Министерката за финансии Гордана Димитриеска-Кочоска ќе поддржи минимална плата 500 евра доколку има таков договор меѓу работодавците и синдикатите. Вели дека зголемувањето ќе влијае на малкумина вработени што земаат плата од државата.

„За минималната плата ќе разговараат работодавците и работниците. Ние ќе го следиме процесот и она што ќе го договорат меѓусебе, ние тоа ќе го прифатиме. Зошто? Затоа што во изминатиот период врз база на направените анализи констатиравме дека минималната плата како компонента што влијае на платите во државните органи опфаќа многу мал број државни службеници, приближно 14.000 мислам дека беа. Сите други не се поврзани, така им се дефинирани според систематизациите, не се поврзани со минималната плата, така што како држава ние немаме ништо против, што ќе се договорат меѓусебе двете страни, ние тоа ќе го поддржиме“, рече министерката Димитриеска-Кочоска.

Барањето на некои комори државата да плаќа дел од придонесите за да може минималната плата да се заокружи на 500 евра, Димитриеска-Кочоска децидно вели дека тоа е обврска што ќе мора да си ја плаќаат кон државата оти не е предмет на договор. Освен тоа, според министерката, во земјата се плаќаат придонеси што се многу пониски од оние во соседството, па затоа смета дека нема потреба од измени во тој дел.

Сојузот на стопанските комори уште на првомајскиот протест лани пред изборите побара од новата Влада во првите 100 дена минималната плата да ја крене на 450 евра, но за ова барање сѐ уште се водат преговори.

Премиерот Христијан Мицкоски се оврати на одбележувањето на почетокот на работењето на Институтот за извоз.

„Ценам дека како Влада секогаш сме биле, во овие месеци откако сме влада, а и претходно како опозиција, партнер на бизнисот. Така и ќе продолжиме да бидеме и во иднина, мислам дека бизнисот и Владата треба да се партнери и партнерски да соработуваат и да се надополнуваат. И тука нема ништо лошо, нити пак нешто чудно.

Јас мислам дека само на тој начин можеме да бидеме и поконкурентни, добра е оваа можност што денеска најголемите регионални комори се тука, од регионот, заедно со нашата најголема комора, би рекол. На тој начин ќе можат заеднички да дискутираат за иднината и за сето она коешто претставува план, регионално поврзување, вмрежување и настап на нови пазари, бидејќи ценам дека, а и тоа го кажав, во моето обраќање на првиот настан дека, ценам дека полека но сигурно ќе треба заедно да се вмрежуваме и заедно да настапуваме во намерата да бараме нови пазари.

Така што, уште еднаш нека е честит денот, нека е за аирлија овој клуб, овој Институт за извоз и следниот пат кога ќе се собереме да имаме нови бројки кои што ќе бидат многу поголеми во насока на извоз и поголеми проценти раст на македонската економија, генерално“, изјави Мицкоски.

Како Влада сме целосно ориентирани кон поддршка на директните вложувања на странски компании, но и директна поддршка на македонските компании, изјави премиерот, Христијан Мицкоски, одговарајќи на новинарско прашање за очекувањата за странските директни инвестиции оваа година.

„Од бројките којшто јас ги имам на располагање, заклучно со ноември месец, имаме во 2024 година повеќе од една милијарда, мислам околу милијарда и четириесет милиона. Што ако се преведе по глава на жител и процент од бруто домашниот производ е, за нас, најголемиот резултат, историски гледано. Очекувам тој тренд да продолжи и во оваа година, во 2025 година заедно со домашните инвеститори и очекувам тоа да биде драјвер за голем раст на македонската економија и бруто домашниот производ, нешто коешто нас ни е потребно насушно после неколку години стагнација или мачење во развојот“, рече Мицкоски.

Додаде дека Владата е целосно ориентирана кон поддршка на директните вложувања на странски компании, но и директна поддршка на македонските компании.

„Веќе зборувавме и со претседателот на Комората, кажавме дека оние 250 милиони евра коишто беа ветени, конечно од денеска, сите формалности се завршени, ајде би рекол од понеделник веќе ќе може да биде ставен на располагање на стопанството. Така што, еве уште еднашка да кажам дека имаме исклучителна соработка, како Влада сме ориентирани во таа насока да го поддржуваме бизнисот. За нас патриотски чин претставува повеќе вработени, давање повисока плата, инвестиции, луѓето да си ги задржиме дома. Тоа е она коешто претставува наша заедничка цел“, додаде премиерот.