Економија
И во Белгија протести против поскапувањето на горивата

Движењето на жолтите елеци, кое во Франција организира протести поради зголемувањето на цените на горивото, ги интензивира своите активности и во Белгија, но само во Валонија, која е франкофонска јужна покраина.
Во Белгија, како и во Франција, протестите се организираат преку социјални мрежи и од истите причини, пренесе агенцијата „Хина“.
Според најновите податоци, цената за литар „супер“ достигнала 1,43 евро, во Франција 1,54 евро, а цената на дизелот е 1,54 евро во Белгија, а 1,51 во Франција.
Во Белгија се блокирани три рафинерии за нафта. Демонстрантите преку социјалните мрежи соопштија дека целта е да предизвикаат недостиг од гориво за да се принудат политичките лидери да реагираат.
Според белгиските медиуми, ефектите веќе се чувствуваат бидејќи повеќе бензински пумпи во близина на Лиеж останале без гориво.
Како што е наведено, барањата на белгиските демонстранти се малку пошироки од оние во Франција – граѓаните на земјата се жалат на намалување на куповната моќ и бараат да се намали данокот на додадена вредност на најнеопходните производи, како што се гориво, храна итн.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Влада: Најниската пензија во март изнесува 18.192 денари, a просечната 26.258 денари

Најниската пензија во март изнесува 18.192 денари, додека просечната околу 26.258 денари, соопштија од Владата.
„Исполнето е ветувањето за зголемување на пензиите од 5.000 денари на над 330.000 пензионери. Со исплата на мартовската пензија за 2.500 денари, се заокружи циклусот за линеарно покачување на пензионерите за 5.000 денари. Со сегашното зголемување најниската пензија во март изнесува 18.192 денари, додека просечната пензија изнесува околу 26.258 денари. Пензионерите заслужуваат сигурен и достоинствен живот“, се наведува во соопштението.
Дополнително, велат од Владата, доказ дека работиме во интерес на граѓаните покажува и фактот што како Влада имаме став дека нема да ја зголемиме старосната граница за пензионирање која сега е 62 години за жени и 64 години за мажи и најмалку 15 години стаж.
„Грижата за пензионерите е наша обврска и цел. Како Влада продолжуваме целосно посветено и одговорно да работиме за подобар и поквалитетен живот за сите граѓани“, велат од таму.
Економија
Германија тврди дека трговската војна би била штетна и за САД

Италијанската премиерка, Џорџа Мелони, предупреди на опасностите од трговската војна со Соединетите Американски Држави, а сега слично предупредување доаѓа и од Германија.
Германија, најголемата европска економија и трета по големина во светот според податоците на Светската банка, предупредува дека реципрочните тарифи ќе бидат штетни за сите инволвирани страни пред објавувањето на новите царини подоцна денеска од страна на Трамп.
„Трошоците за трговска војна не паѓаат само на едната страна, туку може да станат скапи за двете страни“, рече владиниот портпарол Штефен Хебестрајт.
Тој додаде дека Берлин е „подготвен да преговара на европско ниво со Соединетите Американски Држави“ за да не биде вовлечен во трговска војна.
Германската економија е многу зависна од извозот, особено од возилата и автоделовите. Според податоците на германската влада, минатата година биле извезени приближно 3,4 милиони нови автомобили, од кои околу 13 проценти биле увезени во САД.
Економија
„ Имотно-правните пречки ги кочат енергетските проекти“: Министерството за енергетика бара итни решенија

Министерката за енергетика, рударство и минерални суровини, Сања Божиновска, иницираше состанок со сите релевантни институции за надминување на административните пречки што го кочат спроведувањето на значајни енергетски проекти. На состанокот присуствуваа претставници од АД МЕПСО, Агенцијата за катастар на недвижности, Управата за имотно-правни работи и Министерството за транспорт и врски.
Главниот предизвик што го попречува развојот на овие проекти е долгото чекање на решенија за имотно-правни прашања и сложените процедури за упис на државниот имот во Катастарот. Оваа состојба директно го забавува напредокот на повеќе капитални инвестиции, меѓу кои и проектот Милетково, неопходен за стабилноста на електроенергетскиот систем во тој регион.
„Проектите од ваков обем не смеат да стојат во место поради долги и неефикасни административни процеси. Ова не е само техничко прашање – ова е прашање на енергетска сигурност и економски развој. Одговорноста на институциите е да обезбедат навремена и координирана работа, за државните инфраструктурни проекти да не чекаат непотребно“, нагласи министерката Божиновска.
На состанокот беше договорено засилено меѓуинституционално координирање и утврдување на јасни процедури за забрзување на процесите.
„Министерството за енергетика, во соработка со надлежните институции, ќе работи на конкретни решенија за да се спречат идни застои и да се обезбеди навремена реализација на сите стратешки енергетски проекти“, рекоа оттаму.