Економија
Костадинов: Инвестиции од околу 400 милиони евра во две фабрики за преработка на отпад

Следуваат инвестиции од околу 400 милиони евра во две фабрики за преработка на отпад, изјави на прес-конференција портпаролот на СДСМ, Костадин Костадинов.
Фабриките се во рамки на Интервентниот план на инвестиции во вредност од над осум милијарди евра кои треба да се реализираат до 2027 година.
Како што истакна Костадинов, еден од инвеститорите е од Луксембург, кој ќе инвестира 336 милиони евра за фабрика со плазма за согорување, односно бескислородно согорување на високи температури.
„Оваа инвестиција е во затворен систем без оџак и е целосно еколошка инвестиција. Покрај фабриката, вкупната инвестицијата содржи и 100 комунални возила за собирање смет, изградба на 11 претоварни станици и 11 збирни потстаници, 6.000 метални и пластични комунални контејнери, како и асфалтирање на патна делница од 5 км до село Дуброво во Општина Неготино“, рече Костадинов.
Нагласи дека инвестицијата претставува целосно и трајно решавање на отпадот на 74 проценти од територијата на Северна Македонија или опфаќа 48 општини.
Понатаму, следува и отворање фабрика за селектирање и преработка на отпад во Источниот и Североисточниот Регион, во вредност од 37 милиони евра, средства од ЕУ.
„За целите на оваа инвестиција веќе е формирано заедничко комунално претпријатие за управување со депонијата, односно со новата фабрика во Свети Николе. Според предвиденото, стартот на изградба би бил до крајот на годината, а истата би опфатила огромен број општини од Штипскиот и Кумановскиот Регион“, појасни Костадинов.
Како што додаде, само со овие две инвестиции во вкупна вредност од околу 400 милиони евра се става крај на деценискиот проблем со депониите во нашата држава.
„Ова се инвестиции за нови работни места, но и за почиста и поздрава животна средина“, додаде портпаролот на СДСМ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Европа од денеска воведува забрана за увоз на руски дизел

Од денеска, Европа воведе забрана за увоз на руски дизел гориво и други нафтени деривати, со што дополнително се намалува нејзината зависност од Москва додека се обидува да го казни Кремљ за воената акција во Украина.
Забраната е воведена заедно со ограничување на цената на нафтените деривати, што е резултат на договорот меѓу групата седум демократски земји, пренесе АП.
Целта е да се дозволи дизелот да продолжи да се снабдува во земји како Кина и Индија и да се избегне ненадејно зголемување на цената на ова гориво, што би им наштетило на потрошувачите ширум светот, а во исто време ќе го намали профитот што го прави Москва за државниот буџет.
Дизелот е од клучно значење за економијата бидејќи се користи во автомобили, камиони за транспорт на стоки, земјоделски машини и фабрички машини.
Членките на ЕУ отсега ќе купуваат дизел гориво од САД, Блискиот Исток и Индија за да го заменат руското гориво кое во еден момент покриваше десет проценти од потребите на Европа.
Цената на дизелот може да порасне поради зголемените транспортни трошоци и закрепнувањето на побарувачката во Кина, чија економија излегува од драконските ограничувања наметнати од пандемијата Ковид-19, пренесе Танјуг.рс.
Економија
(Видео) Битиќи: Наскоро доаѓа АДА – првиот дигитален асистент во јавниот сектор во регионот

Пред нешто повеќе од една година започнавме со креирање на првиот дигитален асистент базиран на вештачка интелигенција – АДА, преку кој компаниите ќе можат да добиваат целосни информации за условите за инвестирање во нашата земја и државната помош која ја нудиме, соопшти заменик-претседателот на Владата задолжен за економски прашања, Фатмир Битиќи.
„ АДА ќе ги нуди сите информации за финансиска поддршка по Планот за економски раст. А секако понатаму овој асистент базиран на вештачка интелигенција ќе го учиме и на други услуги кои се важни за стопанството и граѓаните“ рече Битиќи.
„ Дополнително, заедно со Светска Банка ќе започнеме конечно да дигитализираме 11 деловни процеси во 11 различни институции коишто го користат механизмот на државна помош. Ова ќе помогне во зголемување на ефективноста и ефикасноста“, изјави Битиќи зборувајќи за развивањето на АДА.
Клучно за развивање на дигиталниот асистент АДА е тоа што ќе овозможи унифицирани информации достапни во секое време за сите заинтересирани.
„ Дигитализацијата е одговор на сите недостатоци што се појавуваат во различни извештаи во однос на борба против корупција и организиран криминал. Единствен начин тоа да го адресираш е преку целосно тргање на страна на човечкиот фактор и секако да го направиш транспарентен целокупниот процес на поддршка на компаниите и инвестициите. Одлучивме дека ќе ја направиме АДА, дигиталниот асистент кој ќе биде првиот асистент кој некогаш е поставен во јавниот сектор. Инаку АДА е промената на дело којшто сите ние треба да ја направиме оваа година и наредните години ако сакаме навистина да стигнеме во растот и развојот кој сакаме да го постигнеме“, изјави Битиќи.
АДА ќе дава информации за инвестиции која овој месец ќе биде детално промовирана.
Дигиталниот асистент АДА се работи преку проект на Фондот за иновации и технолошки развој кој беше спроведен како предизвик за домашната старт ап заедница на кој победи фирмата CodeWell. АДА е првиот дигитален асистент во јавниот сектор во регионот кој работи на вештачка интелигенција, ве води и одговара на прашања за можностите за инвестиции во нашата земја и наскоро истиот ќе биде детално промовиран.
Економија
Позитивниот тренд на раст во ТИРЗ продолжува и во 2023 – зголемен извоз и нови работни места

ТИРЗ ја започнува годинава со позитивен тренд на извоз и зголемување на бројот на работни места, покажува редовната месечна анализа.
Компаниите во ТИРЗ во јануари реализирале извоз од 275,4 милиони евра што е највисоко ниво во последниве пет години. Споредено со јануари 2022 извозот е зголемен за 11%, односно е за 9% повисок од 2021, и за 45% и 15% повисок споредено со 2020 односно 2019 година.
Позитивниот тренд на раст продолжува и во однос на увозот. Компаниите во ТИРЗ во јануари оствариле увоз од 221 милиони евра. Тоа е за 8% повеќе споредено со истиот период во 2022, односно за 44% повеќе од јануари 2020 и за 15% повеќе споредено со 2019. Увозот во јануари 2021 бил повисок за 10%, покажува анализата.
Особено позитивен тренд на раст има кај нето извозот кој во јануари е 24,5%, што меѓу другото се должи на зголемените инвестициски активности во Зоните и зголемениот број на работни места.
Бројот на вработени во зоните во јануари достигна речиси 16,400 што е за 16% повисок од јануари 2022. Само во првиот месец од годинава во компаниите во зоните се отворени речиси 80 нови работни места. Инаку ТИРЗ ја заокружи минатата година со 2300 новоотворени работни места и највисок извоз досега од 3,7 милијарди евра, со што е 2022 е најуспешната година од постоењето на зоните.