Економија
(Видео) Анѓушев и Данкан потпишаа меморандум за соработка: Почнува изработката на стратегијата за енергетика за наредните 30 години

Вицепремиерот за економски прашања, Кочо Анѓушев, и министерот задолжен за Европа и Америка во британското Министерство за надворешни работи и Комонвелтот, сер Алан Данкан, потпишаа меморандум за соработка во насока на креирање на стратегијата за енергетика на Република Македонија во наредните 30 години.
Вицепремиерот Анѓушев се заблагодари за поддршката од страна на Обединетото Кралство во процесот на креирање на нова стратегија за енергетика, како и за севкупната поддршка во процесот на евро-атлантските интеграции на Република Македонија.
„Стратегијата за енергетика произлегува како обврска од новиот Закон за енергетика и го офаќа периодот од наредните 30 години. Последната стратегија беше донесена во 2010 година, а наредната требаше да се донесе во 2015 година, но за жал ниту стратегијата, ниту новиот Закон за енергетика не беа донесени од претходната влада. Сега забрзано ги поправаме сите грешки од минатото и се надевам дека новата стратегија за енергетика ќе биде добра рамка за енергетскиот развој. Планирано е новата стратегија да ги интегрира и климатските и еколошките аспекти на енергетскиот сектор со тоа што ќе има за цел да предложи достапна, сигурна и одржлива енергетска иднина на земјата. Во процесот на изработка на стратегијата ќе бидат вклучени и консултирани и невладините организации од областа на екологијата кои за првпат ќе бидат вклучени во ваков сериозен процес кој се однесува на донесување важен стратешки документ“, нагласи вицепремиерот Анѓушев.
Британскиот министер Алан Данкан појасни дека британската Влада донира грант во вредност од околу 780 илјади фунти, наменет за експертиза за стратегијата за енергетика со која ќе се обезбеди сигурност, диверзификација и еколошки пристап во енергетскиот сектор во Македонија.
„Ми претставува чест што Обединетото Кралство може да помогне во креирање на нова стратегија за енергетика, особено што на земјата ѝ е потреба диверзификација на енергијата, но и стабилност во снабдувањето со енергенси. Доаѓам во еден посебен период, особено важен за земјата. Искрено се надевам дека граѓаните, осебено младите во Република Македонија ќе излезат на референдумот на крајот на септември, кој претставува еден чекор напред за вашата земја. Изборот е на граѓаните, не е мое да ви кажувам што треба да правите, но ве поттикнувам да учествувате, тоа е чекор напред за државата, чекор напред кон светот и чекор напред кон членството во НАТО и ЕУ“, нагласи министерот Данкан.
Министерот Бектеши истакна дека Министерството за економија активно ќе биде вклучено во процесот на креирање на новата стратегија за енергетика.
„Целта е да имаме што подобра стратегија за енергетскиот сектор. Ќе се работи напорно во текот на оваа и наредната година, за да добиеме вистинска насока како ќе се развива енергетиката, која е многу важна, а притоа да се внимава на заштитата на животната средина и да се обезбеди сигурна иднина на енергетските капацитети во Македонија“, потенцираше Бектеши.
Стратегијата за енергетика ќе биде изработена од „Прајсватерхаус куперс“, а во соработка со Македонската академија на науки и уметности и се очекува да биде готова до последниот квартал на 2019 година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
(Видео) Стојаноски: Растот на реалната плата е двојно поголем за една година со ВМРО-ДПМНЕ отколку 7 со СДС, а инфлацијата е 30 отсто помала

