари, Карпош и Драчево), на тој начин нудејќи пристап до над 60.000 денари при пазарувањето на над 60.000 производи за домаќинството. Како дојде до ова уникатно поврзување на компании од две различни индустрии?
- Дејан Манев, Тиго Фајнанс: Растот и развојот на една компанија на пазарот е возможен пред сѐ, преку постојано антиципирање и соодветно, прилагодување на потребите на клиентите, воведување нови иновативни решенија на нудење услуги тогаш кога е најпотребно, но и на начин кој е најсоодветен на моменталната состојба. Тиго и Електрометал се водечки компании на македонскиот пазар, лидери во својата област, а „домаќинлукот“ е нашата заедничка точка која нè поврзува. Поточно домаќинското работење, како карактерна особина, како паметно управување со својот буџет и како уживање во грижата за домот и градината. Оттаму, и нашиот слоган – „Пријатели на домот и буџетот“, со кој сакаме да порачаме дека Тиго и Елктрометал се вашите пријатели, кои се тука, подготвени да излезат во пресрет тогаш кога е најпотребно. Да бидам попрецизен, баравме партнерска компанија која има сличен импакт врз задоволување на потребите на потрошувачите и нивните одлуки при купувањето, како што има Тиго – односно, задоволување на потребите на едно место, во неколку минути, ефикасно и транспарентно. Градежните зафати при реновирањето на домот, набавката на неопходните алати, материјали и останати нешта поврзани со домот се актуелни во текот на целата година, исто како што е постојано актуелна и потребата од финансиски средства. Синергијата меѓу двете компании е очигледна, заедно можеме да го унапредиме домашниот буџет, да го средиме домот заеднички преку финансиска асистенција и да бидеме решението кога изгледа дека го нема. Па така, не само што овозможуваме недостатокот од финансиски средства при пазарувањето да биде покриен на лице место, туку и на населението од околината каде овие филијали се лоцирани нудиме пристап до финансиски услуги за најразличен тип на потреби.
- Иван Калинов, Електрометал: Електрометал како лидер на пазарот во индустријата „Направи сам“ секогаш се стреми да биде блиску до своите клиенти, да им помага во реализацијата на своите замислени проекти. Водени од идејата „есапот дома и есапот на пазар не е ист” со Тиго им овозможуваме на клиентите нивните проекти да станат реалност и лесно да ги реализираат. Нашата гама на производи опфаќа повеќе од 60.000 производи, како електроматеријали, алати, бои и лакови, водовод, санитарија, бела техника, поточно сè за домот и градината. Изборот навистина е голем и многу често нашите клиенти доаѓаат со еден план, а си заминуваат со друг, надграден и збогатен Преку партнерската соработка со Тиго, пазарувањето сега е целосно безгрижно затоа што во случај на кусок, тука се нашите пријатели од Тиго, како финансиска поддршка.
- Тиго Фајнанс последните неколку месеци остварува експанзија преку отворање на нови филијали низ целата држава. Па така, небанкарските финансиски услуги стануваат сè подостапни до граѓаните, а со тоа домашната економијата добива зајакнување кое ѝ е особено потребно во кризни периоди, како што е овој. Во кој правец се движи стратегија на Тиго во однос на достапноста на услугите на компанијата за граѓаните?
- Дејан Манев, Тиго Фајнанс: Финансиските потреби на потрошувачите се постојани, секојдневни, во секое време, многу често и неодложни. Трошоци се појавуваат континуирано, од сите страни, а нашите буџети често недоволни да го покријат секој финансиски издаток. Ние сме тука токму во тие моменти – ДОСТАПНИ да им понудиме финансиска поддршка и да им излеземе во пресрет на граѓаните токму во тие ситуации преку фер, транспарентен и одговорен начин на кредитирање. Исто така, одлично сме репозиционирани, физички и дигитално присутни, со што потрошувачите знаат дека имаат Финтек пријател подготвен во секое време да ги задоволи сите нивни потреби. Главната предност на Финтек компаниите е што се достапни, и тоа не само во смисла на физичка достапност со филијали, туку и во смисла на ефикасност – клиентот добива финансиски средства тогаш кога има потреба од тоа, за неколку минути. Ние сме достапни секаде каде граѓаните имаат потреба од нашите услуги – онлајн на www.tigo.mk и офлајн со 25 филијали низ државата, чиј број постојано расте. Имено, во рамките на планот за експанзија за првите шест месеци од 2021, Тиго отвори филијали во Струга, Штип, Велес, Гостивар, Кичево, Кавадарци, Свети Николе и Радовиш, уште шест во Скопје – Бит Пазар, Чаир, Кисела Вода, како и филијалите во маркетите на Електрометал во Маџари, Карпош и Драчево. На тој начин зголемувајќи го и бројот на нови вработувања, и уште еднаш потврдувајќи ја својата стратешка определба да биде сериозен и посветен партнер на локалните заедници во коишто делува. Експанзијата продолжува со подеднаков интензитет и во претстојниот период, преку отворање на нови филијали во многу други градови низ целата држава. Дополнително, соработката со партнерските компании кои се двигатели на домашната економија продолжува, физичката достапност преку филијалите низ државата постојано ќе расте, а Тиго со своите филијали ќе биде присутен насекаде каде граѓаните ќе имаат потреба. Говорејќи за достапност, само во Тиго – првиот кредит со навремена и целосна еднократна отплата до 30 дена за новите клиенти е целосно бесплатен кредит, а нудиме и опција за повеќекратни месечни отплати на кредитот на 3, 6, 12, 18 и 24 месеци.
