Економија
Анхоч го отвори најексклузивниот продажен салон за ИТ, гејминг и аудио опрема во Македонија

Најголемата македонска ИТ компанија Анхоч го отвори својот најнов, модерен продажен салон – Анхоч Дискавери (Anhoch Discovery) во Рамстор Мол во Скопје.
Овој салон на 500 квадратни метри ќе стане вистински рај за сите љубители на ИТ, гејминг и аудио опрема, рекоа претставниците на компанијата на отворањето.
На свеченото отворање присуствуваа стотици посетители кои ги видоа новитетите што ги нуди Анхоч Дискавери.
Анхоч докажа зошто е лидер во ИТ секторот, претставувајќи продажен салон со врвен, современ дизајн.
Новиот салон не само што е најголем и најексклузивен, туку е и опремен со иновации кои го прават уникатен.
Автоматските електронски цени, базирани на еколошки принципи, се само дел од новитетите кои Анхоч ги применува во своите продажни простори.
Анхоч Дискавери располага со посебна гејминг зона и аудио соба, дизајнирани да ги задоволат сите вкусови и потреби.
Гејминг зоната беше магнет за младите, кои ги тестираа најновите гејминг уреди од светските брендови.
Исто така она што можеше да се забележи во најновиот Анхоч продажен салон беше и ексклузивниот Нинтендо штанд кој со огромно задоволство ни го испрезентираа.
На ова место ќе можете да пробате една од трите игри: Super Mario Bros Wonder, Mario 3D World + Bowsers Fury, како и легендарната Mario Kart 8 Deluxe! И тоа на Nintendo Switch OLED.
Штандот е официјално поддржан од Nintendo EU и е наменет да го доведе Nintendo брендот поблизу до купувачите во Македонија.
Анхоч како овластен продажен партнер на Nintendo, создава место каде што не само што ќе може да се искуси оваа фантастична конзола, туку и да може да си го надградите свич-от, со еден од официјалните додатоци по најповолни цени.
Дополнително, за аудиофилите, аудио собата беше вистинско уживање, нудејќи им шанса да ја искусат моќта на најразлични звучници и аудио системи во пријатен амбиент.
Анхоч продолжува со својата посветеност кон професионалната услуга и широката понуда на квалитетни производи.
Задоволството на клиентите е приоритет на компанијата, што се потврдува со секој нов чекор што го преземаат.
Анхоч Дискавери (Discovery) е уште еден доказ за тоа, нудејќи им на клиентите единствено искуство и врвна услуга.
Анхоч е најголемата Македонска ИТ компанија со 30 годишно присуство на пазарот.
Со 20 продажни локации и повеќе од 150 вработени низ цела Македонија, компанијата продолжува да го диктира темпото во ИТ секторот, нудејќи најголем избор на лаптопи, таблети, смартфони и останата ИТ опрема.
Анхоч Дискавери е новиот стандард за ИТ, гејминг и аудио опрема во Македонија.
ПР текст
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Цените на нафтата се искачија над 66 долари

Цените на нафтата денес се искачија над 66 долари на меѓународните пазари, при што водечките производители објавија само умерено зголемување на понудата кон крајот на годината и индикации за стабилна побарувачка за гориво во САД.
На лондонскиот пазар, цената на барел попладне беше за 1,04 долари повисока од вчерашното затворање, на 66,49 долари. На американскиот пазар, барелот се тргуваше по цена повисока за 1,13 долари, на 62,86 долари.
Инвеститорите беа изненадени од објавата на почетокот на неделата од водечките производители дека имаат намера само умерено да ја зголемат понудата кон крајот на годината.
Групата од осум членки на Организацијата на земјите извознички на нафта (ОПЕК) и нејзините сојузници објавија во неделата дека ќе испумпаат само дополнителни 137.000 барели дневно на пазарот во ноември.
Тие веќе ја зголемија понудата за 411.000 барели дневно во септември.
„Осумката“ забележа дека изгледите за глобалната економија се „стабилни“ и дека пазарните индикатори се „моментално здрави“, судејќи според „ниското ниво на залихи“.
Пазарите очекуваа октомври да означи само краткорочен одмор во забрзаната нормализација на залихите.
Економија
Гувернерот Славески: Финансиската едукација и дигиталната писменост се неопходни во услови на зголемени ризици и дигитализација

