Економија
Бектеши: Со прогласување кризна состојба во енергетскиот сектор веднаш почнуваме со мерки за стопанството и домаќинствата

„Како Влада, но и како Министерство за економија, секојдневно сме во комуникација со сите претставници на енергетскиот сектор во нашата земја сѐ со цел да се креираат мерки што ќе ја ублажат енергетската криза не само во секторот домаќинства туку и во дел од индустријата. Индустријата е многу важен дел во економијата имајќи ги предвид бројот на вработени, буџетот и растот на економската активност. Наша цел е нашите компании да бидат уште поконкурентни на европскиот и на светските пазари со мерките“, рече министерот за економија, Крешник Бектеши, по средбата со претседателот на Македонската енергетска асоцијација (МЕА), Кочо Анѓушев, на која присуствуваа и претседателот на Регулаторната комисија за енергетика, Марко Бислимовски, директорот на НЕР. АД Скопје, Бајрам Реџепи, директорот на ЕСМ, Васко Ковачевски, заменик-министерот за транспорт и врски, Беким Реџепи, и други претставници.
На состанокот се дискутира за можните мерки и чекори што ќе ги преземе Владата за излез од енергетската криза.
Министерот Бектеши најави дека минатата недела Владата ги прифатила предлозите на Стопанската комора и тие биле разгледани од претставници на Владата и од сите институции, вклучително и енергетските компании и Регулаторната комисија за енергетика.
Бектеши нагласи дека повеќето од мерките се прифатени и веднаш ќе се спроведат.
„Минатата недела како Влада добивме писмени предлози од Стопанската комора, кои беа разгледани од претставници на Владата на сите институции, вклучително и енергетските компании, а беа разгледани и во Регулаторната комисија за енергетика. Повеќето од мерките се прифатливи и ќе почнат да се спроведуваат веднаш, односно од почетокот на август, кога ќе се прогласи состојба на енергетска криза, Владата ќе може да преземе соодветните одлуки за помош на стопанството“, изјави министерот Бектеши.
Исто така, министерот Бектеши повтори дека ЕСМ преку министерствата за финансии и економија од ЕБРД обезбедило 100 милиони евра за зголемување на капацитетот на ЕСМ за јаглен, мазут и електрична енергија.
„Во делот на менаџирањето на ситуацијата и подготовките што се прават од страна на институциите, ние веќе најавивме дека ЕСМ преку министерствата за финанси и економија веќе се обезбедени 100 милиони евра од страна на ЕБРД за да се зголеми виктноста на ЕСМ во делот на набавка на мазут, на јаглен, но и електрична енергија. И тоа веќе е донесено како одлука во управниот одбор на ЕБРД и за кратко ќе се потпише договорот. 1,1 милион тони веќе се обезбедени за потребите на РЕК ‘Битола’, 500 илјади тони за ‘Осломеј’, значи нашите очекувања се дека РЕК ‘Битола’ од почетокот на октомври ќе работи со трите блока, ‘Осломеј’ ќе работи со целосен капацитет, имајќи предвид дека има само еден блок и веќе почна испораката на мазут од Грција за потребите на ТЕЦ ‘Неготино’, која ќе почне со работа, првично со првиот котел, а во меѓувреме ќе може да се стави функција и вториот, сѐ со цел да може да се снабдува, првично универзалниот снабдувач, во овој случај ‘ЕВН хоме’, за потребите и потрошувачката на домаќинствата и малите потрошувачи“, рече министерот за економија Крешник Бектеши.
На крајот, министерот Бектеши ја повика опозицијата да помогне да се надмине кризата и да не кочи постојано бидејќи тоа не им служи на граѓаните.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Николоски: Голем раст на градежништвото и транспортот

Бруто домашниот производ порасна за 3.4% во април, мај и јуни. Особено ми е драго што секторите градежништвото, транспорт и складирање силно растат! Тие се двигатели на македонската економија! Во вториот квартал секторот градежништво порасна за 7.3%, објави вицепремиерот и министер за транспорт Александар Николоски на својот фејсбук профил.
„Голем раст на градежништвото, транспортот и складирањето.
Премиерот Христијан Мицкоски објави одлични вести за македонската економија – во месеците април, мај и јуни бруто домашниот производ порасна за 3.4% . Особено ми е драго што секторите градежништвото, транспорт и складирање силно растат! Тие се двигатели на македонската економија!
Во вториот квартал секторот градежништво порасна за 7.3%, уште посилен раст од тој во првиот квартал од 7.1%, додека секторот транспорт и складирање порасна за 6.0% .
Со засилената активност во делот на изградба на патишта, инвестиции во железници и проекти од локално значење растот во третиот квартал ќе биде уште посилен благодарение на вредните работници кои работат во секакви временски услови и јасните политики и стратегија на Владата и Министерството за транспорт.
Ја градиме Македонија“, напиша вицепремиерот Николоски.
Економија
Славески од Глобалниот форум на АФИ: Финансиската вклученост е предуслов за одржлив раст и за стабилност