- Електрометал со децении го одржува статусот на еден од лидерите на македонскиот пазар во продажбата на електроматеријали, алати, водовод, санитарија и сè за домаќинството. На што се должи овој успех на компанијата и кои се нејзините идни планови?
- Иван Калинов, Електрометал: Електрометал постои од 1949 година. На почетокот како компанија која се занимавала исклучиво со трговија на големо, а со текот на времето, како што се менувале светските текови и потребите на потрошувачите, така се менува и начинот на дејствување на нашата компанијата. Зад себе имаме 72 години традиција, што претставува гаранција за доверба и квалитет и синоним за вистински центар за домот кој на купувачите им нуди широк асортиман на производи од најквалитетните светски брендови. Денес, Електрометал е лидер во малопродажбата и со силен интензитет и квалитет се стремиме да бидеме во директен контакт со купувачите преку нашата мрежа на маркети низ целата држава. Нашиот концепт е да бидеме поблиску до потрошувачите, а тоа подразбира покривање на целата територија на Македонија. Во моментов сме присутни во Скопје на 5 локации, а низ државата сме присутни во Кичево, Охрид, Велес, Прилеп, Кочани и Струмица. Нашата цел е до 2025 година да имаме вкупно 25 маркети во Македонија, но исто така имаме план за ширење во соседна Србија во следните години. Располагаме со преку 60.000 производи што е уште една причина повеќе за сè поголемо развивање на малопродажбата, место каде може да им го покажеме цело портфолио на потрошувачите. Ги следиме светските трендови и во нашето работење постојано се прилагодуваме на новите потреби на купувачите, континуирано збогатувајќи ја нашата понуда. На тој начин, веруваме дека го трасираме успешниот пат за уште многу децении пред нас.
- Кога сме веќе кај плановите за иднина, дали може да ни откриете какви нови придобивки може да очекуваат потрошувачите од оваа партнерска соработка меѓу Тиго и Електрометал?
- Дејан Манев, Тиго Фајнанс: Потенцијалот на оваа соработка е дефинитивно неограничен, така што продолжуваме и во претстојниот период да бидеме партнер преку кој може да се искористи финансиската помош овозможена од Тиго за најлесно опремување на домот, станот, викендичката, гаражата, дворот, кафулето, со крајна цел, пазарувањето и освежувањето на домот да станат целосно уживање ослободено од финансиски стресови. Ги повикувам сите постоечки и нови клиенти на Тиго да ги користат услугите на нашите филијали внатре во маркетите на Електрометал, лоцирани во Маџари, Драчево и Карпош, и да не ги пропуштаат новостите кои следуваат.
- Иван Калинов, Електрометал: Преку соработката со Тиго клиентите ќе бидат во можност во секој маркет на Електрометал низ државата лесно и брзо да дојдат до посакуваните производи. Концептот на соработка е уникатен и единствен во Македонија од ваков тип и затоа верувам во успешноста на овој проект. Заеднички ќе работиме на континуирано развивање и негова постојана надоградба, нудејќи свежи поволности и изненадувања за нашите клиенти. Ги повикувам клиентите да ги следат нашите нови понуди, но и да дојдат, да нè посетат, да се опуштат при пазарувањето на нашите производи користејќи ги поволностите од Тиго. Добро е да се знае дека имаш пријател на домот и буџетот
(ПР текст)
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Трансформација, иновации и одржливост во фокусот на конференцијата „Бизнис лидер“
Вчера, на 17 септември, во хотелот Александар Палас, успешно се одржа првата конференција „Бизнис лидер“. Настанот, насловен „Обликување на иднината: Лидерство во ерата на трансформација“, ги обедини највлијателните и најуспешните бизнис лидери, претприемачи и претставници од јавниот и институционалниот сектор, со цел да се дефинираат стратешки насоки кои ќе го поттикнат растот и развојот на македонскиот бизнис сектор.