На годишниот состанок на регионалниот проект за техничка помош во областа на финансиската едукација, поддржан од ОЕЦД и Министерството за финансии на Холандија, што се одржува во Сараево во организација на Централната банка на Босна и Херцеговина, гувернерот на Народната банка, д-р Трајко Славески, истакна дека во услови на зголемени економски ризици и брза дигитализација, финансиската едукација и дигиталната писменост се неопходни за користење на предностите од финансиските услуги и за обезбедување сеопфатен раст.
„Во време кога инфлацијата расте и кога има зголемени каматни стапки и широка достапност на дигиталните финансиски услуги, се јавува нужна потреба од јакнење на финансиската и дигиталната писменост. Дигитализацијата носи нови можности, како поефикасни и поевтини финансиски услуги, но истовремено создава и нови ризици – од онлајн измами, прекумерно задолжување, до загрозување на личните податоци“, порача гувернерот.
Тој зборуваше на панел-дискусијата на тема „Унапредување на финансиската едукација за посилен раст“, на која учествуваа гувенерите на централните банки на Босна и Херцеговина и Молдавија, заменик-гувернерката на Грузија и вицегувернерот на Хрватска. Разговорот беше насочен кон улогата на финансиската едукација во зајакнувањето на економскиот раст, како и во справувањето со новите ризици предизвикани од дигитализацијата на финансиските услуги.
Гувернерот Славески нагласи дека посебно внимание треба да им се посвети на младите и на потрошувачите со ограничено финансиско искуство. „Зголемувањето на финансиската и дигиталната писменост е од огромна важност за граѓаните и за претприемачите за да можат да ги препознаат придобивките, но и ризиците од новите дигитални финансиски производи и услуги. Само така можеме да ја искористиме дигитализацијата како алатка за поголема вклученост и стабилен економски раст“, додаде тој.
Во рамките на зголемувањето на вклученоста, Народната банка ги спроведува и активностите на иницијативата „Кодекс за финансирање на жените претприемачи“ (WeFi Code), како национален координатор, заради намалување на родовиот јаз во пристапот до финансии и поддршка на женското претприемаштво. Во оваа иницијатива, покрај Народната банка, се вклучени 18 институции од јавниот, приватниот и граѓанскиот сектор, меѓу кои шест банки и две штедилници.
Народната банка со своето учество ја потврди својата заложба за унапредување на финансиската едукација, дигиталната писменост и вклученоста, во услови на брзи економски и технолошки промени.
Економија
Божиновска на средба со Плаколм и раководството на ЕВН Македонија: Компанијата покажува како странските инвестиции можат да придонесат кон стабилност и дигитализација на енергетскиот систем

Министерката за енергетика, рударство и минерални суровини, Сања Божиновска, оствари средба со австриската сојузна министерка за Европа, интеграција и семејство, Клаудија Плаколм, и со раководството на ЕВН Македонија, во рамки на работната посета што австриската делегација ја реализираше во земјава.
На средбата присуствуваше и Мартин Памер, амбасадор на Република Австрија во Република Македонија, заедно со претставници од австриската амбасада.
Фокусот на разговорите беше насочен кон успешната соработка меѓу Министерството за енергетика и компанијата ЕВН Македонија, како пример за одговорно и партнерско делување меѓу државата и енергетскиот сектор.
Божиновска истакна дека ЕВН Македонија е значаен партнер во енергетската транзиција на земјата, посочувајќи дека примерот на компанијата покажува како странските инвестиции можат да придонесат кон стабилност, модернизација и дигитализација на енергетскиот систем.
„ЕВН Македонија е пример како странски инвеститор може да соработува со државните институции на начин што создава додадена вредност – не само за економијата, туку и за општеството“, нагласи Божиновска.
Во рамки на посетата, делегацијата имаше можност да се запознае со технолошките и организациските достигнувања на компанијата, меѓу кои и современиот диспечерски центар за дигитално управување со дистрибутивната мрежа на национално ниво.
Австриската министерка Клаудија Плаколм изрази задоволство од постигнатото ниво на енергетска соработка меѓу двете земји и од синергијата меѓу јавниот и приватниот сектор во Северна Македонија, истакнувајќи дека таа соработка е позитивен пример за поширокиот регион.
Двете министерки потврдија дека постои заеднички интерес за продолжување на размената на искуства и добри практики, со фокус на одржлив енергетски развој и зелена транзиција.