Министерот за економија, Крешник Бектеши, заедно со министерот за економија и технологија на Република Словенија, Здравко Почивалшек,  учествуваа на македонско-словенечкиот бизнис-форум, на кој присуствуваа над 100 компании од двете земји, организиран во рамките на официјалната посета на нашата земја од страна на владината делегација од Словенија, предводена од премиерот Миро Церар.

На форумот министерот Бектеши истакна дека двете земји имаат континуирано успешна економска соработка, а Словенија континуирано е на листата на значајни инвеститори во земјата. Според податоците од НБРМ, вкупниот кумулативен прилив на СДИ од Словенија за периодот 1997 – 2016 година изнесува 374,5 милиони евра или околу 8,1 отсто од вкупниот прилив на СДИ во земјата за истиот период, кој изнесува 4 милијарди и 657,3 милиони евра поради што Словенија го зазема петтото место меѓу земјите најголеми инвеститори во Македонија.

Министерот Бектеши пред бизнисмените од Словенија ги презентира условите и поволностите што ги нуди Македонија за сите заинересирани компании за инвестирање, како и неодамна донесените Закон за поддршка на инвестициите и план за економски раст, кои нудат цела линија можности за финансиска поддршка на инвестициите, а како полиња за засилена соработка беа споменати бањскиот туризам, иновациите и технолошкиот развој, како и инвестирањето во обновливите извори за енергија преку воведувањето на премиум-тарифите.

„Владата дава поддршка за нови вработувања, за воспоставување и унапредување соработка со доставувачи од РМ, за технолошки развој и истражување, за инвестициски проекти од значаен економски интерес, за зголемување на конкурентноста на пазарот, за освојувања пазари и пораст на продажбата. На располагање ви се и технолошките и индустриските зони, кои нудат многубројни даночни и царински поволност, или надвор од нив“, изјави Бектеши.

Министерот за економија и технологија на Република Словенија, Здравко Почивалшек, изјави дека Словенија и Македонија имаат многу добри економски односи истакнувајќи дека Словенија со инвестиции е присутна подолг период во Македонија, а ги поздрави новите инвестиции од две македонски компании во Словенија. Интересот на словенечките инвеститори за Македонија почнува од 1994 година, но позначајните приливи на инвестиции започнуваат по потпишувањето меѓусебната спогодба за поттикнување и заемна заштита на инвестициите, која стапи во сила во 1999 година и речиси со иста динамика продолжуваат и во последните неколку години. Најголем прилив на капитал е забележан во 2009 година и 2010 година, а со надминувањето на политичката криза во земјата и цврстата определба на оваа Влада да биде дел од евро-атлантските текови очекуваме овој тренд да продолжи и да се зголемува од оваа година. Досега најатрактивни за словенечките бизнисмени биле банкарскиот, осигурителниот, услужниот сектор и недвижностите.