Еднакви можности во приватниот сектор, следење на европските трендови за зголемување на уделот на жените во економијата, постигнување повисоки работни позиции во корпоративниот свет, се само дел од аспектите, кои, доколку се применат, ќе имаат позитивно влијание врз севкупната економија, беше истакнато денес на конференцијата „Женско претприемаштво и предизвиците за интеграција во ЕУ“ по повод Светскиот ден на женското претприемаштво.

На панел-дискусијата посветена на важноста на граѓанските организации за ЕУ-интегративните процеси во полето на женското претприемаштво, претседателот на Сојузот на стопанските комори, Данела Арсовска, зборуваше за потребите и предизвиците во развојот на женското претприемаштво, обидите за воспоставување стратешки систем, кој ќе биде во функција на поинтензивно вклучување на жените на пазарот на труд, особено на високораководни позиции, но и со овозможување на неопходната поддршка за баланс меѓу приватниот и професионалниот живот.

„Врз основа на искуствата на брзорастечките економии – зајакнувањето на економската позиција на жените може да биде клучно во менувањето на растот на економската моќ на земјата. Потребна е стратегија за обезбедување еднакви можности за жените, особено на високи корпоративни позиции, бидејќи тие сочинуваат голем дел од вработеното и работноспособно население, но бидејќи не им се овозможени еднакви можности за напредување, често се најмногубројни во пониски или на средно ниво раководни позиции. Според најновите истражувања, жените во Југоисточна Европа, слично како и на Далечниот Исток, се соочуваат со многу предизвици поврзани со нивната очекувана традиционалната родова улога во општеството, која влијае врз нивната економска независност. Се проценува дека 30 отсто од претприемачите во Европа се жени, а овој процент во ЈИЕ изнесува меѓу 15 и 30 проценти“, изјави Арсовска и додаде дека постојано и упорно се апелира дека за разлика од квотите што постојат во политиката и во јавниот сектор, во приватниот сектор нема загарантирани квоти и секој треба да се избори на пазарот во согласност со својата компетентност и квалитет, но постои нерамноправна борба бидејќи да бидеш еднаков значи да бидат обезбедени и еднакви можности за развој.

Просекот во ЕУ на бројот на жени што учествуваат на пазарот на труд е 63,5 со тенденција до 2020 година да се зголеми на 75 проценти. Според податоците на Светската банка, евидентиран е тренд на константно намалување на бројот на жени што учествуваат на пазарот на труд, во 2013 имало 44 проценти, а во 2017 година 42 процента, а од нив на високи раководни позиции се под 2 процента, што е поразителен факт.