Економија
Мицкоски: Паричниците на народот се се потенки, Македонија е последна во Европа по економски раст
Јас ценам дека чувството кај граѓаните е тоа кое што е меродавно. А, чувството кај граѓаните е дека инфлацијата е прилично висока, односно дека паричникот е се потенок и дека ако порано едвај крај со крај врзувале од први до први, сега, мислам дека, до кај 20 не можат граѓаните да дојдат пристојно, нормално и мораат да се откажуваат и од елементарните работи кои што се неопходни да се помине месецот, изјави претседателот на ВМРО-ДПМНЕ, Христијан Мицкоски на денешната прес конференција.
Додаде дека, нормално е дека власта ќе се обидува да прикаже пониска инфлација бидејќи тие одамна заборавиле да се фатат за паричникот, некој друг го полни неговиот паричник, граѓаните ги полнат резервоарите на службените возила, некој друг го плаќа нивниот живот и животот на тие околу нив. Нормално е да се отсутни, нормално е да немаат чувство за вистинската состојба кај граѓаните.
Мицкоски искажа загриженост од два економски параметри кои влијаат врз економијата и се поголемото осиромашување на македонските граѓани, како што се балансот меѓу извозот и увозот, кој годинава изнесува на историско ниско ниво од 66%.
„Но, мене ме загрижуваат два параметри кои што овој период излегоа во јавноста. Првиот е увоз-извоз балансот, односно покриеноста на извозот и увозот. Тука ние сме веќе на стапка која што последните седум години не ни се случила, односно под 66 проценти. Ако некогаш таа покриеност беше 75, 77, 78 проценти и тоа не така одамна, сега веќе сме на 66%, што значи дека дефицитот во размената со странство се продлабочува. Тоа е уште еден параметар кој што влијае врз сиромаштијата на граѓаните, односно ги осиромашува граѓаните и затоа велат имаме ликвидност во буџетот, затоа што на зголемениот увоз, вие граѓаните плаќате повеќе данок, плаќате повеќе акциза за да можат да бидат задоволени потребите на владата, односно да можат тие, неколку мина, да уживаат на ваша сметка“, рече Мицкоски.
Вториот економски параметар, кој што предизвикува загриженост кај претседателот Мицкоски е, растот на БДП, кој што првиот квартал минатата година изнесуваше 2,4 што ја прави Македонија убедливо последна земја во регионот, при што сите останати имаа многу подобри бројки на раст на БДП како соседните Србија и Бугарија со над четири, Хрватска седум, Словенија и Унгарија по осум проценти раст на нивните економии.
„Вториот параметар кој што, исто така, ме загрижува е растот Бруто домашниот производ во првиот квартал 2021 година, со што Македонија е убедливо последна. Грција има седум, да речеме, проценти, Србија и Бугарија се повеќе од четири, Унгарија е осум, Словенија исто осум, Хрватска седум и така натаму, фантастични параметри. А, ние имаше само 2,4, убедливо сме последни и нормално, власта на СДСМ и ДУИ ќе ви рече ние ќе си седиме до 2024 година. Затоа народ им треба, народ треба да им се случи за да не останат до 2024“, истакна Мицкоски.
Сумирајќи ги сите економски параметри, Мицкоски истакна дека во Македонија тешко се живее, инфлацијата руши рекорди, а власта дефокусира со разни инсценирани случаи, токму затоа народот на де се обедини и на 18 јуни да им каже дека оваа Влада треба да си замине и да одговара за сите злодела кои што ги направиле изминатите пет години.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Битиќи: Осигурителните компании да го повлечат зголемувањето на цените, а на граѓаните да им се компензираат средствата
Вицепремиерот задолжен за европски прашања, Фатмир Битиќи, на својата официјална Фејсбук страница имаше реакција на едностраната одлука на осигурителните компании за менување на тарифата и зголемувањето на цените на задолжителната осигурителна полиса за регистрација на возила.
„Згрозен сум од зголемувањето на сумата за задолжителна осигурителна полиса од страна на осигурителните компании. Ова може да се толкува и како директен атак, или политичко мешање на компаниите за осигурување, бидејќи тарифникот со тие зголемувања два пати е доставен до Владата и два пати не е одобрен на Владина седница.
Ова е манипулативен начин со кој надвор од предвидената процедура осигурителните компании изнаоѓаат начин да ја зголемат цената на авто осигурувањето на грбот на граѓаните.
Ова е пример за длабоката држава која мора да се искорени.
Го повикувам ресорното министерство за финансии и комисијата за заштита на конкуренција да постапат и да покренат постапка за олигополско здружување и осигурителните компании да го повлечат зголемувањето на цените, а на граѓаните кои веќе платиле повисоки цени очекувам да им се компензираат средствата“, реагира вицепремиерот.
