Економија
Молеровиќ: Во Македонија има премиум кадри, ние им нудиме можност за светска маркетинг-кариера

„Кога одлучив да се вратам од Америка, со целото семејство, за да ја отворам компанијата во Македонија, најголемата дилема ми беше дали ќе успеам да најдам искусни луѓе. Во Македонија немаше луѓе со искуство да менаџираат милионски суми на буџети за дигитален маркетинг. Но успешните луѓе ги имаат истите потенцијали секаде, во LeanSEM ние им ги даваме и истите можности за развој“- изјави за Телма Ненад Молеровиќ, основач на маркетинг-агенцијата LeanSEM.
Ненад Молеровиќ е Македонец кој се враќа од Америка каде што работел како дигитал маркетинг-директор во повеќе компании, меѓу кои и UpWork. Таму ја согледал потребата од премиум дигитал-маркетинг агенција, која ќе работи со дигиталните компании од Силициумската Долина, на начин каков се бара во 21 век. Се враќа во Македонија за да креира тим од маркетинг-експерти, кои би одговориле на овој предизвик. Така почнува приказната на LeanSEM, македонска маркетинг-агенција која веќе петта година успешно работи за компании од Калифорнија, поконкретно од Силициумската Долина.
Како дојде до идејата дека е потребна ваква агенција?
Како внатрешен човек во маркетинг-тимовите на UpWork и останатите компании, Ненад соработувал со повеќе маркетинг-агенции. Согледал дека еден маркетинг акаунт-директор кој има над 15 клиенти може да посвети максимум 2 часа во неделата на вашата компанија. Доколку сакате да растете брзо, имате сериозни буџети и сакате да видите резултати, тоа е премалку. Така доаѓа до идејата да создаде дигитал маркетинг-агенција каква што нема на пазарот. Агенцијата би работела само со премиум клиенти кои бараат сериозни резултати и посветеност, а тимот на LeanSEM би работел како нивен внатрешен тим. Ненад објаснува дека тие креираат концепт на работа преку кој клиентите од Калифорнија ќе го добијат и потребното внимание, а не само експертизата. „Наша конкуренција не се маркетинг-агенциите, туку интерните тимови на клиентите. Ние им ветуваме дека резултатите кои ќе ги добијат се подобри и од тоа да вработат цел интерен дигитал маркетинг-тим“ – изјави Ненад за Телма.
Денеска компанијата има над 50 клиенти и е во постојана потрага по најквалитетните маркетери, на кои им се дава шанса да се „натпреваруваат“ во светската „маркетинг-лига“. Главната алка на успехот на агенцијата се вработените, кои проактивно учествуваат во носењето одлуки. Меѓу нив е и Габи-Габриела Лазова – една од акаунт-директорите. Според Габи, тимот на LeanSEM е константно отворен за проширување. Во моментов отворени се неколку позиции за работа во LeanSEM, тие покрај маркетерите (кои постојано ги бараат), отвораат можност за вработување и за SEO-експерти и за веб-девелопери.
Според неа, тука може да очекувате сопствен професионален раст и развој навистина брзо. „Вработените можат да очекуваат дека вредноста то ја креираат за LeanSEM и за клинетите ќе биде соодветно наградена. Мислам дека тоа е особено важно за луѓето кои се зависни од резултати“.
Околу тоа што треба да имаат идните LeanSEM-маркетери, Ненад дополнува дека тоа се: работната култура, потенцијалот за оваа работа и, најважно, да бидете зависници од резултати – impact addicts.
Доколку сакате да аплицирате за работа во LeanSEM, погледнете ги отворените позиции.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Славески: Народната банка е пример за креирање политики засновани на квалитетни податоци и истражувања

„Несомнено, квалитетните и навремени податоци и анализи се клучни во носењето на кредибилни политики со кои се одржува макроекономската стабилност. Затоа, Народната банка своите одлуки секогаш ги темели на робусни докази засновани на детални емпириски истражувања, статистички анализи и квалитетни податоци, коишто го одржуваат и јакнат нејзиниот кредибилитет. А во време на глобални неизвесности и повеќе последователни кризи, токму силниот кредибилитет претставува најмоќната алатка за успешно остварување на целите на монетарната политика“. Ова го порача гувернерот Трајко Славески во своето воведно излагање на годишната конференција „Применети економски истражувања: патот кон оптимални национални стратегии и политики во турбулентни времиња“ организирана од страна на Балканската асоцијација на економисти во применета економија, во соработка со и поддржана од Економскиот факултет – Скопјe при УКИМ и Сојузот на економисти на Македонија.
Славески се осврна на анкетното истражување на Global central banking околу главните приоритети на централните банки, оперативните поставености и, следствено нивните истражувачки активности во следниот период.
„На прво место е финансиската стабилност, при што над 45% од централните банки даваат приоритет на финансиската стабилност и отпорноста, во контекст на тековните глобални предизвици. На второ место е справувањето со инфлацијата, при што мерките што ги преземаат централните банки се во насока таа да се сведе на историските нивоа од околу 2%. Третата област е кибер-безбедноста и вештачката интелигенција, коишто се новите предизвици пред кои што се исправени централните банки“, истакна гувернерот Славески.
Во фокусот на истражувањата се и дигиталната трансформација, вклучително и воведувањето на дигиталните валути коишто сѐ помасовно стануваат дел од стратегиите на централните банки.
Славески посочи дека носењето на одлуки базирани на докази е неопходно за централните банки успешно да ја извршуваат својата функција во комплексноста на денешните економии, особено во услови на епизоди на висока инфлација, брзи технолошки трансформации, огромна неизвесност и гео-економска дезинтеграција.
Во своето обраќање тој порача дека Народната банка посветено и во континуитет работи на подготовка на напредни и сеопфатни истражувања и анализи, коишто претставуваат еден од главните чинители при носењето на одлуките со кои се одржува севкупната макроекономска и финансиска стабилност на земјата.
Економија
МФ: Исплатени 19,4 милиони евра нова транша за поддршка на домашните компании

