Заменик-претседателот на Владата задолжен за европски прашања, Бојан Маричиќ, заедно со српската министерка за евроинтеграции, Јадранка Јоксимовиќ, по одржаната билатерална средба, дадоа изјави во кои најавија дека соработката помеѓу Северна Македонија и Србија ќе се интензивира во делот на евроинтеграцискиот процес во пресрет на почетокот на преговори на Северна Македонија со Европската Унија и преку нови проекти поддржани од европските фондови.

„Со задоволство ја прифатив идејата на српската колешка Јоксимовиќ да направиме меморандум за соработка во делот на евроинтеграциите, надграден во контекст на новата методологија, што во овој момент на почеток на преговорите за нас ќе биде корисно за двете држави бидејќи, ако работиме заедно, ќе можеме да напредуваме побрзгу и да имаме подобри резултати за нашите граѓани“, изјави вицепремиерот Маричиќ.

Јоксимовиќ изјави дека во идниот период ќе се интензивираат консултациите со Северна Македонија во областа на европските интеграции бидејќи, како што изјави, пренесувањето искуства и каква било помош во делот на преговорите е во интерес на добрососедските односи, како и во интерес на забрзување на реформите и напредокот на граѓаните на двете земји.

Вицепремиерот Маричиќ рече дека Северна Македонија и Србија веќе покажаа многу во реформите и решавањето на тешките прашања и дека тоа ги прави кредибилен партнер на Европската Унија додавајќи дека очекува земјите од регионот да бидат вклучени во решавањето на сегашните и идните кризи поврзани со енергетското снабдување, со снабдувањето со храна и струја.

Маричиќ и Јоксимовиќ констатираа дека ќе продолжи регионалната соработка уште поинтензивно како соседи сè во интерес на економскиот просперитет, намалувањето на последиците што ги носи овој тежок период.

„Ние разговаравме и за многубројни проекти финансирани од ЕУ во рамките на Европскиот инвестициски план за Западен Балкан, за гасниот интерконектор меѓу Србија и Северна Македонија, што во овој момент е од исклучително значење за граѓаните“, изјави министерката Јоксимовиќ.

На средбата беше разговарано за важноста на почетокот на преговорите на Северна Македонија со Европската Унија, предизвиците со кои државата може да се соочи во тој процес, за поддршката и размената на искуства што ги има Србија како земја што преговара 8 години и интензивирање на регионалната соработка во пресрет на зимата што доаѓа и заедничкото дејствување против последиците од енергетската и безбедносната криза.

Вицепремиерот Маричиќ оваа средба ја реализира во рамките на посетата на првиот меѓународен саем за вино, храна и туризам „Винска визија на ‘Отворен Балкан’“ во Белград, кој се одржува од 1 до 4 септември.