Конференцијата започна со воведен говор на министерот за економија и труд, Бесар Дурмиши, кој нагласи дека бизнис заедницата е двигател на економијата, а улогата на државата е да обезбеди поволна деловна клима. Тој додаде дека економијата подготвена за иднината зависи од дигиталните политики и иновациите, како и од усогласувањето на економскиот потенцијал на земјата со паметни инвестиции.
Потоа, Огнен Огненоски, основач и извршен директор на Бизнис Мрежа, ја презентираше „Макроекономската анализа на македонското стопанство за 2024 година“. Анализата откри ексклузивни податоци и трендови за економијата на Македонија. Според неа, вкупниот број на трговски друштва изнесува 73.384. Најголем број компании има во секторите: трговија на мало (19.1%), трговија на големо (9.1%), и товарен патен транспорт (4.3%). Највисоки профитни маржи остваруваат индустриите поврзани со недвижен имот (26.9%), компјутерска инфраструктура (26.7%) и друго рударство (25.5%). Најголем раст на приходите во периодот 2022-2024 е забележан во јавната управа (214%) и вадењето на сурова нафта и природен гас (72%). Во однос на странските инвестиции, компаниите со странски сопственици во 2024 година оствариле приходи од 8.8 милијарди евра и добивка од 0.5 милијарди евра. Во Македонија се регистрирани 3.522 компании со странски сопственици од вкупно 81 земја. Најмногу од овие компании се од Турција (25.1%), Србија (10.0%) и Бугарија (8.4%).
По анализата, Анета Коробкина, меѓународен коуч за трансформација, истакна дека современото лидерство се заснова на самосвесност и емоционална интелигенција, посочувајќи дека емоционалната интелигенција е фактор што прави 90% од разликата меѓу добар и одличен лидер.
Потоа следеше инспиративен разговор на тема „Зелена трансформација и конкурентност“, модериран од генералната директорка на Макстил, Марија Дуковска Павловска. Таа истакна дека деловните методи и организациската култура се клучни за управување со промените и имплементација на доброто корпоративно управување. Панелистот Горан Антевски, генерален директор на Раде Кончар – ТЕП, наведе дека ESG стандардите ги поттикнале да размислуваат за одржливост, а отпадот доколку се менаџира правилно може да биде извор на придобивка наместо проблем.
Конференцијата продолжи со динамична панел-дискусија на тема: „Финансиски партнери или само кредитори? Новата улога на банките во екосистемот на МСП“, модерирана од Огнен Огненоски, основач и извршен директор на Бизнис Мрежа. Извршниот директор и член на Управен одбор на Халкбанк АД Скопје, Д-р Беркан Имери, нагласи дека банкарството се движи кон тоа да биде советник и партнер на компаниите, со услуги кои досега беа достапни само во високо развиените банкарски системи. Директорот на Сектор за корпоративни клиенти на Шпаркасе Банка АД Скопје, Благоја Устијаноски посочи дека најголемиот предизвик за МСП не е секогаш каматата, туку нивната подготвеност и транспарентност. Тој истакна дека дигиталниот пристап, преку онлајн апликации и вештачка интелигенција, ќе ја олесни комуникацијата и ќе ја зголеми брзината на одлуките. Славен Ќуриќ, извршен директор за трансформации и финансии на Мега-метал Словенија, додаде дека банката не треба да биде само кредитор, туку и партнер кој ќе им помогне на компаниите да ја подобрат финансиската дисциплина и управувањето со ризиците, земајќи ги предвид и нематеријалните фактори како што се иновациите, тимот и пазарниот потенцијал.