„Растот на реалната плата е двојно поголем за една година со ВМРО-ДПМНЕ отколку за 7 со СДСМ, а инфлацијата е 30% помала. Имено во период јули 2024 до јули 2025 растот на реалната плата e 6.7%, додека во период јули 2017 до јули 2024 растот бил само 3.5%“, рече Бојан Стојаноски, пратеник на ВМРО-ДПМНЕ.
„Реалната плата е вистинската куповна моќ на платата, не номинален износ, туку вредностен.
Растот на реалната плата во време на ВМРО-ДПМНЕ покажува неколку работи: Дека инфлацијата е намалена, дека растот на економијата е забрзан, дека потрошувачката е зголемена, дека производството расте и дека довербата во економијата е голема.
Бројките јасно покажуваат дека инфлацијата е стабилизирана и под контрола. Во период јули 2024 до јули 2025 просечната стапка на инфлација е 3.6%, додека во период од јули 2017 до јули 2024 просечната стапка на инфлацијата е 4.8%.
Бројките се многу јасни. Во време на СДСМ добро им одеше само на неколкумина бизнисмени блиски до власта, кои беа главни тендераши. Во време на ВМРО-ДПМНЕ економијата оди напред, има раст и развој кој е сеопфатен и го чувствува секој граѓанин“, изјави Бојан Стојаноски, пратеник на ВМРО-ДПМНЕ.
Економија
Позначајни движења кај каматните стапки на банките и штедилниците

Годишен раст на просечната каматна стапка на вкупните депозити од 0,28 п.п., при што во јули таа изнесува 2,21%, извести Народната банка.
Просечната каматна стапка на вкупните кредити бележи годишен пад од 0,55 п.п. и изнесува 4,91%.
Најновото соопштение за позначајните движења кај каматните стапки на банките и штедилниците е достапно на следната врска.
Економија
Министерството за енергетика: Нов закон за рударство, транспарентен процес, ќе се прифатат конструктивните предлози

Министерството за енергетика, рударство и минерални суровини (МЕРМС) ја истакнува транспарентноста и вклученоста како основни принципи во подготовката на новиот Закон за рударство. Законот уште во рана фаза беше јавно објавен на платформата ЕНЕР со цел да биде достапен за увид и анализа од сите засегнати страни, а јавната расправа резултираше со исклучително голем одзив.
Јавноста имаше можност во период од 30 дена да го разгледа првичниот текст на Законот за рударство, кој беше јавно објавен на платформата ЕНЕР. Јавниот увид траеше до 28 август 2025 година, а во овој период пристигнаа бројни мислења, предлози и забелешки од компании, институции, стручната и граѓанската јавност, информираат од таму.
„Јавната расправа ни овозможи вредни препораки и забелешки за Нацрт-законот. Паралелно започнуваме со следната фаза од усогласување на законскиот предлог. Ги разгледуваме сите доставени предлози и забелешки и ќе организираме работни средби со оние кои се изјасниле за предлог-текстот. Нашата цел е да добиеме усогласено, јасно и спроведливо законско решение кое ќе обезбеди заштита на животната средина, висока безбедност при работа и предвидлива инвестициска рамка,“ изјави министерката за енергетика, рударство и минерални суровини Сања Божиновска.
Со ова, како што е истакнато, Министерството уште еднаш потврдува дека е отворено за дијалог, соработка и заедничко креирање на законски решенија, со единствена цел – модерна и правична рамка за рударството во Македонија. Во наредниот период, МЕРМС ќе ги разгледа детално сите пристигнати предлози и ќе ги прифати оние кои се во насока на подобрување на законското решение, во интерес на државата и граѓаните.
Министерството, додаваат од оваа иституција, останува цврсто определено во подготовката на законот да се води според највисоките европски стандарди, со цел да обезбеди современа и одржлива рамка за развој на рударството.
„Финалниот закон ќе овозможи: одржлива експлоатација и преработка на минерални суровини според највисоки стандарди, засилена контрола и транспарентност во сите процеси, задолжителни мерки за рекултивација и заштита на локалните заедници, јасна и правично поставена регулатива за сите учесници во секторот.
Министерството нагласува дека инсистира на строга примена на правилата и нулта толеранција за прекршувања, во интерес на безбедноста, заштитата на животната средина и добросостојбата на локалните заедници.