Изградбата на експресниот пат Штип – Крупиште е во завршна фаза и се очекува да биде пуштен за сообраќај кон крајот на јуни оваа година, истакнаа министерот за транспорт и врски, Горан Сугарески, и директорот на ЈП за државни патишта, Зоран Китанов, при денешниот увид во градежните работи.

Инвестицијата е вредна 20,2 милиони евра, а ова е првата фаза од експресниот пат од Штип до Кочани, кој се очекува целосно да се изгради за една година.

„Министерството за транспорт и врски е сериозно фокусирано на реализација на сите проекти планирани за оваа година. Се наоѓаме среде силна градежна сезона, која очекуваме уште повеќе да се интензивира следниов период. Во делот на патната инфраструктура градежните работи се одвиваат со силно темпо. Само во овој момент се рехабилитираат над 150 километри патишта, веќе следниот месец завршуваат тендерските постапки за рехабилитација на 80-ина километри регионална патна мрежа. Исто така, активно работиме на изградба на над дваесет водоводи и канализации, почнавме со изградба на три нови социјални згради, а железничкото поврзување кон Бугарија и гасификацијата остануваат примарни проекти на Владата“, изјави министерот за транспорт и врски, Горан Сугарески.

Директорот на ЈП за државни патишта, Зоран Китанов, истакна дека интензивно и во континуитет се работи на сите проекти почнати во текот на изминатата година.

„Овој експресен пат од Штип до Крупиште ќе биде завршен во јуни и ќе биде првиот поголем пат пуштен во употреба оваа година, со што ќе обезбедиме безбедна, модерна и сигурна врска со Источниот Регион. Исто така, континуирано се работи и на преостанатиот дел од Крупиште до Кочани. Во меѓувреме, работиме и на сите рехабилитации почнати во текот на есента 2019 година. До крајот на мај ќе бидат објавени уште 15 јавни повици за рехабилитација и реконструкција на патната мрежа во целата држава. Исто така, сакам да истакнам дека без прекин се работи на модернизација на мостовите и санација на појавените свлечишта“, изјави Китанов.

Toj додаде дека патната инфраструктура на истокот, делот на Малешевијата, беше целосно рехабилитиран во текот на 2019 година, а во тек се градежни работи на делот од Крупиште до Пробиштип, кој треба да биде завршен во септември оваа година.

Градоначалникот на општина Штип, Благој Бочварски, истакна дека изградбата на новиот експресен пат е од особено значење за економски развој и унапредување на целиот Источен Регион и ќе придонесе за побрз и побезбеден транспорт и подобар живот на граѓаните.