„Секој човек има право на фер и квалитетни финансиски услуги, а финансиската едукација е клучот за стабилен систем и за заштита на граѓаните“ – порача гувернерот на Народната банка, д-р Трајко Славески, на Глобалниот форум за политики на Алијансата за финансиска инклузија (АФИ), којшто се одржува во Намибија.
Во своето воведно обраќање пред регионалната иницијатива за Источна Европа и Централна Азија (ECAPI), гувернерот нагласи дека финансиската вклученост претставува темел на сеопфатниот економски раст и благосостојбата на општествата. „Само финансиски писмени граѓани можат да носат исправни одлуки за штедење, задолжување и за инвестирање, а со тоа придонесуваат и за стабилноста на целиот финансиски систем“, рече Славески.
Тој нагласи дека дигитализацијата и финтек-иновациите отвораат огромни можности за поширок пристап до финансиски услуги, но носат и нови ризици – како што се нови типови измами, злоупотреби на лични податоци и ризик од презадолжување на домаќинствата. „Во дигиталната ера е неопходно развивање ефикасни иницијативи за финансиска едукација и алатки за различни целни групи – од младите до постарите генерации“, истакна гувернерот.
Во обраќањето тој се осврна и на активностите на Народната банка во областа на финансиската вклученост. Посочи дека нашата земја оваа година стана членка на Единствената област за плаќања во евра (СЕПА), што ќе овозможи побрзи, поевтини и посигурни трансакции за граѓаните и за компаниите. Покрај тоа, се работи на воведување основна сметка за плаќање со фиксeн и пристапeн надоместок, наменета особено за ранливите категории граѓани. „Намалувањето на банкарските надоместоци и воведувањето нови механизми за заштита на потрошувачите се важни чекори за повисока вклученост“, нагласи Славески, додавајќи дека во подготовка е и втората Национална стратегија за финансиска едукација и финансиска инклузија.
„Да се биде дел од големото семејство на АФИ за нас претставува и чест и обврска за постојана размена на искуства и знаења. Народната банка и во иднина ќе биде целосно посветена на овој процес“, истакна гувернерот, изразувајќи благодарност за поддршката и соработката со АФИ и со институциите од регионот. На Глобалниот форум, заедно со гувернерот, учествуваат и главната економистка Анета Крстевска и советничката на гувернерот Весна Стојчевска.
Гувернерот Славески учествуваше и во панел-дискусијата на Глобалниот форум за политики на Алијансата за финансиска инклузија (АФИ), посветена на зголемувањето на вклученоста на жените на пазарот на труд. Во своето излагање, Славески нагласи дека сеопфатниот раст е незамислив без родова еднаквост и еднакви економски можности. „Според Глобалниот извештај за родовиот јаз за 2024 г., иако разликите во пристапот до образованието и здравството речиси исчезнаа, најголемиот јаз останува во економската и политичката застапеност на жените“, истакна тој, повикувајќи на проактивни светски политики. Воедно, тој ги претстави активностите на Народната банка во оваа област, меѓу кои и улогата на институцијата како национален координатор за спроведување на Кодексот за финансирање на жените претприемачи (We Finance Code − WeFi Code) – светска рамка за затворање на родовиот јаз во финансирањето на женските бизниси, поддржана од Светската банка, ЕБОР и од други меѓународни партнери.
Членството на Народната банка во Алијансата за финансиска инклузија е со поддршка на Европскиот фонд за Југоисточна Европа (ЕФСЕ) и Европската банка за обнова и развој (ЕБРД).
Економија
Дурмиши: Преку мерката за зелени инвестиции отворени се речиси 400 работни места во приватниот сектор

Министерот за економија и труд, Бесар Дурмиши, заедно со директорот на Агенцијата за вработување, Сељатин Бељули, и постојаниот претставник на УНДП, Армен Григорјан, денеска го посети ресторанот „Ксантика“, кој е еден од успешните примери на зелени инвестиции и создавање нови работни места.
За време на посетата министерот истакна дека преку Мерката 8 – „Создавање нови работни места преку зелени инвестиции“, досега се отворени речиси 400 нови работни места во приватниот сектор.
„Досега 228 компании инвестираа во зелени решенија – фотонапонски панели, енергетска ефикасност и модерна опрема. Компаниите вложија над 200 милиони денари сопствени средства, што е повеќе од државната поддршка. Тоа покажува дека политиката на Владата не е само субвенција, туку катализатор за приватен капитал и за зелена економија,“ рече министерот Дурмиши.