Владата заедно со Министерстсвото за земјоделство, шумарство и водостопанство мора да ја затвори како прашање исплатата на долговите од винарската визба „Повардарие“ и винарницата со германски капитал „Гарланд Агрофуд“- (Стефанс винарија) и лозарите мора да ги добијат своите пари, порача денеска министерот за земјоделство, шумарство и водостопанство, Љупчо Николовски.

При тоа Николовски посочи дека е во постојна комуникација со раководството на „Поварадие“ и стечајниот управник на „Гарланд Агрофуд“  (Стефанс винарија), како и со лозарите и градоначалниците на Неготино и Кавадраци, со цел да се најде соодветно решение.

„Се трудиме да правиме притисок и да ги решаваме напластените проблеми каков што првенствено беше со винарницата ‘Повардарие’, која на лозарите им должеше близу четири милиони евра. Денеска вршевме инспекциски увид и констатиравме дека ‘Повардарие’ уште исплаќа и оти во овие два месеца се исплатени 200 илијади евра. Останува по долгот за 2015 и 2016 година да се доисплатат уште 500 до 600 илјади евра. Министерството координира да го направиме на некој начин тоа што може да го сториме како држава. Разговараме да ги мотивираме што побрзо да се најде решение за овој проблем зашто лозарите имаат побарувања од околу 30 милиони денари од винарницата ‘Стефани’ кои мора да бидат исплатени“, изјави министерот Николовски.

Веќе утре, како што што посочи министерот Николовски, е закажан состанок со градончалниците на Кавадарци и Неготино, со пратениците од тој регион и со претставници на лозарите, а пртетходно ќе има и состанок со стечајниот управник на винарницата „Стефани“ и со претставниците на банките.

Заврши јавниот повик за доделување државно земјоделско земјиште над 3 хектари. Во рамки на повикот пристигна 51 понуда од кои 39 понуди се со уредна докумениција и ги исполнија пропишаните услови, додека 12 од апликантите се одбиени поради неисполнување на условите во огласот. Понудениот вкупен инвестициски фонд на овие 39 прифатливи понуди е 15,5 милиони евра, соопшти Министерството за земјоделство.

Сите понуди што ги исполнија условите освен подигање на насади и одгледување на едногодишни култури, содржат и капитални инвестиции во објекти за примарна обработка на земјоделски производи како винарии, кланички капацитети, центри за преработка на овошје и зеленчук, откупни центри, млинови, оранжерии и други објекти тесно поврзани со земјоделско производство.

„Покрај инвестицискиот фонд, бизнис-планот на компаниите со понуди кои ги исполнија условите предвидува и отворање на околу 100-тина нови работни места во агросекторот. Преку ваквите огласи јасно се гледа заложбата на министерството и Владата за зголемување на капиталните и инфраструктурните инвестиции во земјоделството и руралниот развој, што ќе придонесат за економски развој на регионите и за отворање нови работни места“, изјави министерот Љупчо Николовски.

Од овие 39 понуди, за одредени локации има по еден понудувач, но за поактрактивните и по повеќе. Формалната обработка на понудите од страна на Комисијата формирана од Владата е завршена и во следниот период ќе следува електоронското јавно наддавање за парцелите, а потоа склучување на договорите, во кои ќе бидат вградени бизнис-плановите и изјавата заверена на нотар во којашто стои вкупната инвестиција што треба да биде реализирана. Обврската на оние кои ќе поминат на електронското јавно наддавање е во рок од 5 години да ја реализираат инвестицијата. МЗШВ и Државниот инспекторат за земјоделство активно ќе ги следат сите договори и нивната реализација.

Министерот Николовски посочи дека паралелно се подготвува и нов ваков инвестициски оглас врз основа на ослободени атрактивни парцели кои ќе бидат предмет или на редовен оглас или на инвестициски.

Инвестициите од ваков тип се од исклучително значење за производство на конкурентните земјоделски производи, решавање на откупот и на вишоците земјоделски производи. Во оваа насока МЗШВ континуирано работи на воспоставување соработка помеѓу примарните институции во земјоделството и руралниот развој и примарните производители и преработувачки капацитети.

Оперативниот план за активни програми и мерки за вработување и услуги на пазарот на трудот за 2018 година има високи 95 проценти реализација. Со него беа вкупно опфатени 6374 лица, од кои 3359 или 53 проценти беа млади лица до 29 години. Ова беше соопштено на прес-конференција во Владата каде што се обратија министерката за труд и социјална политика, Мила Царовска, и директорката на Агенцијата за вработување, Билјана Јовановска.

Царовска како посебно значајна ја потенцираше вклученоста на жените во активните програми и мерки што водат до намалување на невработеноста и зголемување на вработливоста.

„Оперативниот план за активни програми и мерки за вработување и услуги на пазарот на трудот за 2018 година претставува одличен пример за родова еднаквост, во него 54 %, односно 3456 лица од учесниците во активните програми и мерки за вработување беа жени, што за нас претставува посебен успех и голем придонес за поголема инкузивност на жената на пазарот на трудот“, изјави Царовска.

Интересот за учество во активните мерки и програми за вработување беше голем и од страна на невработените лица и од страна на работодавачите, особено за програмите и мерките кои водат до директно вработување, потенцираше директорката на Агенцијата за вработување на Република Македонија, Билјана Јовановска.

„Преку учество во програмата ‘Самовработување’, сопствен бизнис отворија 1191 лица, мерката Субвенционирање на плати овозможи да се вработат 759 лица, а преку учество во мерката Вработување и раст на правни субјекти беа вработени 347 лица. Во рамките на спроведувањето на Законот за вработување на инвалидни лица се доделуваа финансиски средства со кои се поттикнува вработувањето на инвалидните лица, при што беа доделени средства за вработување на 209 лица“, истакна Јовановска.

На прес-конференцијата беше посочено дека голем интерес имало и за обуките за стекнување вештини што се барани на пазарот на трудот, наменети за доквалификација на невработените лица. Една од најбараните била програмата „Практиканство“ и во неа се вклучија 1263 невработени лица до 34-годишна возраст. Одлични резултати покажала и програмата „Општинско-корисна работа“, во која учествувале 703 лица, кои обезбедуваат социјални услуги во 56 општини во државата, најмногу како образовни и лични асистенти.

Во насока на намалување на младинската невработеност, во 2018 година започнала имплементацијата на пилот-мерката Гаранција за млади. Во изминатата година во Гаранција за млади биле вклучени 5266 лица (2694 жени), од кои 1839 лица или 35 проценти се вработиле во период од 4 месеци по нивното евидентирање како невработени лица во агенцијата.