Економија
Николовски: Исплатени 68,5 милиони денари поддршка за живинарството од Интервентниот фонд

Во рамките на теренската кампања, со која ги доближуваме мерките од Националниот план за производство на храна до секој земјоделец, денеска министерот за земјоделство, шумарство и водостопанство, Љупчо Николовски, заедно со директорот на Агенцијата за финансиска поддршка во земјоделството и руралниот развој, Никица Бачовски, и државниот советник за рурален развој, Трајан Димковски, ја посети живинарската фарма „Шест браќа“ во општина Студеничани.
Оваа живинарска фарма повеќе од 20 години е успешен семеен земјоделски бизнис во сопственост на семејството Суати. Одлегуваат 160.000 несилки, со што претставуваат еден од поголемите производители на конзумни јајца.
„Како Министерство, одговорно носиме мерки за поддршка на секој земјоделец. Националниот план за производство на храна, кој го донесовме, содржи мерки за поддршка на живинарството. Донесовме нова интервентна субвенција од 60 денари за несилка, која се наоѓа на одгледувалиштето и е на возраст за производство на конзумни јајца. За оваа мерка можеа да аплицираат одгледувачите на живина за конзумни јајца запишани во регистарот на одгледувалишта на животни. Агенцијата за финансиска поддршка во земјоделството и руралниот развој веќе ја исплати финансиската поддршка од интервентниот фонд за земјоделство предвидена за одгледување кокошки – несилки. Исплатени се 68.5 милиони денари кон 49 корисници. Ја зголемивме и мерката за директни плаќања за амортизирани несилки заклани во регистрирани кланични капацитети од 80 на 125 денари по заклана несилка“, изјави министерот Николовски.
Министерството креира повеќе мерки за поддршка на производството на стратешки култури. Преку јавен повик на располагање се ставени дополнителни 5.722 хектара обработливо земјоделско земјиште над 3 хектари, за обработка на стратешки култури, распределени во 14 региони во државата. Јавниот повик за давање земјоделско земјиште под закуп над 3 хектари завршува денеска, а во набргу ќе биде објавен нов јавен повик за нови површини, кои ќе им бидат ставени на располагање на земјоделците со цел секоја педа обработливо земјоделско земјиште да биде ставена во функција.
„Со мерките од интервентниот фонд земјоделците добиваат 4.000 денари за хектар, дополнителна помош за набавка на вештачко ѓубриво за пченка и пченица, како и 2.500 денари за хектар за сочоглед и јачмен. Ги мотивираме земјоделците да го зголемат приносот со дополнителни речиси 100 евра од хектар. Наша цел е преку овие мерки да овозможиме поголемо домашно производство на стратешки култури, а помала увозна зависност. Токму затоа преку оваа теренска кампања ги презентираме мерките и ги повикуваме сите земјоделци максимално да ги искористат мерките што ги имаат на располагање“, рече министерот Николовски.
Во тек се и пет јавни повици од Програмата за рурален развој за 2022 година. Рокот за аплицирање е до 20 мај. Земјоделците може да аплицираат на повикот за набавка на трактори преку кој обезбедуваме до 75 % кофинансирање на сумата за набавка, односно максимум 3.500.000 денари од корисник. Повикот за набавка на силоси до 25 тони со мал капацитет за сопствена употреба, каде што исто така кофинансираме 75 % од сумата, односно 1.000.000 денари како максимален износ од корисник. Во тек е повикот за доделување грант од 6.000 евра за мерката „Рурална жена“, како и повиците за поддршка при изградба на мандри и повикот за набавка на опрема за производство на тутун.
Министерот Николовски денеска од фармата во Студеничани ги повика сите земјоделци активно да ги следат јавните повици и максимално да ги искористат можностите за поддршка. Министерството ќе продолжи одговорно, како и секогаш, да креира мерки грижејќи се за секој земјоделец.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Три концесии за експлоатација на минерални суровини еднострано раскинати

Владата, по предлог на Министерството за енергетика, рударство и минерални суровини (МЕРМС), донесе три одлуки за едностран раскин на Договори за концесија за експлоатација на минерални суровини и една одлука за одбивање на ново барање за концесија. Одлуките се веќе објавени во Службен весник на Република Македонија.
Од формирањето на Министерството до денес, вкупно се донесени 34 одлуки за едностран раскин на концесии поради непочитување на законските одредби за експлоатација на минерални суровини, неплаќање на концесиски надоместоци согласно утврдениот тарифник, непочитување на мерките за заштита на животната средина, пренесување на концесијата на друг субјект без согласност и експлоатација надвор од одобрениот експлоатационен предел.
Од Министерството информираат дека во моментов се во тек и повеќе постапки за раскин или одбивање на продолжување на концесии по исти или слични причини. Во истиот период констатиран е и раскин на 11 дозволи за експлоатација поради истек на договорот за концесија.
МЕРМС води и регистар на одземени концесии и тој од следниот период поради поголема транспарентност ќе биде јавно објавен на сајтот на министерството.
Министерката Сања Божиновска истакна:
„Нашата цел е транспарентно и одговорно управување со природните ресурси. Со засилената контрола и примената на законските мерки, обезбедуваме фер и одржлива експлоатација, која носи економски придобивки за државата и поддршка за локалните заедници. Овие одлуки се директна последица на посветените активности и системската работа на Министерството за воспоставување на највисоки стандарди за транспарентно и фер управување со природните ресурси, подобрување на наплатата и зајакнување на контролата врз обврските на концесионерите. “
Економија
Мицкоски: Неколкукратно е зголемена бројката на апликанти за мерката млад земјоделец во вредност од 70 милиони денари

Поради изборните ограничувања, мерката млад земјоделец не можеме да ја промовираме, иако огласот е завршен, филтерот е направен, 117 корисници односно апликанти за околу 70 милиони денари, вели Христијан Мицкоски, претседател на Владата на Република Северна Македонија одговарајќи на новинарско прашање.
Премиерот Мицкоски истакна дека за разлика од 2023 година кога имало само 44 апликанти, односно само 18 корисници, истата денеска е зголемена неколкукратно односно на 117 апликанти.
Можеби бројката 117 не значи многу грандиозно, но ако се има предвид дека во 2023 година од 44 апликанти, само 18 имаме корисници, тогаш станува збор за неколкукратно зголемување. Така што веднаш по завршување на локалните избори кога веќе ќе ги немаме оние законски ограничувања, и формално ќе биде ставена во функција оваа мерка за поддршка на младите земјоделци.
Економија
Во јули годишен раст од 13,0 отсто на вкупните депозити и од 13,0 отсто на вкупната кредитна поддршка

Анализирано на годишно ниво, вкупните депозити бележат раст од 13,0%, којшто во поголем дел се должи на растот на депозитите на секторот „домаќинства“, при помал раст и на депозитите на корпоративниот сектор, извести Народната банка.
На годишна основа, вкупните кредити бележат раст од 13,0%, поради повисоките кредити на двата сектора, со поголем придонес на корпоративниот сектор.
Најновото соопштение за монетарните движења е достапно на линкот