„Стечајната постапка за ’Фени индустри’ АД во стечај се води на примерен начин, во целосна согласност со законот и применливите прописи. Без оглед на големината и комплексноста на друштвото кое е во стечај, секоја стечајна постапка има цели што се јасно дефинирани во Законот за стечајот. Ние како доверители немаме забележано какво било дејство или документ одобрен или подготвен од стечајниот управител или од стечајниот судија кој може да предизвика каков било сомнеж во усогласеноста со прописите и регуларноста на нивното работење. Ние ја потврдуваме заложбата на стечајните органи да работаат со исклучително внимание и грижа за да се зачува вредноста на стечајната маса и да се овозможи најдоброто можно намирување на доверителите“, се вели во соопштението на Одборот на доверители на „Фени индустри“ во врска со вчерашната прес-конференција на „Транспаренси интернешнл – Македонија“.

Според Одборот на доверители, сите релевантни активности во оваа стечајна постапка биле целосно транспарентни и достапни за секој што имал интерес во согласност со законот. Оттаму тврдат дека „Транспаренси интернешнл – Македонија досега не му се јавил на Одборот на доверители со барање за каква било информација, „со што на секоe добронамерно заинтересирано лице ќе му беа јасни неоспорните предности и транспарентноста на постапката во врска со договорот за процесирање никелова руда заради задржување на вредноста на ’Фени индустри“ АД во стечај и заштита на работните места на над 700 вработени“.

„Оваа стечајна постапка е еден од најсложените стечајни случаи во државата и секое неповикано вмешување од трети страни кои не учествуваат во процесот, како што е ’Транспаренси интернешнл – Македонија’, предизвикува штета за стечајната постапка, за доверителите, за работењето на друштвото во стечај и неговите вработени, како и на репутацијата на државата како добра дестинација за инвестиции“, се додава во соопштението.

И стечајниот управник Мирослав Анастасиевски против кого вчера „Транспаренси интернешнл – Македонија“ поднесе кривична пријава за злоупотреба на службената должност тврди дека нема незаконски постапки во водењето на стечајната постапка за „Фени“. „Транспаренси“ почнала да го следи стечајот за „Фени“ кога добила претставки од засегнати страни и утврдила дека постапката е нетранспарентна и со низа незаконитости поради што вчера поднесе кривична пријава и против стечајната судијка Валентина Ѓоргиевска од велешкиот суд.