Над 1 милијарда денари нова транша е исплатена од кон Развојната банка за подршка на домашните компании, средства кои Владата ги обезбеди по поволни услови од унгарскиот заем, извести МФ.
Од централниот Буџет кон Развојната банка се исплатени 1,2 милијарди денари, односно 19,4 милиони евра, средства со кои ќе се реазираат инвестициски проекти од страна на домашните компании, кои претходно се одобрени од страна на деловните банки.
Со оваа транша вкупната поддршка што од централниот Буџет е трансфериран кон домашната економија преку оваа владина мерка изнесува 190,5 милиони евра.
Во Буџетот за 2025 година проектирани се вкупно 250 милиони евра кои се наменети за поддршка на инвестициски проекти на домашните компании, а кои треба да покренат инвестициски циклус во приватниот сектор од околу 300 милиони евра. Средствата за оваа намена ги обезбеди Владата по поволни услови преку унгарската Експорт-импорт банка, соопшти Министерството за финансии.
Економија
Халкбанк со нова кредитна линија од 12 милиони евра за одржливо земјоделство

Халкбанк АД Скопје, како една од водечките банки во земјата која постојано се насочува кон поддршка на реалната економија, започнува со реализација на нова кредитна линија наменета за развој на одржливо земјоделство.
Средствата во износ од 12 милиони евра се обезбедени преку Европскиот фонд за Југоисточна Европа (ЕФСЕ) и ќе бидат ставени на располагање на земјоделците и земјоделските бизниси во наредните пет години.
Целта на оваа кредитна линија е да им овозможи на микро (вклучувајќи трговци поединци и индивидуални земјоделци), мали и средни претпријатија пристап до поволни извори на финансирање кои ќе им помогнат да ги реализираат своите планови за работен капитал, како и за инвестиции во опрема, модернизација и развој на одржливи агро-практики.
Кредитите ќе бидат одобрени под атрактивни услови, со варијабилна каматна стапка која започнува од 5,5% и со можност за флексибилна отплата преку месечни, квартални или полугодишни ануитети. Освен финансиската поддршка, програмата предвидува и дополнителни бенефити за земјоделците: организирани работилници и тренинзи преку кои ќе можат да стекнат нови знаења за современи и одржливи земјоделски практики, како и грант компонента до 1.000 евра по корисник, достапна до исцрпување на предвидениот буџет. На тој начин, кредитната линија не е само финансиски инструмент, туку и практичен поттик за модернизација и зголемување на конкурентноста на домашното земјоделство.
Халкбанк и ЕФСЕ соработуваат долги години, а ова партнерство овозможи континуирано насочување на финансиски средства кон микро, мали и средни претпријатија, со што се поддржа растот на многу бизниси и се даде значаен придонес во економскиот развој на државата. Новата кредитна линија претставува уште еден чекор во таа насока, ставајќи акцент на земјоделството како стратешка гранка со голем потенцијал за одржлив развој.
„Поддршката на земјоделството е од суштинско значење за иднината на економијата и благосостојбата на граѓаните. Со оваа нова кредитна линија, обезбедуваме не само поволни финансиски средства, туку и знаење и грантови кои ќе им помогнат на земјоделците да преминат кон одржливи практики и да ја зголемат својата продуктивност. Веруваме дека вложувањето во земјоделството значи вложување во долгорочна стабилност, храна со повисок квалитет и развој на руралните средини,“ велат од Халкбанк.
Европскиот фонд за Југоисточна Европа (ЕФСЕ) е формиран од страна на Банката за развој KfW, со финансиска поддршка од германското Федерално Министерство за економска
соработка и развој (BMZ) и Европската комисија. Фондот има за цел да го поттикне економскиот развој и благосостојбата во земјите од Југоисточна Европа преку овозможување пристап до финансирање за микро и мали претпријатија и за домаќинства со пониски приходи, со фокус на одржливост и позитивно влијание врз заедниците.
Со оваа програма, Халкбанк ја продолжува својата долгорочна стратегија за поддршка на одржливите иницијативи во економијата, инвестирајќи во иднината на земјоделството и обезбедувајќи подобри услови за оние кои ја движат оваа важна гранка.
ПР