„Усвојувањето на новиот Закон за енергетиката, кој е усогласен со третиот енергетски пакет, е огромен чекор напред кој го направи Република Македонија, а со кој се овозможува правна рамка за воспоставување Ден однапред на пазарот на електрична енергија и спојување на енергетските пазари. Проектот за спојување на пазарите на Република Македонија и Република Бугарија веќе е инициран“, нотира Енергетската заедница во годишниот извештај за спроведување на европското законодавство во согласност со договорот за воспоставување на Енергетската заедница за 2018 година.

Според овој извештај, Македонија е на 3. место по спроведувањето на реформите во енергетскиот сектор во однос на 9-те земји што се споредуваат.

Извештајот е доказ дека Македонија ги спроведува реформите со забрзано темпо со резултат 50 отсто во споредба со 2017 и е над просекот на ниво на Енергетската заедница, која има просек од 43 отсто. Дополнително е нагласено дека во процес на реализација се 38 отсто од потребните законски и подзаконски акти, со кои дополнително се усогласува македонското енергетско законодавство со она на ЕУ. Доказ за спроведувањето на реформите е и податокот дека против Република Македонија не се води ниту еден спор пред Енергетската заедница.

Во делот за енергетска ефикасност посебно е нагласен постигнатиот напредок под водство на новата Влада во споредба со стагнацијата во изминатите неколку години под водство на претходната влада.

Во четирите главни сектори Македонија е прворангирана во имплементација на законската регулатива за нафени деривати (53 отсто), второрангирана за гас (40 отсто), на 4. место за легислативата поврзана со електричната енергија (52 отсто), а за одржливост е на 6. место (50 отсто).

Во извештајот се наведени и одделни анализи на девет најзначајни сектори, при што се истакнува дека правната легислатива во поглед на статистички податоци за енергетски потреби е усогласена со европската во 98 отсто, за обновливи извори на енергија 52 отсто, за животна средина 54 отсто, за нафтени деривати 53 отсто, а за електрична енергија и енергетска ефикасност усогласувањето моментно е на 52 отсто.

Анализирајќи ги институциите, се нотира дека Регулаторната комисија за енергетика на Република Македонија е оценета со 72 отсто и е на прво место во споредба со другите земји членки на Енергетската заедница.

Напредокот во спроведувањето на енергетските реформи започна по одржувањето на самитот за Западен Балкан во Трст, а во најголема мера се должи на донесувањето на новиот Закон за енергетиката, во кој се имплементирани европските директиви и регулативи од третиот енергетски пакет.

Податоците изнесени во извештајот се уште една потврда дека Република Македонија сериозно пристапи кон спроведување на реформите во енергетскиот сектор откако во јуни по донесувањето на Законот за енергетиката, Секретаријатот на Енергетската заедница ги повлече и споровите поведени кон Република Македонија поради неспроведување на преземените обврски од договорот за Енергетската заедница.