Економија
Ковачевски: Со навремени антикризни мерки спречуваме поголеми ценовни шокови

Премиерот Ковачевски изјави дека Владата на Северна Македонија стори сѐ што е потребно за ублажување на последиците со мерки кои започнаа уште минатата година поради зголемените цени на енергенсите на европските пазари.
„Веднаш презедовме мерки кои беа насочени кон зачувување на стандардот на граѓаните со најниски приходи. Вторите беа насочени кон зачувување на ликвидноста на компаниите за да се зачуваат работните места и да се задржи економскиот раст. Потоа следуваше сеопфатниот антикризен пакет со повеќе од 600 милиони евра, со кој меѓу другото, обезбедивме субвенции за електрична енергија за малите потрошувачи, како и за некои деловни субјекти кои што се занимаваат со нега за деца и слично. Обезбедивме и кредити со ниски каматни стапки и други мерки поврзани со финансиските продукти кои им помагаат на енергетската транзиција на компаниите за да бидат оспособени на најевтин начин да ја применат употребата на поевтините обновливи ресурси како енергенси во нивната работа“, посочи премиерот Ковачевски.
Ковачевски уште дополни дека беа донесени мерки кои беа насочени кон сопирање на ценовните шокови за домаќинствата и за граѓаните, особено во однос на цените на храната и цените на енергенсите.
„Овде би спомнал уште една многу важна димензија во однос на справувањето со обезбедувањето на основните прехранбени продукти и цените за нив, а тоа е регионалната и директна соработка меѓу лидерите во регионот кои докажа дека Балканот може да биде навистина место каде може да соработуваме и да си помагаме. Имавме секојдневна комуникација со претседателот на Србија Вучиќ и со премиерот на Албанија Рама, како и со премиерот на Бугарија, со премиерот на Грција и причината на таа комуникација беше да се обезбеди непрекинат транспорт и трговија со сите стратешки неопходни прехранбени продукти за да немаме недостатоци во регионот и тоа даде резултати затоа што во сите овие земји немаше недостаток на храна и на енергенси дури ни еден единствен ден за време на зимата“, истакна премиерот Ковачевски и додаде дека кога во Албанија недостасуваше сончогледово масло во продавниците, Северна Македонија донесе одлука да ги извезе потребните количини за Албанија.
Ковачевски потенцираше дека поединечните мерки од сите земји се секогаш подобри кога се придружени од добра и отворена комуникација со сите соседни земји во регионот и дека во таа насока последниот Самит на земјите членки на процесот на соработка во Југоисточна Европа во Солун пред две седмици ги поканил Турција, Грција, Италија да се придружат на иницијативата „Отворен Балкан“ како земји набљудувачки за да ја зголемат таа регионална соработка и да ги зближат граѓаните и деловните субјекти од целиот поширок регион.
Во однос на движењата на инфлацијата, премиерот Ковачевски истакна дека мерките што ги презеде Владата на Република Северна Македонија дадоа резултат и на овој план и стапката на инфлација во земјата е пониска од некои земји членки на ЕУ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Позначајни движења кај каматните стапки на банките и штедилниците

Годишен раст на просечната каматна стапка на вкупните депозити од 0,23 п.п., при што во август таа изнесува 2,19%.
Просечната каматна стапка на вкупните кредити бележи годишен пад од 0,54 п.п. и изнесува 4,90%.
Најновото соопштение за позначајните движења кај каматните стапки на банките и штедилниците е достапно на следната врска.
Економија
Божиновска: Енергетски стабилна Македонија со повеќе обновливи извори