Генералниот директор на Млекара АД Битола, Ѓорѓи Петрушев, во својата главна презентација „Одржливост и лидерство во млечната индустрија“ нагласи дека одржливоста не е само маркетиншки израз, туку системска вредност која мора да биде прифатена од бизнис лидерите. По оваа презентација, Петрушев продолжи со инспиративен разговор, модериран од Владимир Ристевски, извршен директор на Евентика, каде истакна дека лидерството е обврска, а не само титула, која ја носи тежината на довербата што другите ја имаат во тебе. Според него, вистинските лидери треба да ја гледаат кризата како можност за трансформација. За да се изгради култура на еднакви можности, потребно е да се верува дека тоа носи поголеми вредности и подобри резултати, а разновидниот менаџмент значи поефикасно носење одлуки. Петрушев посочи и на важноста да се избере вредноста пред профитот, бидејќи репутацијата е најголемиот капитал на компанијата.
По оваа презентација, се одржаа уште три динамични панел-дискусии. На панел-дискусијата за „Лидерство во време на криза“, модерирана од Ирена Јакимова, меѓународен тренер и коуч за лидерство, Д-р Лазар Јовевски, професор на Правниот факултет, нагласи дека вистинскиот лидер гради визија и менталитет кој успешно го издигнува тимот над кризата преку усогласување на лидерството со постојаните промени. Генералниот директор на Порше Македонија, Златко Муцунски, истакна дека во времиња на неизвесност, лидерството не се мери само со резултати, туку и со отпорност и емпатија, а кризите се можност за раст. Контролинг менаџерката и членка на стратешкиот менаџмент на Зегин групација, Јана Ѓорчева Корубин истакна дека контролингот како систем на отчетност е од суштинско значење за вистинските лидери.
На третата панел-дискусија за „Финтек револуција и иднината на финансиите“, модерирана од генералната директорка на ЕОС Матрикс, Катерина Бошевска, беа истакнати клучните аспекти на дигиталната трансформација во финансискиот сектор. Директорката на Управата за јавни приходи, Елена Петрова, нагласи дека интеграцијата на дигиталните пари, е-фактурата и податоците во реално време во даночните процеси придонесува за поедноставна, поточна и поефикасна наплата. Таа додаде дека финтек алатките не само што ја подобруваат ефикасноста, туку градат доверба и отвораат простор за иновации и раст. Благоја Хамамџиев, основач и управител на Моделикс, посочи дека финтек индустријата го решава проблемот на крајниот корисник преку брзи, евтини и
квалитетни услуги. Тој ја истакна можноста за реплицирање на успешни приказни како онлајн бакната Револут од Литванија доколку се олабави законската регулатива. Главната извршна директорка на Иуте Македонија, Биљана Мишиќ, нагласи дека во дигиталната ера, човечкиот фактор останува клучен. Според неа, иднината е во „phygital“ моделот, кој комбинира автоматизација со човечка поддршка, со цел да се изгради долгорочен однос со клиентите заснован на транспарентност и доверба.
На последната панел-дискусија за „Градење на организациска култура прилагодлива на промени“, модерирана од генералната менаџерка на Консалтинг Интер Груп Пенка Мукаетова, панелистите понудија клучни увиди. Димитар Ристовски, корпоративен секретар на Алкалоид, потенцираше дека силата на една компанија лежи во трајните вредности како искреност и чесност. Ивана Стојаноска, сениор менаџер за комерцијално работење на Филип Морис Тутунски Комбинат Прилеп, ја нагласи важноста на флексибилноста и адаптацијата, додека извршната директорка на Сава Осигурување Мелита Гугуловска истакна дека компаниите мора да имаат цврсти темели и да бидат флексибилни за адаптација.
На крајот од конференцијата, Борислав Тноковски во својот завршен говор истакна дека трансформацијата е неминовност, а во срцето на секоја успешна трансформација стои храбар, одговорен и визионерски лидер. Тој изрази надеж дека разговорите ги инспирирале присутните да продолжат да ја обликуваат иднината на своите компании и на општеството.
Организаторот на настанот, Владимир Ристевски, извршен директор на Евентика, изрази огромно задоволство од успехот на конференцијата. Тој истакна дека настанот „Бизнис лидер“ е создаден со цел да се постави повисок стандард во светот на настаните и да се создаде платформа каде елитата на бизнис-заедницата се среќава, разменува идеи и се инспирира. Според Ристевски, визијата на компанијата е фокусирана на иновации, дигитално и зелено, со акцент на доброто корпоративно управување како стандард.
