Економија
ВМРО-ДПМНЕ: Ковачевски и неговите заменици за 7 месеци ќе земат над 4,5 милиони денари, а за студентите само 1000 денари

Димитар Ковачевски и неговите четворица заменици за 1 месеци ќе земат плата од над пола милион денари, или за 7 месеци заедно ќе земат над 4 и пол милион денари, вели ВМРО-ДПМНЕ.
„Покачувањето од 78 проценти, енормано ги зголеми платите на Димитар Ковачевски, Артан Груби, Славица Грковска, Бојан Маричиќ и Фатмир Битиќи за скоро 1000 евра, или за секој работен ден 50 евра.
И додека нивните плати растат, истите тие носат мерки за месечна помош за студентите од само 1000 денари.
За студентите месечно ќе дадат 1000 денари, или за 7 месеци тоа се 7000 денари.
Ова не е реална помош. Ова е само предизборен поткуп кој го прават со државни ресурси.
СДС сакаат со 1000 денари да го купат гласот на студентите.
Доколку СДС и Ковачевски сакаа да им помогнат на студентите тогаш прво ќе озбедеше квалитетно образование, а потоа ќе го изградеше и ветениот студентски град во Скопје, ветениот студентски дом во Штип уште во 2016та година.
Ковачевски мисли дека со овие 1000 денари ќе го купи достоинството на младите.
За премиерот Ковачевски и вицепремиерите во владата на СДС и ДУИ има европски плати, а за студентите трошки.
Овие мерки немаат никаков позитивен ефект врз животниот стандард на студентите.
Груби кој месечно добива плата од 2000 евра и понатаму се жали дека неговата плата била најниска.
Маричиќ кој на државна сметка се гоштева со бифтек, месечно зема плата од над 2000 евра.
Грковска и покрај тоа што е задолжена за добро владеење, никој не знае која е нејзината функцијата во владата, бидејќи корупцијата и криминалот се во пораст изминатите 7 години додека СДС е на власт, а зема плата од над 2100 евра.
Вицепремиерот за економски прашања Битиќи кој велеше дека само што не донеле закон за намалување на фунционерските плати, и понатаму месечно зема плата од над 2000 евра.
СДС и Ковачевски сакаат да ги купат студентите со по 1000 денари, додека тие ги уживаат сите привилегии и бенефиции од владеењето.
Време е СДС и Ковачсвки да си заминат.
Студентите не се на распродажба и никој нема и не смее да ги потценува.
Студентите мора да добијаат соодветни услови за студирање и за убав студентски живот.
Оваа влада на СДС и Ковачевски на следните избори ќе биде поразена од студентите“, пишува опозициската партија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Цените на нафтата се искачија над 66 долари

Цените на нафтата денес се искачија над 66 долари на меѓународните пазари, при што водечките производители објавија само умерено зголемување на понудата кон крајот на годината и индикации за стабилна побарувачка за гориво во САД.
На лондонскиот пазар, цената на барел попладне беше за 1,04 долари повисока од вчерашното затворање, на 66,49 долари. На американскиот пазар, барелот се тргуваше по цена повисока за 1,13 долари, на 62,86 долари.
Инвеститорите беа изненадени од објавата на почетокот на неделата од водечките производители дека имаат намера само умерено да ја зголемат понудата кон крајот на годината.
Групата од осум членки на Организацијата на земјите извознички на нафта (ОПЕК) и нејзините сојузници објавија во неделата дека ќе испумпаат само дополнителни 137.000 барели дневно на пазарот во ноември.
Тие веќе ја зголемија понудата за 411.000 барели дневно во септември.
„Осумката“ забележа дека изгледите за глобалната економија се „стабилни“ и дека пазарните индикатори се „моментално здрави“, судејќи според „ниското ниво на залихи“.
Пазарите очекуваа октомври да означи само краткорочен одмор во забрзаната нормализација на залихите.
Економија
Гувернерот Славески: Финансиската едукација и дигиталната писменост се неопходни во услови на зголемени ризици и дигитализација