Министерката за енергетика, рударство и минерални суровини, Сања Божиновска, денес учествуваше на панел-дискусијата „Жени во енергетиката“ во рамки на Конференцијата „Јас сум жена“.
„„Нашата визија за енергетска Македонија е јасна – да бидеме земја што произведува доволно енергија за сопствени потреби, притоа поголем дел од неа да биде од обновливи извори и да имаме модерна и дигитализирана мрежа што е дел од европската енергетска архитектура. Македонија мора да биде стабилна за своите граѓани и компании, но и доверлив партнер во регионот“, изјави министерката.
Божиновска ја нагласи и улогата на енергетската дипломатија како алатка за обезбедување одржлива иднина – преку регионална соработка, заеднички инвестиции и интегрирани пазари.
„Регионалниот енергетски систем е тесно поврзан – ниту една земја сама не може да обезбеди стабилност и сигурност, особено во време на енергетска транзиција. Затоа енергетската дипломатија значи да преговараме, да се договараме и да соработуваме така што сите ќе добиеме – сигурни испораки, интегрирани пазари и стабилна инфраструктура“ рече Божиновска.
Говорејќи за новоформираното министерство, таа истакна дека неговите темели се поставени врз визија, професионалност и транспарентност, со јасна мисија – енергетиката да биде двигател на економскиот развој.
„Создавањето на оваа институција е порака дека енергетиката е срцето на економскиот развој и иднината на земјата. Во темелите ги вградивме компетентноста, отчетноста и визијата за одржлива иднина – секое наше решение мора да биде усогласено со европските зелени цели и заштитата на животната средина“, нагласи Божиновска.
Во своето обраќање, министерката посочи и на најголемите предизвици: застарената инфраструктура, потребата од инвестиции и модернизација, како и регулаторни промени што ќе ја охрабрат приватната иницијатива.
„ Првиот голем предизвик е староста и неефикасноста на дел од постојната инфраструктура. Производните капацитети како и преносната и дистрибутивната мрежа се градени пред децении и не се дизајнирани за интеграција на големи количества обновливи извори. Тоа бара значителни инвестиции и внимателно планирање за да се модернизира системот без да се наруши стабилноста. Вториот предизвик е финансирањето. Енергетските реформи се скапи, особено кога станува збор за изградба на нови капацитети, дигитализација на мрежите и проекти за енергетска ефикасност. Затоа мора да се работи со комбинација од јавни инвестиции, европски фондови и приватен капитал. За да можат реформите да успеат, потребна е транспарентна и предвидлива регулатива што ќе го охрабри приватниот сектор да инвестира. Тоа значи поедноставени процедури, брзи дозволи и јасни правила за пазарот. И на крај, но не помалку важно, е човечкиот фактор. Транзицијата кон нов енергетски модел не е само технолошка, туку и општествена промена. Таа бара обучени кадри, нови знаења и култура на одговорност – и кај институциите и кај граѓаните“ рече Божиновска.
Таа потенцира дека реформите веќе се спроведуваат – со подготовка на нови фотоволтаични и ветерни капацитети, модернизација на мрежата и програми за енергетска ефикасност.
„Овие чекори покажуваат дека реформите не се само визија, туку реалност што веќе се случува“, рече Божиновска.
Божиновска ја искористи приликата да потсети и на започнатиот процес за институционална заштита на македонскиот рубин – единствениот во Европа што природно се вади и обработува. „Ова е национално богатство и природна гордост која заслужува вреднување и меѓународна промоција“, порача таа.
Економија
Славески: Народната банка останува цврсто посветена на ценовната стабилност и на стабилноста на девизниот курс

Гувернерот на Народната банка, Трајко Славески, учествуваше на 24. Конференција на Македонска берза, каде што говореше за растечката глобална неизвесност и нејзините импликации врз малите и високо отворени економии, како што е македонската.
Тој истакна дека во постпандемискиот период трговската отвореност на нашата економија во просек достигна околу 150% од БДП, што ја зголемува чувствителноста на промени во надворешното опкружување. Според него, во моментов најизразени се неизвесностите поврзани со новите трговски политики на САД и потенцијалните реципрочни мерки од големите светски економии. Иако директната изложеност кон американскиот пазар е мала, индиректните ефекти преку намалување на побарувачката во ЕУ не се занемарливи. Дополнителна загриженост отвараат можните ефекти врз глобалната инфлација преку синџирите за снабдување и инфлациските очекувања.
„Трговските тензии се надоврзуваат на постојната неизвесност поврзана со геофрагментацијата, политичките нестабилности и состојбата во германската автомобилска индустрија. Дополнително, брзиот развој на технологијата и вештачката интелигенција, кои нудат огромни можности, истовремено можат да предизвикаат и зголемени ризици за монетарната политика во иднина“.
Во однос на одговорот на монетарната политика на ваквите предизвици, тој подвлече дека е неопходно одлучувањето да се темели на широк спектар на податоци и анализи, изготвување алтернативни сценарија и пред сè –посветеност на ценовната стабилност на среден рок и стабилноста на девизниот курс.
„Народната банка останува подготвена да одговори на евентуални непредвидливи предизвици, потпирајќи се на искуството од справувањето со екстерни шокови во минатото. Од суштинско значење е одржувањето на независноста на централната банка и кредибилитетот на нејзините политики. Солидното ниво на девизни резерви е гаранција за стабилноста на девизниот курс на националната валута“, истакна гувернерот.
Славески посочи дека Народната банка ќе продолжи да ги унапредува своите капацитети за справување со предизвиците и дека, иако сите неизвесности не можат да се отстранат, навремено поставување на вистинските прашања е клучно за пронаоѓање на појасна насока за иднината.