Економија
Битиќи на Комисијата за јавно-приватен дијалог: Во приватниот сектор гледаме партнер за заедничко решавање на предизвиците

Заменик-претседателот на Владата задолжен за економски прашања, координација на економските ресори и инвестиции, Фатмир Битиќи, во својство на копретседавач на Комисијата за јавно-приватен дијалог, која се одржува на редовно квартално ниво, изјави дека овој дијалог најдобро го отсликува пристапот на оваа Влада, која во приватниот сектор гледа еден партнер со кој на транспарентен начин се дискутира за предизвиците со кои тие се соочуваат и секако за изнаоѓање начин за нивно решавање.
На седницата присуствува заменик-министерот за труд и социјална политика, Енвер Хусејин, заменик-министерот за економија, Зоран Маневски, заменик-министерот за финансии, Филип Николоски, и претседатели, заменик-претседатели, извршни или оперативни директори на Стопанската комора на Македонија, Сојузот на стопанските комори, Стопанската комора на северозападна Македонија и од МАСИТ.
Темите за кои дискутираа присутните беа увоз на работна сила, Законот за работните односи, даночни реформи, енергетската криза и Закон за заштита на потрошувачите.
На првата точка од страна на коморите беше доставена анализа/согледување од аспект на тоа кои дејности имаат потреба, какви квалификации треба да поседуваат работниците, при што се презентира и нивното гледиште дали има потреба да се зголеми квотата за вработување странци. Економските комори дадоа нивно изјаснување дали имаат административни бариери и што најмногу им одзема време.
Во врска со Законот за работните односи, за што е надлежно Министерството за труд и социјална политика, заменик-министерот Енвер Хусеин рече дека во тек е подготовка на новиот Закон за работните односи, од вкупно девет јавни расправи, одржани се осум, две во Скопје и по една во Струмица, Штип, Битола, Кичево, Гостивар и во Кавадарци, каде што биле поканети и присуствувале и синдикатите и здруженијата на работодавците, при што Министерството ќе ги земе предвид сите забелешки.
Во делот на даночните реформи, заменик-министерот за финансии, Филип Николоски, даде осврт на данокот на солидарност и за намалување на сивата економија, поточно со кои начини и механизми ќе се ублажат даночните шокови врз бизнис-секторот.
На точките за енергетската криза и Законот за заштита на потрошувачите, што е под надлежност на Министерството за економија, заменик-министерот Зоран Маневски ја презентира динамиката на имплементација на предвидените мерки, да се дозволи компаниите што се на регулираниот пазат да можат вишоците да ги пласираат во мрежата, односно да се овозможи откуп.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Германија тврди дека трговската војна би била штетна и за САД

Италијанската премиерка, Џорџа Мелони, предупреди на опасностите од трговската војна со Соединетите Американски Држави, а сега слично предупредување доаѓа и од Германија.
Германија, најголемата европска економија и трета по големина во светот според податоците на Светската банка, предупредува дека реципрочните тарифи ќе бидат штетни за сите инволвирани страни пред објавувањето на новите царини подоцна денеска од страна на Трамп.
„Трошоците за трговска војна не паѓаат само на едната страна, туку може да станат скапи за двете страни“, рече владиниот портпарол Штефен Хебестрајт.
Тој додаде дека Берлин е „подготвен да преговара на европско ниво со Соединетите Американски Држави“ за да не биде вовлечен во трговска војна.
Германската економија е многу зависна од извозот, особено од возилата и автоделовите. Според податоците на германската влада, минатата година биле извезени приближно 3,4 милиони нови автомобили, од кои околу 13 проценти биле увезени во САД.
Економија
„ Имотно-правните пречки ги кочат енергетските проекти“: Министерството за енергетика бара итни решенија

Министерката за енергетика, рударство и минерални суровини, Сања Божиновска, иницираше состанок со сите релевантни институции за надминување на административните пречки што го кочат спроведувањето на значајни енергетски проекти. На состанокот присуствуваа претставници од АД МЕПСО, Агенцијата за катастар на недвижности, Управата за имотно-правни работи и Министерството за транспорт и врски.
Главниот предизвик што го попречува развојот на овие проекти е долгото чекање на решенија за имотно-правни прашања и сложените процедури за упис на државниот имот во Катастарот. Оваа состојба директно го забавува напредокот на повеќе капитални инвестиции, меѓу кои и проектот Милетково, неопходен за стабилноста на електроенергетскиот систем во тој регион.
„Проектите од ваков обем не смеат да стојат во место поради долги и неефикасни административни процеси. Ова не е само техничко прашање – ова е прашање на енергетска сигурност и економски развој. Одговорноста на институциите е да обезбедат навремена и координирана работа, за државните инфраструктурни проекти да не чекаат непотребно“, нагласи министерката Божиновска.
На состанокот беше договорено засилено меѓуинституционално координирање и утврдување на јасни процедури за забрзување на процесите.
„Министерството за енергетика, во соработка со надлежните институции, ќе работи на конкретни решенија за да се спречат идни застои и да се обезбеди навремена реализација на сите стратешки енергетски проекти“, рекоа оттаму.
Економија
Перински: Сирера системот е основа за ефикасност во спроведувањето на политиката за рамномерен развој

Претставници на министерства, агенции и други институции учествуваат на дводневна работилница наменета за целта, функциите и улогата на СиРеРа електронскиот систем за координација на политиката за рамномерен регионален развој, во кој се внесуваат податоци од институции вклучени во нејзиното спроведување.
Министерот за локална самоуправа, Златко Перински, денеска на отворањето на дводневната работилница, информираше дека Министерството за локална самоуправа посветено работи на обезбедување навремено и системско пополнување на системот и веќе 20 државни институции внесуваат податоци во него, зголемувајќи ја транспарентноста и подобрувајќи ја координацијата на политиката за регионален развој.
„Нашата цел е да изградиме функционална база на податоци, која ќе овозможи подобра анализа и носење на информирани одлуки. Крајната цел на сите нас е еднаков развој на сите региони во државата, а тоа секако се постигнува со креирање на политики на база на сигурни податоци, што ни ги овозможува овој систем“, порача министерот Перински. Тој посочи дека планирано е во 2026 година, СиРеРа системот да се поврзе со ИФМИС системот, што ќе овозможи автоматско повлекување на податоци.
Овој систем, поддржан од Владата на Швајцарија, веќе е вклучен во скрининг процесот на Европската унија за напредокот на нашата држава во Поглавје 22. Со тоа, обврската за редовно пополнување на базата дополнително се зацврстува и станува важен сегмент во процесот на европската интеграција на нашата земја.