Координациското тело за финансиска едукација и финансиска инклузија, со кое раководи Народната банка, а во кое членуваат претставници на сите финансиски регулатори – Народната банка, Министерството за финансии, Комисијата за хартии од вредност (КХВ), Агенцијата за супервизија на капитално финансираното пензиско осигурување (МАПАС) и Агенцијата за супервизија на осигурувањето (АСО), го усвои кодексот на добри практики за финансиска едукација. Со ова продолжуваат активностите за спроведување на првата национална стратегија за финансиска едукација и финансиска инклузија, усвоена во јули годинава.

„Со оглед на сѐ помногубројните иницијативи за финансиска едукација, како и растот на бројот на вклучени субјекти од јавниот, приватниот и од граѓанскиот сектор, се јави потребата од јасно дефинирање на основите и начините за вклучување на овие субјекти и нивна координација и обезбедување ефективни едукативни програми што се во интерес на населението“, велат од Народната банка.

Кодексот ги утврдува принципите што треба да се применуваат при спроведување на финансиската едукација на населението во земјата од страна на сите субјекти од јавниот, приватниот и од граѓанскиот сектор, кои ќе бидат вклучени во овој процес. Во него се наведени посакуваните цели, принципите што треба да се применуваат при спроведувањето на активностите за финансиска едукација, опфатот на активностите, добрите практики во однос на содржините и обучувачите за финансиска едукација, како и начинот на информирање на регулаторите и оценување на активностите.

Кодексот се заснова врз најдобрите светски искуства и препораките на ИНФЕ-ОЕЦД и има цел да овозможи промоција и изведување висококвалитетна и непристрасна финансиска едукација од страна на сите вклучени субјекти. Од Народната банка веруваат дека со него ќе се зајакне координираниот пристап за финансиска едукација, што ќе придонесе за подобри и побрзи резултати на национално ниво.

Во современите услови на динамичен финансиски систем финансиската едукација станува сѐ попотребна за сите возрасти и за сите социјални слоеви од населението. Од аспект на институциите и субјектите од приватниот и граѓанскиот сектор што можат да придонесат во оваа област, финансиската едукација станува дел од општествената одговорност и значаен аспект во градењето на нивната репутација. Оттаму, координираниот пристап на дејствување ќе придонесе за зголемена ефикасност и ефективност на дејствување.

Финансиските регулатори ги повикуваат сите субјекти од приватниот и граѓанскиот сектор што остварувале или се заинтересирани за остварување активности за финансиска едукација да се запознаат со кодексот, кој е достапен на следнава врска: https://www.nbrm.mk/kodeks-fin-edu.nspx и да се приклучат кон иницијативата за координиран пристап.