Економија
Трипуновски: Поради лошите политики на владата и Николовски, Македонија стана увозно зависна

Цветан Трипуновски, претседател на комисија на ВМРО-ДПМНЕ за земјоделство, шумарство и водостопанство на денешната дебата насловена „Важно е македонските земјоделци да ја хранат Македонија“ во рамки на кампањата „Важно е! Од тебе зависат промените“ зборуваше за тоа во каква состојба е земјоделството поради негрижата на власта, министерството и министерот.
-Изминативе 7 години со СДСМ на власта практично секоја година почнува со протести на различни категории на земјоделци ширум Република Македонија, тоа е затоа што СДСМ ветуваше живот, а донесе пекол на македонските земјоделци. Нема земјоделска гранка која што не е клекната на колена, македонското земјоделско производство не е десеткувано, односно Македонија стана увозно зависна комплетно речиси на храна. Ова значи дека и сточарите и полјоделците и градинарите и оризарите едноставно секоја гранка во Република Македонија мора спасот да го бара на протести затоа што владата, министерството, министерот-оној кој требаше да биде татко на земјоделците немаат слух за нивните проблеми односно немаат решение како земјоделците да имаат достоен живот, истакна Трипуновски.
Трипуновски во текот на своето обраќање се осврна и на големиот број протести на земјоделците каде посочи дека протестираа и јаболкарите, оризарите како и млекарите во Република Македонија.
-Сведоци сме кога јаболкарите протестираат и блокираат патишта, оризарите блокираат со денови на регионалниот пат Штип-Кочани, сведоци сме кога млекарите го истураат млекото по улиците и сведоци сме на оној протест кој го организираат земјоделците 2019 година кога Оливер Спасовски и министерот Николовски организираа хермелини за да го спречат и уништат тој земјоделски протест. Тоа беше нивната политика која што се однесува на оние земјоделци кои што треба да ја хранат Македонија, рече тој.
Тој истакна дека власта ја интересираат само личниот профит и бизнис интересот во четири очи, а за тоа говори и фактот што Република Македонија стана увозна зависна држава.
-Практично од она кое што го ветуваа не спроведоа ништо. Единствено ги интересира личниот профит и бизнис интересите во четири очи, а за земјоделците оние кои што треба да ја хранат Македонија и да извезуваме земјоделски производи едноставно не спроведоа ништо. За потсетување ако Македонија во минатото била извозно ориентирана и сериозен девизен прилив се слевало во нашиот буџет од извоз на земјоделски производи и нормално Македонија била снабдена со квалитетен здрав македонски производ, денеска гледаме дека Македонија е речиси комплетно увозна зависна. Еве еден податок 2022 година повеќе од 700 милиони евра се одлеале македонски девизи за увоз на храна, она што значи увоз на храна со сомнителен квалитет и увоз на храна која што македонските граѓани ја плаќаат со многу повисоки цени, а македонското производство е десеткувано односно е во исчезнување, вели Трипуновски.
На крај Трупиновски се осврна и на уште ден друг податокот кој покажува дека владата на СДСМ и ДУИ како и министерството водат лошата политика за земјоделството и земјоделците.
-Уште еден податок за лошата политика која ја води министерството односно владата предводена од СДСМ и ДУИ е тоа дека ако во минатото 2013-2014 година во Република Македонија во регистарот имало преку 100.000 регистрирано земјоделци, денеска имаме помалку од 60. 000 тоа е конкретен показател дека во Република Македонија земјоделството и категорија македонски земјоделец се во сериозно исчезнувањ, додаде Трипуновски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Перински: Нови 116 милиони денари за поддршка на развојот на најмалку развиените региони

Денеска, на 40. седница на Советот за рамномерен регионален развој, со која претседаваше министерот за локална самоуправа, Златко Перински, беа разгледани и усвоени предлог одлуките за распределба на средства од Програмата за рамномерен регионален развој. Практично, со ова заврши првата фаза за распределба на средствата од буџетската Програма за рамномерен регионален развој и одлуките ќе бидат доставени до Владата на усвојување, со што ќе се овозможи финансирање на 47 проекти во вкупна вредност од приближно 116 милиони денари.
Проектите што ќе бидат поддржани се насочени кон развојот на планските региони, подрачјата со специфични развојни потреби, селата и урбаните подрачја. Средствата се распределуваат според степенот на развиеност на регионите, при што најголема поддршка добиваат регионите со најнизок степен на развој.
„Оваа програма е од исклучително значење за нашата држава. Соодветната распределба на финансиските средства ќе придонесе за зајакнување на локалните заедници, унапредување на инфраструктурата и создавање подобри услови за живот на граѓаните“, истакна министерот Перински по седницата на Советот кој практично е координативно тело меѓу надлежните министерства што имаат буџетски програми со влијание на регионалниот развој, но обезбедува и координација со Советите за развој на планските региони, каде членуваат градоначалниците од соодветниот плански регион.
Економија
Огњен Лазиќ ја презема функцијата генерален директор на Пивара Скопје