Економија
Меѓународен ден на еднакви плати: жените во Македонија сè уште заработуваат помалку од мажите
Денеска, светот го одбележува Меѓународниот ден на еднакви плати, кој потсетува на потребата од еднакви можности и фер однос на работното место. По тој повод, Алијансата за родова еднаквост на работното место (GEA) предупредува дека родовиот јаз во платите останува сериозен проблем и покрај долгогодишната законска рамка што гарантира еднаква плата за иста работа.
Според податоците, жените на глобално ниво заработуваат речиси 20 % помалку од мажите, а во Европската Унија просечниот јаз изнесува 12,7 %. Во Македонија разликата во 2022 година била 13,5 %, со просечна годишна бруто-заработувачка од 615.725 денари кај мажите и 532.625 денари кај жените. Најголеми разлики се бележат кај вработените на возраст од 45 до 49 години и кај оние со високо образование.
GEA укажува дека овие нееднаквости се резултат на дискриминација на пазарот на трудот, пониска застапеност на жените на раководни позиции и концентрирање во сектори со пониско вреднуван труд. Дополнително, повеќето од примателите на минимална плата се жени.
„Овие разлики не се само прашање на правичност, туку и на економска рационалност. Жените претставуваат најголемиот неискористен потенцијал за економски раст“, порачаа од Алијансата додавајќи дека намалувањето на родовиот јаз во учеството на пазарот на труд би донело значителен раст на глобалниот БДП.
GEA апелира институциите, работодавците и општеството да обезбедат еднаков третман, фер застапеност и реални можности за напредок на жените нагласувајќи дека родовата еднаквост е предуслов за одржлив развој и праведно општество.
Економија
Министерството за енергетика: Методологија за енергетска сиромаштија – Македонија првпат добива јасни критериуми за ранливите домаќинства
Министерството за енергетика, рударство и минерални суровини доби позитивен одговор од Секретаријатот на Енергетската Заедница за драфт-верзијата на Методологијата за мерење на нивото на енергетска сиромаштија. Во нивниот коментар, беше потврдено дека документот е во согласност со европските стандарди и со обврските кои произлегуваат од Директивата (ЕУ) 2019/944, која ги задолжува земјите да воспостават и објават критериуми за утврдување на енергетската сиромаштија.
Тоа значи дека методологијата е целосно прифатлива за објава, а воедно претставува и прв ваков систематизиран документ во земјава кој ќе овозможи реално мерење и следење на овој феномен.
Со оваа методологија, за првпат се воспоставуваат јасни критериуми за препознавање на ранливите домаќинства – како што се ниските приходи, високите трошоци за енергија во семејниот буџет и ниската енергетска ефикасност на домаќинствата. Овие параметри ќе бидат основа за понатамошни годишни програми за заштита на ранливите енергетски потрошувачи, велат од Министерството за енергетика.
Зошто е важна методологијата?
· Таа ќе овозможи институциите да имаат јасна слика за обемот и структурата на енергетската сиромаштија во земјата.
· Ќе послужи како основа за креирање таргетирани политики и мерки за заштита на домаќинствата кои најмногу се соочуваат со тешкотии при обезбедување енергија.
· Ќе придонесе кон усогласување со европските практики и стандарди, како дел од пошироката агенда за енергетска транзиција и социјална одржливост.
Министерството за енергетика веќе работи на следните чекори – подготвување на годишна програма за заштита на ранливите потрошувачи, каде методологијата ќе биде централна алатка за дефинирање на приоритетите и интервенциите.
„Со оваа методологија за првпат систематски ќе ја измериме енергетската сиромаштија во земјава. Тоа ќе ни овозможи јасно да ги идентификуваме домаќинствата кои се најпогодени и да креираме прецизни, таргетирани мерки за нивна заштита. Нашата цел е никој да не биде оставен на маргините. Ова е силен чекор напред кон една поправедна и посоцијално одржлива енергетска политика“, истакна министерката за енергетика, рударство и минерални суровини, Сања Божиновска.
Со ова, Македонија прави значаен исчекор во градењето на праведна енергетска политика која се грижи за граѓаните и ја става социјалната димензија на енергетската транзиција во фокусот, се додава во соопштението на Министерството за енергетика.
Поврзаноста не се мери во лајкови, туку во љубов и присуство, порача Ѓорге Иванов на Конгресот на религии во Казахстан
Во периодот од 15-18 септември, поранешниот претседател на Република Македонија (2009–2019), Ѓорге Иванов, учествуваше на Осмиот Конгрес на лидерите на...