Економија
ЕУ одвои 13,79 милиони евра за прекуграничен одржлив развој во Македонија и Албанија
Македонија и Албанија заедно ја започнаа Програмата за прекугранична соработка ИПА 3 во Корча.
Финансирана од ЕУ со буџет од 13,79 милиони евра, оваа Програма ја потенцира ангажираноста на двете земји да се усогласат со стандардите на ЕУ за одржлив развој и регионална интеграција до 2027 година.
Дополнително на промоцијата, беше најавен и предстојниот повик за предлози во рамките на програмата ИПА 3, поканувајќи заинтересирани страни да учествуваат во оваа Програма.
„Оваа иницијатива не само што се фокусира на клучни области како што се еколошката одржливост и социо-економскиот развој, туку исто така претставува клучен чекор кон нашата конечна цел за интеграција во ЕУ. Токму денеска најавуваме дека новиот повик за предлози ќе биде отворен многу наскоро, обезбедувајќи можности за конкретни и клучни проекти“, изјави Алтин Зечо, директор за конвергенција и кохезија со ЕУ, Државна агенција за стратешко планирање и координација на помош (САСПАК).
Зечо дополнително истакна дека членство во ЕУ бара зголемена соработка помеѓу нашите две земји, каде координирањето на заеднички политики и меѓусебната поддршка за постигнување на нашите цели и приоритети кон интеграција во ЕУ останува важен процес.
Вулнет Арифи, шеф на одделот за ЕУ и координатор за СБС, при Министерство за локална самоуправа на Република Северна Македонија, ја истакна улогата на Програмата во забрзувањето на аспирациите за членство во ЕУ.
„Со изградба на основите поставени од ИПА 2, оваа Програма не само што ја проширува соработката меѓу земјите, туку и повеќе ги усогласува нашите регионални политики со стандардите на ЕУ, отворајќи го патот за нашето очекувано пристапување. Претстојниот повик за предлози дополнително ќе ги активира нашите заедници да се ангажираат длабоко со нашиот процес на интеграција во ЕУ“, изјави Арифи.
Брисеида Ѓоза од Антена канцеларијата Северна Македонија – Албанија го истакна целосниот пристап на програмата: „ИПА 3 е детално креирана за да ги зголеми нашите регионални капацитети за исполнување на критериумите на ЕУ, фокусирајќи се на климатска отпорност, одржлив туризам и зачувување на културното наследство. Ги охрабруваме заинтересираните страни да се подготват за претстојниот повик, кој ветува дека ќе ги зајакне нашите заеднички напори.“
Ова стратешко вложување од ЕУ преку Програмата ИПА 3 е доказ за постојаните напори на Северна Македонија и Албанија за влез во ЕУ, испраќајќи директна порака за нивното патување кон европската интеграција.
Економија
Потпишан договор за реализација на новата инвестиција на турската компанија Шахтерм во ТИРЗ
Директорот на ТИРЗ, Јован Деспотовски и генералниот менаџер на компанијата „Шахтерм“, Фарук Шахин, потпишаа договор за реализација на новата турска инвестиција во Македонија. Со договорот кој го потпишаа во Бурса, се предвидува закуп на земјиште во ТИРЗ Скопје 2 со површина од над 20.000 м2 и изградба на објект со површина од над 13.000 м2. Ова е прва од двете фази на реализација на инвестицијата.
Потпишувањето на договорот следи само 4 месеци по најавата за новата турска инвестиција во земјава. Турската компанија ја зголеми и првично планираната инвестиција од 70 милиони евра на 100 милиони евра. Според деловниот план компанијата во наредните 10 години предвидува отворање на 1000 нови работни места. Новата инвестиција ќе опфати и центар за истражување и развој, а ќе преставува прв производствен капацитет на „Шахтерм“ надвор од Република Турција.
Потпишувањето на договорот е во рамки на посетата на Турција на делегација на ТИРЗ предводена од Деспотовски во рамки на која е предвидена и презентација на инвестициските можности пред турски компании. На потпишувањето присуствуваше и македонскиот амбасадор во Турција, Јован Манасиевски и Џунејт Шенер, потпретседател на бордот на директори на Стопанската комора на Бурса.
Инаку компанијата “Шахтерм“ има повеќе од 40 години искуство во дизајн и производство на системи за греење за бела техника и апарати за домаќинство. Во моментот, „Шахтерм“ е дел од водечките пет компании во оваа дејност на глобално ниво, со повеќе од половина од годишното производство наменето за пазарите надвор од Турција.
Листата на клиенти е составена од познати светски производители на бела техника и апарати за домаќинство како „Вирпул“, „Амика“, „Горење“, „Беко“ и „Кенди“.