Од 1 јуни, нов генерален директор на Пивара Скопје е Огњен Лазиќ. Тој доаѓа на местото на Душан Митрев, кој е унапреден на нова позиција во рамки на Coca-Cola HBC групацијата.
Новиот генерален директор Лазиќ доаѓа од позицијата директор за маркетинг и комерцијална извонредност во „Бамби“, Србија. Има богато искуство во индустријата за пијалаци и финансиски менаџмент, како и во управување со развој на стратегии за раст на бизнисот.
„Голема чест е да се преземе раководење на компанија со едновековна традиција, која зад себе има препознатливост, стабилност, тим со искуство, но и огромен потенцијал за раст. Заедно со тимот ќе работиме на унапредување на ефикасноста, воведување иновации во работата, проширување на нашето портфолио и уште поголема поврзаност со консументите. Целта е јасна, да останеме вистински 24/7 партнер за пијалаци и прв избор на пазарот“ изјави Лазиќ.
Лазиќ претходно бил директор за финансии на „Бамби“ од 2018 година, а исто така работел и во индустријата за пијалаци и како консултант во ЕУ. Лазиќ е препознатлив по својот иновативен пристап во менаџирањето, како и по креирање ефикасни синергии помеѓу различни сектори и тимови, со цел подобрување на резултатите и оптимизација на процесите.
Неговата експертиза и постигнати резултати ќе бидат силна основа за понатамошен раст на Пивара Скопје, со фокус на иновации во бизнисот, унапредено корисничко искуство и поттикнување на развој на таленти во рамки на компанијата.
Пивара Скопје останува посветена на својата мисија, да креира 24/7 портфолио за секој ден од денот слушајќи ги потребите на консументите. Компанијата продолжува да работи на јакнењето на позициите на пазарот, градењето највисоко ниво на задоволство кај потрошувачите, како и со реализацијата на бројни општествено-одговорни проекти кои се една од нејзините главни одлики. Пивара Скопје е дел од глобалните групации Coca-Cola HBC и Heineken N.V.
ПР
Економија
Божиновска: Соларни покриви, стабилни сметки, Македонија гради енергетска иднина за сите

Македонија е подготвена за нов енергетски модел – праведен, транспарентен и социјално одговорен. Тоа беше пораката на денешниот настан на кој беше промовиран извештајот на Центарот за развој на ОЕЦД: „Цени на енергија и субвенции во Западен Балкан: Реформи за фер и зелена иднина“, на кој се обрати министерката за енергетика, рударство и минерални суровини, Сања Божиновска.
Извештајот, подготвен со поддршка на меѓународни партнери, дава јасен преглед на фискалните трошоци поврзани со субвенционирањето на енергијата, со посебен фокус на периодот на енергетската криза во 2021–2022 година.
Според анализата, Македонија во периодот 2018–2023 издвојува сериозни средства, директна поддршка за енергетскиот сектор. Како што истакна министерката Божиновска, најголем дел од овие средства биле наменети за амортизирање на ценовните шокови и заштита на животниот стандард на граѓаните во време на глобални кризи. Но, како што укажува и извештајот, постојниот модел на униформни субвенции често придонесува за поголем трансфер кон домаќинствата со повисока потрошувачка, наместо кон ранливите категории.
„Со новиот Закон за енергетика направивме клучен исчекор – преминуваме од универзална поддршка кон таргетирана социјална заштита, базирана на реалните услови на домаќинството, а не само на потрошувачката,“ изјави Божиновска, најавувајќи дека во соработка со Министерството за социјална политика се воспоставува и методологија за мерење на енергетската сиромаштија.
Министерката го потенцираше и системот на блок-тарифи што се применува од јули 2022 година, но посочи на неговите ограничувања: „Семејства со повеќе членови или лица со хронични заболувања, кои имаат реална потреба од повисока потрошувачка, се изложени на повисоки цени и покрај нивниот социјален статус.“
Во панел-дискусијата со клучни чинители од институциите, граѓанскиот сектор и меѓународни партнери, беа отворени прашањата за либерализацијата на пазарот, финансирањето на енергетската транзиција и потребата од иновативни решенија и праведна распределба на јавните средства.
Законот за енергетика предвидува и нови механизми за заштита на ранливите потрошувачи – како директна финансиска поддршка, забрана за исклучување од мрежа во зимски услови и субвенции за енергетска ефикасност. Дополнително, се воведува и можност секој потрошувач да го смени својот снабдувач за струја во рок од 48 часа, без трошоци, што го отвора пазарот за фер конкуренција.
„Овој закон не е само техничка регулатива – тој е одраз на нашата решеност да изградиме енергетски систем кој ќе биде економски одржлив, социјално праведен и еколошки одговорен. Нашата визија е јасна – Македонија со соларни панели на покривите, електрични возила на патиштата и стабилни сметки за струја,“ изјави Божиновска, потенцирајќи дека токму извештаи како овој на ОЕЦД се алатка за подобри политики, со јасна цел – фер транзиција во која никој нема да биде изоставен.
Настанот ги обедини носителите на политики, претставници на граѓанскиот сектор и меѓународни организации во заедничка заложба за фер и зелена енергетска иднина на Македонија.