На годишниот состанок на регионалниот проект за техничка помош во областа на финансиската едукација, поддржан од ОЕЦД и Министерството за финансии на Холандија, што се одржува во Сараево во организација на Централната банка на Босна и Херцеговина, гувернерот на Народната банка, д-р Трајко Славески, истакна дека во услови на зголемени економски ризици и брза дигитализација, финансиската едукација и дигиталната писменост се неопходни за користење на предностите од финансиските услуги и за обезбедување сеопфатен раст.
„Во време кога инфлацијата расте и кога има зголемени каматни стапки и широка достапност на дигиталните финансиски услуги, се јавува нужна потреба од јакнење на финансиската и дигиталната писменост. Дигитализацијата носи нови можности, како поефикасни и поевтини финансиски услуги, но истовремено создава и нови ризици – од онлајн измами, прекумерно задолжување, до загрозување на личните податоци“, порача гувернерот.
Тој зборуваше на панел-дискусијата на тема „Унапредување на финансиската едукација за посилен раст“, на која учествуваа гувенерите на централните банки на Босна и Херцеговина и Молдавија, заменик-гувернерката на Грузија и вицегувернерот на Хрватска. Разговорот беше насочен кон улогата на финансиската едукација во зајакнувањето на економскиот раст, како и во справувањето со новите ризици предизвикани од дигитализацијата на финансиските услуги.
Гувернерот Славески нагласи дека посебно внимание треба да им се посвети на младите и на потрошувачите со ограничено финансиско искуство. „Зголемувањето на финансиската и дигиталната писменост е од огромна важност за граѓаните и за претприемачите за да можат да ги препознаат придобивките, но и ризиците од новите дигитални финансиски производи и услуги. Само така можеме да ја искористиме дигитализацијата како алатка за поголема вклученост и стабилен економски раст“, додаде тој.
Во рамките на зголемувањето на вклученоста, Народната банка ги спроведува и активностите на иницијативата „Кодекс за финансирање на жените претприемачи“ (WeFi Code), како национален координатор, заради намалување на родовиот јаз во пристапот до финансии и поддршка на женското претприемаштво. Во оваа иницијатива, покрај Народната банка, се вклучени 18 институции од јавниот, приватниот и граѓанскиот сектор, меѓу кои шест банки и две штедилници.
Народната банка со своето учество ја потврди својата заложба за унапредување на финансиската едукација, дигиталната писменост и вклученоста, во услови на брзи економски и технолошки промени.
Економија
Божиновска на средба со Плаколм и раководството на ЕВН Македонија: Компанијата покажува како странските инвестиции можат да придонесат кон стабилност и дигитализација на енергетскиот систем

Министерката за енергетика, рударство и минерални суровини, Сања Божиновска, оствари средба со австриската сојузна министерка за Европа, интеграција и семејство, Клаудија Плаколм, и со раководството на ЕВН Македонија, во рамки на работната посета што австриската делегација ја реализираше во земјава.
На средбата присуствуваше и Мартин Памер, амбасадор на Република Австрија во Република Македонија, заедно со претставници од австриската амбасада.
Фокусот на разговорите беше насочен кон успешната соработка меѓу Министерството за енергетика и компанијата ЕВН Македонија, како пример за одговорно и партнерско делување меѓу државата и енергетскиот сектор.
Божиновска истакна дека ЕВН Македонија е значаен партнер во енергетската транзиција на земјата, посочувајќи дека примерот на компанијата покажува како странските инвестиции можат да придонесат кон стабилност, модернизација и дигитализација на енергетскиот систем.
„ЕВН Македонија е пример како странски инвеститор може да соработува со државните институции на начин што создава додадена вредност – не само за економијата, туку и за општеството“, нагласи Божиновска.
Во рамки на посетата, делегацијата имаше можност да се запознае со технолошките и организациските достигнувања на компанијата, меѓу кои и современиот диспечерски центар за дигитално управување со дистрибутивната мрежа на национално ниво.
Австриската министерка Клаудија Плаколм изрази задоволство од постигнатото ниво на енергетска соработка меѓу двете земји и од синергијата меѓу јавниот и приватниот сектор во Северна Македонија, истакнувајќи дека таа соработка е позитивен пример за поширокиот регион.
Двете министерки потврдија дека постои заеднички интерес за продолжување на размената на искуства и добри практики, со фокус на одржлив енергетски развој и зелена транзиција.