Откупот на оризот од реколтата 2018 е комплетно завршен и според податоците од регистарот на МЗШВ, откупени се 10 000 тони оризова арпа и 7 000 тони бел ориз, велат од Министерството за земјоделство, шумарство и водостопанство.

Откупната цена на белиот ориз од реколтата 2018 бележи пораст од 8 до 13 денари по килограм. Конкретно, крупниот бел ориз се откупуваше по цена од 45 до 50 денари за килограм, за разлика од реколтата 2017 кога откупната цена беше од 35 до 37 денари.
Зголемување има и на откупната цена на оризовата арпа која за 2018 достигна од 20 -24 денари по килограм, а во реколтата 2017 цената беше од 14 до 18 денари по килограм.

Откупната цена на ситниот бел ориз од реколтата 2018 се движеше од 30 до 35 денари по килограм, за разлика од реколтата 2017-та кога беше од 25 до 30 денари по килограм.

Додека, откупната цена на ситната арпа бележи пораст од 4 до 8 денари по килограм во зависност од квалитетот, односно за реколтата 2018 се откупуваше по 20 денари за килограм за разлика од претходната реколта кога цената се движеше од 12 до 16 денари за килограм.

„Интервентната мерка којашто кон крајот на минатата година ја донесе Владата на Република Северна Македонија за производителите на ориз, придонесе целото производство на ориз од реколтата 2018 веќе да биде во целост откупено по повисока откупна цена во споредба со претходните реколти. Владата минатата година поради ниската откупна цена на оризовата арпа и нарушениот баланс помеѓу понудата и побарувачката, а со цел да се поттикне договорениот откуп на оризова арпа од реколтата 2018 година, донесе интервентна мерка од 5 денари за килограм произведена и предадена оризова арпа кај регистрирани откупувачи. Рокот за поднесување барања за интервентната мерка заврши на 25 овој месец, во моментов во Платежната агенција се врши обработка на пристигнатите податоци по што во текот на месец мај ќе започне исплатата на дополнителната субвенцијата за интервентната мерка од 5 денари, што е особено важно за производителите на ориз“,  изјави министерот Николовски.

МЗШВ најави дека и во следниот период ќе продолжи со спроведување развојни мерки за производството на ориз. Затоа оваа година во Програмата за директни плаќања, како што велат, издвоени се повеќе пари за финансиска поддршка за земјоделците производители на ориз. Висината на субвенцијата за површини засеани со ориз од 6 000 денари е зголемена на 18.000 денари по хектар, за оние земјоделци кои не употребуваат сертифициран семенски материјал. Додека, субвенцијата за земјоделците кои употребуваат сертифициран семенски материјал од 12.000 денари е зголемена на 25.000 денари по хектар, односно 30 000 денари по хектар за земјоделски стопанства со пријавена површина за финансиска поддршка од минимум 5 хектари до максимум 50 хектари.