Економија
Бектеши: Секоја нова инвестиција во хотелите привлекува повеќе туристи

Министерот за економија, Крешник Бектеши, заедно со Комисијата за категоризација на угостителските објекти, која се состои од 13 члена, претставници на разни институции, ја следеше постапката за категоризација на новиот хотел „Александар 2“ во Скопје, кој во Mинистерство за економија аплицирал за категоризација од 4 sвезди.
Министерот Бектеши во текот на инспекцијата рече дека неговата цел е информирањето на граѓаните за овој комплексен процес во областа на туризмот, односно што треба да направат хотелиерите за да ги добијат посакуваните ѕвезди од нивна страна.
„Угостителството денес се смета за еден од главните економски придонесувачи и во светски рамки и во националните економии, што се однесува до капиталните инвестиции, додадената вредност, вработеноста и даночните придонеси. Затоа, важно е да се каже дека зголемувањето на бројот на хотели во земјата, особено на луксузните, докажува дека политиката на Министерството за економија за создавање поволни услови за туристите ќе биде на прво место“, изјави Бектеши.
Сопственикот на хотелот „Александар 2“, Спиро Чорогунов, му се заблагодари на министерот Бетеши за неговата работна посета и рече дека овие достигнувања во угостителскиот сектор се резултат на визионерските политики на Министерството за економија и на Владата.
„Економијата е во пораст, сè повеќе туристи го посетуваат главниот град, како и целата држава, и секоја нова инвестиција е придонес кон економијата и доказ за светот дека и ние паралелно со другите земји се движиме напред“, рече Чорогунов.
Министерот Бектеши рече дека оваа година предвреме е постигната целта да имаме 1 милион туристи и 3 милиони ноќевања, а зголемувањето на бројот на туристи и зголемувањето на бројот на хотели во земјата доведува до раст на економијата воопшто и подобар стандард на живеење за сите.
Во Македонија има околу 220 хотели, од кои со 5 звезди се 15, со 4 ѕвезди 70 хотели, со 3 ѕвезди 85 хотели, а хотели со две ѕвезди има 34 и со една ѕвезда 16.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Исплатени 99.743.746,00 денари кон 1.865 лица за предадени јаболка

Денеска се исплатија 99.743.746,00 денари кон 1.865 лица од подмерка 1.9 за јаболка предадени кај регистрирани откупувачи или регистрирани преработувачки капацитети, од Програмата за финансиска поддршка во земјоделството за 2024 година, извести Министерството за земјоделство.
Од таму најавуваат дека продолжува поддршката кон производителите на јаболка.
Економија
УЈП со повик: Платете го веднаш достасаниот данок по ДЛД-ГДП и избегнете присилна наплата

Управата за јавни приходи ги повикува сите даночни обврзници, кои во законскиот рок не ја платиле даночната обврска по ДЛД-ГДП 2024, да го исполнат својот даночен долг.
Во согласност со евиденцијата на УЈП, 3.155 даночни обврзници ја немаат намирено разликата за доплата на данокот на личен доход утврдена во годишната даночна пријава за данокот на личен доход (ДЛД-ГДП) за 2024 година, што требаше да се исполни во законскиот рок до 30 јуни.
„Во следниот период УЈП ќе премине кон опоменување и присилна наплата на достасаните неплатени долгови по овој основ, што ќе доведе до дополнителни трошоци по основ на камата за задоцнето плаќање од 0,03 % дневно и еднократна посебна такса во постапка на присилна наплата“, информира УЈП.
Дополнителни информации се објавени на страницата на УЈП, во делот плаќање даноци на следниот линк http://www.ujp.gov.mk/mk/plakjanje.
Економија
Меџити: Поддршка со 227 милиони денари за 43 проекти во 33 општини

Министерството за животна средина и просторно планирање денеска ги потпиша договорите за реализација на 43 капитални проекти во 33 општини во државата.
За овие проекти се обезбедени над 227 милиони денари директна финансиска поддршка од Министерството, со што се овозможува имплементација на конкретни решенија во областа на канализацијата, водоснабдувањето и управувањето со водните ресурси.
„Убеден сум дека ова е најправилниот и најефикасен модел на соработка – директно партнерство меѓу Владата и општините, со цел да им донесеме на граѓаните конкретни придобивки“, изјави министерот за животна средина и просторно планирање, Изет Меџити.
Тој исто така ја потенцира важноста од навремената и квалитетна реализација повикувајќи на одговорност и посветеност од страна на сите општини.
„Немаме време за губење. Секој ден што ќе го добиеме во овој процес е еден ден повеќе во служба на граѓаните“, изјави Меџити нагласувајќи дека преку ова партнерство се поставуваат нови стандарди во справувањето со инфраструктурните и еколошките предизвици.