Економија
Заев-Орјан: Зголемен интересот на израелските компании за инвестирање во Македонија

Пријателските односи меѓу двете земји се зацврстуваат преку безбедносната и економската соработка. Ваков е заклучокот од средбата што денеска ја остварија премиерот Зоран Заев и амбасадорот на Израел во Македонија, Дан Орјан, придружуван од почесниот конзул Градимир Шумковски.
Премиерот и амбасадорот, во рамки на средбата, изразија сериозна подготвеност во претстојниот период осoбeно внимание да биде посветено на интензивирањето на соработката во областа на безбедноста, новите технологии, енергетиката, земјоделството и управувањето со водите, како и во областа на здравството и туризмот.
Двајцата соговорници ја констатираа зголемената заинтересираност на израелските компании за инвестирање во Македонија, а премиерот посебно го истакна искуството на Израел во областа на технолошкиот развој и иновациите, искуството на стартап компаниите кои отвораат големи можности за отворање нови работни места за граѓаните.
Амбасадорот Орјан се заблагодари за грижата на Македонија за еврејската заедница и за поддршката на многу проекти наменети за заштита на еврејската култура и традиција во земјата.
Беше истакнато одбележувањето на 75-годишнината од холокаустот на македонските Евреи во Втората светска војна со активности во Битола, Штип и Скопје, каде, покрај претставници на Владата, присуствуваа и бугарскиот премиер Бојко Борисов и претседавачот на Советот на министри на Босна и Херцеговина, Денис Звиздиќ, со нивни делегации.
На состанокот беше спомената и успешната реализација на Хакатон-Биталонот, кој во Битола, на иницијатива на израелскиот амбасадот Орјан, а во соработка со Министерството за информатичко општество и администрација, беше организиран со цел преку иновативни решениија на младите да се раскаже една значајна историска приказна за Македонија и Битола.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Дурмиши за новата потрошувачка кошничка: ќе служи за градење политики поврзани со минималната плата и ќе се усогласи со европските стандарди

На четвртата седница на Економско-социјалниот совет, министерот за економија и труд, Бесар Дурмиши ја истакна важноста од повторното активирање на трипартитниот дијалог меѓу Владата, синдикатите и работодавачите, кој претставува суштински механизам за социјална кохезија и економски напредок. Тој ги поздрави новите претставници на Конфедерацијата на слободни синдикати, со што, како што рече, се враќа легитимитетот на Советот.
Министерот информираше дека е успешно завршена постапката за утврдување на репрезентативноста на синдикатите – прашање што подолг период го блокираше нормалното функционирање на ЕСС. Воедно, се предложени измени на Законот за работни односи, со кои прагот за репрезентативност се намалува од 10 на 5 проценти, со цел да се поттикне поинклузивен и плуралистички социјален дијалог.
Дурмиши го претстави и процесот за изработка на нова, официјална методологија за пресметка на потрошувачката кошничка, заснована на проверливи и релевантни податоци од Анкетата за потрошувачка на домаќинства, спроведена од Државниот завод за статистика. Новата кошничка ќе служи како основа за градење политики поврзани со минималната плата и социјалните трансфери и ќе биде усогласена со европските стандарди.
Економија
Трипуновски: Откупните цени за пиперката се зголемени – прва класа ќе се откупува по 45 денари за килограм

Откупните цени за пиперката се зголемени – прва класа ќе се откупува по 45 денари за килограм, изјави министерот за земјоделство, шумарство и водостопанство, Цветан Трипуновски.
„На состанокот се договорија откупните цени по класи за пиперката. За прва класа откупната цена на пиперката изнесува 45 денари, за прва-втора класа е 35 денари, за втора класа откупната цена изнесува 20 денари, а за трета класа откупната цена ќе биде 15 денари”, појасни министерот.
Тој посочи дека тоа се почетните цени со кои што ќе започне откупот на пиперката за реколтата 2025 година.
„Пиперката во Македонија се одгледува во два региони – струмичкиот и прилепскиот регион. Бербата треба да биде во договорен период за да не се соочиме со зголемена количина на берба на пиперка во текот на денот и да имаме застој во откупот”, додаде министерот Трипуновски.
Министерот истакна дека оваа година откупните цени за пиперката се зголемени во однос на минатата година.
„Текот на откупот ќе го следиме преку Државниот инспекторат за земјоделство. Како Министерство стоиме на располагање, а трендот на зголемување на земјоделското производство треба да продолжи и понатаму”, посочи тој.
Економија
Владата работи на зголемување на просечната плата, најави Мицкоски

Претседателот на Владата, Христијан Мицкоски, одговарајќи на новинарско прашање во врска со растот на платите во државата, со оглед на најновите статистички податоци, според кои просечната нето плата бележи раст и изнесува 45.800 денари, изјави:
„Прво што сакам да кажам е дека и тоа не е доволно. Дека треба да биде уште поголема просечната плата, и во таа насока продолжуваме, како Влада, да работиме. Но и самиот факт и бруто и нето, од просечната плата растат повеќе од 11% е демант за сите оние, би рекол, некрофили во рамките на опозицијата, кои што изминатиов период континуирано конструираа и лиферуваа лаги во јавноста, дека платите не растеле, дека платите стагнирале итн. Но овие податоци коишто пристигнуваат се само доволен доказ дека тие, освен тоа што не говорат вистина, шпекулираат, конструираат и креираат невистини. Друго ништо не можат да сработат и токму затоа таква е состојбата во опозицијата, и токму затоа народот ја изгуби довербата во нив.“
Владата продолжува да работи, рече премиерот, за граѓаните да имаат уште повисоки примања.
„И нормално, ние како Влада продолжуваме и понатаму да работиме за уште повисоки примања на работниците, затоа што тоа е наша цел, да испорачаме тоа што граѓаните од нас очекуваат.“, објасни Мицкоски.