Економија
Ковачевски: Историското покачување на платите во образованието мора да значи и подобри резултати во работата

„Се покажа дека штрајкот практично не беше решение, туку дека дијалогот е решение“, оцени премиерот Ковачевски на седницата на пратенички прашања во Собранието, за резултатите од разговорите со СОНК, за платите во образованието.
„Постигнато е историско зголемување на платите во образовниот сектор што изнесува 15 проценти и заедно со покачувањата во изминатите години коишто беа 21 процент кумулативно, се над 36 проценти покачување на платите во образованието. Во историја не се случило такво зголемување и покачување на платите на наставниците и просветните работници“, посочи премиерот Ковачевски.
Тој ја потенцираше споредбата кога за 10 години, платите беа само за 4 проценти зголемени и се носеа на секој штрајк заменски наставници и денес кога има за 36 проценти покачување, за 5 години и се водат дијалози со синдикатите.
„Постоеја голем број влијанија кои сметаа дека СОНК треба да оди со штрајк и ние во ниту еден момент не го спречивме. Кажав дека поминати се времињата кога се носеше закон за носење на заменски наставници и кога третманот на наставници и образовни работници во време на штрајк беше исклучиво со партиски и политички притисоци“, рече премиерот Ковачевски.
Претседателот на Владата Ковачевски, додаде дека „нашата држава има институции и има законски решенија коишто овозможуваат и без штрајк да се постигне договор, а оваа Влада докажа дека може да ги користи законските решенија со коишто се доаѓа до заеднички прифатливо решение и во оваа сфера каде што се регулираат работничките права“.
„Уште еднаш сакам да го поздравам договорот којшто е постигнат, знам дека министерот за образование и СОНК треба во овие денови да ја потпишат спогодбата и со тоа да почне и реализацијата. Нормално, во ребалансот предвидени се средствата за она што беше договорено, а останува пред нас да се договори методологијата за зголемување, раст на платите во јавниот сектор вклучително и во секторот на образование“, рече премиерот Ковачевски.
„Имаме и отворен дијалог со репрезентативниот синдикат во однос на зголемување на платите и воведување на методологија, којашто нема да биде насочена само на зголемување на платите врз основа на зголемување на трошоци за живот што треба да биде вклучено, врз основа на зголемување на просечна плата што треба да биде вклучено – меѓутоа и во однос на зголемување на продуктивноста и во однос на зголемување на ефикасноста на работењето, бидејќи овде се работи за јавниот сектор. Приватниот сектор е тој којшто го плаќа јавниот сектор и мора да му се испорача повисока услуга. На последната седница на Владата се донесе нова програма за инвестиции во образованието, но точно е дека треба да се подобрат и резултатите во образованието“, порача премиерот Ковачевски.
Тој посочи на резултатите од Пиза тестирањето и низа други споредбени податоци од други држави, што покажуваат дека има многу што да се работи.
Премиерот Ковачевски најави дека во разговорите за реформите ќе учествуваат синдикатите, но и оние на кои се однесуваат – и наставниците, исто како што за првпат при носењето на Законот за средно образование, којшто сега е во постапка, ќе бидат вклучени и средношколците.
„Сите треба подеднакво да учествуваат во зголемување во перформансите на нашето образование, затоа што ако држава сака да оди напред, таа мора да оди со образувани млади луѓе коишто ќе учат нови работи“, констатираше премиерот Ковачевски на седницата за пратенички прашања во Собранието.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Поради штрајк откажани десет проценти од летовите во Париз

Околу 10 отсто од сите летови од парискиот аеродром Шарл де Гол се откажани поради штрајкот, а слично нарушување во сообраќајот се очекува и утре, изјави портпаролот на операторот на парискиот аеродром АДП, пишуваат француските гласила.
Во Париз се очекуваат прекини на летовите бидејќи работниците од двата аеродроми стапија во четиридневен штрајк од 30 јуни до 3 јули 2022 година.
Персоналот на аеродромот претходно најавил штрајк и ги објавил своите барања, а тоа се повисоки плати и подобри услови за работа.
Националната авиокомпанија на земјата, Ер Франс, исто така објавила информации на својата веб-страница за штрајкот и очекуваните прекини на летовите за 30 јуни 2022 година.
Ер Франс, исто така, соопштил дека ќе го прилагоди својот распоред на летови за преостанатите денови од штрајкот, доколку е потребно, според информациите обезбедени од аеродромот во Париз и Француската управа за цивилно воздухопловство, пренесуваат тамошните медиуми.
Економија
Битиќи и Папандреу: Интеграцијата е единствен начин за да се создаде меѓузависност