„По Апасиев и Мециновиќ и Мојсоска си инкасирала пари од партијата додека критикувала за патни трошоци“, вели ВМРО-ДПМНЕ
„Јована Мојсоска по примерот на нејзините сопартијци, Димитар Апасиев и Амар Мециновиќ, инкасирала големи суми на пари од партијата. Додека...
Два активни пожари во Гази Баба и Гевгелија, под контрола пожарот во „Дрисла“
Во изминатото деноноќие биле регистрирани вкупно 31 пожар на отворен простор. Според податоците на Центарот за управување со кризи, до...
Стразбур ќе одлучува за струшката депонија: пример за домашните судови во борбата против загадувањето
Судот во Стразбур во наредниот период треба да расправа за депонијата во Струга, која го „труе“ градот. Неговата одлука ќе...
Путин го разреши заменик-шефот на неговата администрација
Рускиот претседател Владимир Путин го разреши Дмитриј Козак од функцијата заменик-шеф на руската претседателска администрација со декрет. Декретот од една...
Германскиот канцелар: Tреба да одлучам дали да ги поддржам санкциите кон Израел
Германија ќе донесе одлука дали да ги поддржи санкциите на Европската Унија против Израел пред состанокот на Европската Унија во...
(Видео) Трамп го нападна градоначалникот на Лондон: „Тој е меѓу најлошите во светот“
Американскиот претседател Доналд Трамп изјави дека не сакал градоначалникот на Лондон, Садик Кан, да присуствува на државниот банкет во Велика...
МИ6 ќе бара нови доушници на темната мрежа
Британските шпиони ќе ја користат „темната мрежа“ за регрутирање информатори и добивање класифицирани информации од агенти во Русија и низ...
Побаран притвор за четири лица за пожарот на отпадот во Трубарево
Основното јавно обвинителство Скопје, по анализа на сите докази прибрани во предистрагата до овој момент, денеска донесе наредба за спроведување...
(Видео) Масовни протести во Франција: Уапсени 140 демонстранти, повредени осум полицајци
Според најновиот извештај на француското Министерство за внатрешни работи, 140 лица се уапсени низ целата земја, од кои 75 се...
Злоупотреби со регистрација на половни возила: 11 осомничени, меѓу нив и вработена во МВР
Секторот за внатрешни работи Куманово, во соработка со Одделот за внатрешна контрола и криминалистички истраги при МВР, поднесе кривични пријави...
Инцидент кај Петровец – нападнато возило на пожарникари, напаѓачот им се заканувал
Во полицијата било пријавено дека вчера кај наплатната рампа Петровец, лице упатувало закани кон пожарникари кои се движеле со службено...
Меѓународен ден на еднакви плати: жените во Македонија сè уште заработуваат помалку од мажите
Денеска, светот го одбележува Меѓународниот ден на еднакви плати, кој потсетува на потребата од еднакви можности и фер однос на...
Над 500 административци од Скопје денес ги почнаа тренинзите за поголема професионалност, етика и транспарентност
Министерството за јавна администрација, денеска, го одржа првиот дел од најголемата програма за професионален развој на административни службеници во историјата...
Концентрациите на ПМ 10-честичките во зоната на Трубарево се во рамките на дозволените граници, објави Министерството за животна средина
Министерството за животна средина и просторно планирање информира дека во периодот од 17.9.2025 (9.30 часот) до 18.9.2025 (9.30 часот) беа...
(Фото) На Стење фатен патник со златен накит вреден 346 илјади денари
На граничниот премин Стење со Албанија, царинските службеници во соработка со гранична полиција спречија обид за криумчарење на златен накит...
Путин сака да го освои целиот Донбас; Зеленски: Подготвуваат две големи офанзиви наесен
Руските сили подготвуваат уште две големи офанзиви откако три кампањи веќе не успеаја оваа година, изјави украинскиот претседател Володимир Зеленски....
„Влен“: ДУИ партнер на Левицата, за власт ги гази Албанците
„ДУИ падна толку ниско што повеќе не се крие зад сцената, туку отворено се појавува како политички партнер на најалбанофобната...
Трамп: Посетата на Велика Британија е една од најголемите почести во мојот живот
Американскиот претседател Доналд Трамп изјави дека неговата посета на Велика Британија е една од најголемите почести во неговиот живот во...
(Видео) Тројца полицајци убиени, двајца ранети во Пенсилванија, осомничениот убиен
Тројца полицајци беа убиени, а двајца други беа сериозно ранети во Пенсилванија во престрелка со вооружен човек кој подоцна беше...
