До 20 проценти поскапува лебот во Република Македонија. По сите проблеми, во сите гранки на земјоделството, на ред дојдоа и проблемите со пченицата и со мелничко-пекарската индустрија. А познато правило во агроекономијата е дека кога поскапува брашното, кога поскапува лебот, почнува да врти инфланторното тркало на поскапувања на целата храна, изјави Наум Стоилковски, портпарол на ВМРО-ДПМНЕ. Ова поскапување, додаде тој, се надоврзува на сите црнила што го зафатија македонското земјоделство, скапите горива, на излажаните земјоделци за зелената нафта, на проблемите со исплатата на субвенциите, на проблемите со извозот и пласманот.

„Цените на лебот во секоја држава се најстабилни и ја отсликуваат состојбата на економијата воопшто. Лебот, почитувани, најмногу поскапува поради лошите мерки на ресорното Министерство, во услови на поскапување на енергенсите, во услови на недостиг на квалификувана работна сила, зголемување на цената на пченицата во последните месеци 40 отсто“, рече Стоилковски.

Цената на пченицата, додава тој, се формира врз основа на цените пред жетвата, оваа година непосредно пред жетвата пуштени беа огромни количества пченица на пазарот за цена од 7-8 денари, како и увезено брашно од Србија и од Косово и така цената за македонските производители остана депласирана.

„Тоа предизвика домашните производители во најголем дел или да ја чуваат за сопствени потреби или да ја продаваат на други пазари или да ја конвертираат во преработки или за сточна исхрана. Од Битолскиот Регион се продаваше во Грција за 11-12 денари.
Министерството тоа свесно го направи за некои од трговците да остварат профит на база на ценовните шокови, иако се знаеше дека во пролетните месеци, веднаш по Нова година, доаѓа до недостиг и автоматско поскапување. Наместо да реагира со стоковите резерви во тој период и да ги релаксираат ценовните разлики, Министерството реагира задоцнето и се создаде дебаланс на пазарот. Оваа година порано се јавува недостигот, меѓу другото, и поради царинската војна меѓу Косово и  Србија. Домашните производители го почувствуваа тоа и оние што ризикуваа самите да си ја чуваат пченицата ја покачија цената на пазарот. Потенцираме, самите, затоа што во изминатите години државата, т.е. Министерството, во програмата за поттикнување и рурален развој одвојуваше пари за помош на чување на пченицата на производителите во силосите на „Стоковите резерви“ и други субјекти и оваа година таа мерка ја укина, т.е. ја намали од 10 милиони на илјада денари“, рече Стоилковски.