Во рамките на Македонскиот енергетски форум – МЕФ 2022 се одржа панелот „Преиспитување на регионалната енергетска безбедност“, на кој учествуваа заменик-претседателот на Владата задолжен за економски прашања, координација на економските ресори и инвестиции, Фатмир Битиќи, и Јоргос Папандреу, долгогодишен политичар, член на грчкиот парламент и поранешен премиер на Грција.
Панелот, кој беше модериран од Али Аслан, се осврна на повеќе значајни прашања во врска со регионалната интеграција од аспект на економската и енергетската зависност и перспективите.
Вицепремиерот Битиќи истакна дека е потребно многу потемелно да навлегуваме во корените на проблемите поврзани со енергетските предизвици, односно заеднички да се справуваме со причините, а не само да ги решаваме нивните ефекти. Тој потенцира дека интеграцијата е единствен пат за да се создаде регионална меѓузависност и соработка, со што единствено ќе се одрази духот на заедништвото помеѓу ЕУ и земјите од Западен Балкан.
„Во услови на економска, енергетска и воена криза, ковид-пандемија, мораме да работиме заедно и да се справиме со енергетската криза и да постигнеме геополитичка сигурност. Интеграцијата помеѓу земјите од Западен Балкан, како и земјите членки на ЕУ, е единствен начин за креирање одржлива енергетска независност“, потенцира Битиќи.
Папандреу истакна дека тој во континуитет се залага за унапредување на процесот на проширување на ЕУ со земјите од Западен Балкан и дека изоставувањето на овој регион од европската интеграција претставува безбедносен ризик, кој Европа не смее да си го дозволи. Папандреу апелира дека се потребни итни и неодложни заеднички напори на ЕУ и нашиот регион во обезбедувањето на енергетската сигурност и економската стабилност.
Двајцата панелисти се согласија дека актуелната соработка во енергетиката е важно геополитичко и безбедносно прашање, а двете соседни земји со примери покажаа дека се спремни да земат водство и да им покажат и на своите европски колеги за додадената вредност на заемната регионалната соработка и меѓузависност.
Економија
(Видео) Мицкоски: Власта лаже кога зборува за струјата, покачувањето ќе биде над 18 отсто

Претседателот на ВМРО-ДПМНЕ, Христијан Мицкоски, при денешната посета во општина Гази Баба одговараше на новинарско прашање кое се однесуваше на вчерашното негово тврдење дека струјата ќе поскапи над 18 %, а за кое власта велеше дека е лажно и рече дека од власта, која толку пати го лажела својот народ, не очекува да ја каже вистината по илјада кажани лаги.
„Се обидуваат да го амортизираат незадоволството помеѓу граѓаните така што ќе кажат процент што не е реален. Тоа ќе мора да се компензира со трансфери на пари од буџетот до поранешно ЕЛЕМ, денешно ЕСМ, затоа што ЕСМ не е подготвено да ги произведе сите количини струја што ги бара ‘ЕВМ хоум’ за да ги испорача до граѓаните и индустријата, што значи дека ќе мора да увезува скапа струја и таа скапа струја ќе чини помеѓу 150 и 200 милиони евра според некои процени на годишно ниво. Имајте предвид дека кон крајот на оваа година, повторно таму некаде на 30-31 декември, ќе имаме уште една ревизија на цената на електричната енергија, така што од 1 јануари ќе биде можеби уште еден шок ако овие останат до тогаш. Затоа се потребни предвремени избори за да може ЕЛЕМ да се реструктуира за да може да го произведе она што им е потребно на граѓаните и да немаме дополнително покачување на цената на струјата“, рече Мицкоски.
Мицкоски додаде дека ова што го кажуваат од 7,5 % е голема лага, тоа ќе се случува во оние преодни месеци, како април и мај и можеби и септември и октомври, а зимата и налето поскапувањето ќе биде од 20 до 50 % во зависност од тоа каква изолација имаат нашите домови.
„Тука веќе немојте да зборувате за екологија затоа што граѓаните ќе горат сè за да може да си ги затоплат домовите во текот на зимата. Ова ќе биде исклучително тешка зима со исклучително загаден воздух во сите градови на Македонија. Имајте го ова предвид, уште од сега го најавувам за да не биде дека не сме го кажале. И, второ, преку трансферот од буџетот од 150 до 200 милиони евра, тоа се пари на граѓаните што ова расипништво и крадење на Владата ќе ги плаќаат преку своите даноци, така што треба да им дојде крајот на овие криминалци во политиката, а лекот за тоа, нормално, се предвремените парламентарни избори, она што го бара ВМРО-ДПМНЕ – да дојдат луѓе што знаат како треба да се работи за да не трпи стандардот на граѓаните“, додаде Мицкоски.