Економија
Од денеска редовни летови од Скопје до Санкт Петербург

ТАВ Македонија, попладнево, во 13:35 часот, го пречека првиот лет од аеродромот Пулково во Санкт Петербург на Меѓународниот аеродром Скопје, на кој лета авиокомпанијата „Нордвинд“, со што се одбележа отворањето на оваа нова авиолинија.
Од денес, 21 септември 2021 година, Нордвинд ќе сообраќа од Санкт Петербург до Скопје, еднаш неделно, секој вторник, со време на пристигнување на Меѓународниот аеродром Скопје – 13:35 часот и време на заминување кон Аеродромот Пулково во Санкт Петербург – 14:40 часот. Времетраењето на летот меѓу двата града е 3 часови и 25 минути.
Според најавениот ред на летање на авиокомпанијата, овие времиња ќе важат до крајот на октомври, кога и завршува летната сезона. Од 2 ноември 2021 година, Нордвинд ќе сообраќа од Санкт Петербург до Скопје, секој вторник, со време на пристигнување на скопскиот аеродром – 15:45 часот и време на заминување кон Аеродромот Пулково – 16:45 часот.
„Санкт Петербург е втората дестинација во Русија воведена од Нордвинд од Меѓународниот аеродром Скопје, по воведувањето на авиолинијата Москва – Скопје во јуни оваа година. Оваа воздушна конекција до Санкт Петербург се воспоставува за првпат во историјата на македонските аеродроми. Отсега, Скопје се поврзува со авиолинија со Санкт Петербург, благодарение на Нордвинд. Среќни сме за нивниот интерес да го развиваат сообраќајот меѓу Република Северна Македонија и Руската Федерација. Како ТАВ, искрено веруваме дека македонските патници ќе ја искористат можноста да го откријат историското и културното наследство на ова прекрасно пристаниште на Балтичкото Море, поранешната царска престолнина на Русија прекрасно опишана во руската литература. Во исто време, граѓаните на Санкт Петербург ќе имаат можност да пристигнат со авион до Скопје за само 3 часа и 25 минути и да уживаат во убавините на Македонија и соседниот регион“, изјави Метин Батак, Генерален директор на ТАВ Македонија.
Детални информации за резервации на авиобилети на веб-страницата на Нордвинд: https://nordwindairlines.ru/ru каде сите патници можат да користат дополнителни услуги за удобен лет, како што се избор на седиште во авионот, избор на оброк, дополнителен багаж, дополнително место во близина, како и други онлајн услуги.
„Ние како Нордвинд eрлајнс сме горди што сме првата авиокомпанија која ги поврзува двата града со директен лет; главниот град на културата на Русија – Санкт Петербург и прекрасниот град Скопје. Почнуваме со летот секој вторник, или со еден лет неделно, со многу комфорен распоред. Како една од водечките авиокомпании во Русија со 8 милиони патници на годишно ниво и флота од 60 воздухоплови, Нордвинд ерлајнс им нуди на патниците не само можност за истражување на неверојатната историја, архитектура, природа, поставки, туку и на многу други атракции на Санкт Петербург. Исто така сакаме да им се заблагодариме на ТАВ Македонија за нивната ефикасна соработка и топлото добредојде. Уште еднаш, би сакале да ви се заблагодариме на сите вас што сте тука и да ви понудиме да го посетите нашиот прекрасен град, Санкт Петербург“, изјави Ибрахим Јилдиз, Директор за приходи на Нордвинд ерлајнс.
Само пред 3,5 месеци, на 4 јуни 2021 година, Нордвинд Ерлајнс почна да сообраќа од Меѓународниот аеродром Скопје до Меѓународниот Аеродром Шереметјево во Москва, воспоставувајќи нова редовна директна авиолинија меѓу двата главни града, по 20 годишна пауза.
Нордвинд е една од најголемите авиокомпании во Русија според бројот на патници и ја има една од најразвиените мрежи на авиолинии во земјата. Базата на Нордвинд е Меѓународниот аеродром Шереметјево во Москва. Со флексибилни авионски билети, погоден ред на летови и бонуси во програмите за лојалност, летовите со Нордвинд ќе бидат успешен почеток за патувања на бизнис-патниците, како и оние кои сакаат да уживаат во планираниот одмор.
ТАВ Македонија ги заврши првите 8 месеци од 2021 година со вкупно 849 илјади патници на двата македонски аеродрома – Меѓународен аеродром Скопје и Аеродромот Св. Апостол Павле Охрид, што претставува пад од 52% на годишно ниво споредено со периодот јануари – август 2019 година, и 48% пораст на годишно ниво споредено со истиот период, јануари – август 2020 година, кога аеродромите беа најтешко погодени од ковид-кризата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Владата работи на зголемување на просечната плата, најави Мицкоски

Претседателот на Владата, Христијан Мицкоски, одговарајќи на новинарско прашање во врска со растот на платите во државата, со оглед на најновите статистички податоци, според кои просечната нето плата бележи раст и изнесува 45.800 денари, изјави:
„Прво што сакам да кажам е дека и тоа не е доволно. Дека треба да биде уште поголема просечната плата, и во таа насока продолжуваме, како Влада, да работиме. Но и самиот факт и бруто и нето, од просечната плата растат повеќе од 11% е демант за сите оние, би рекол, некрофили во рамките на опозицијата, кои што изминатиов период континуирано конструираа и лиферуваа лаги во јавноста, дека платите не растеле, дека платите стагнирале итн. Но овие податоци коишто пристигнуваат се само доволен доказ дека тие, освен тоа што не говорат вистина, шпекулираат, конструираат и креираат невистини. Друго ништо не можат да сработат и токму затоа таква е состојбата во опозицијата, и токму затоа народот ја изгуби довербата во нив.“
Владата продолжува да работи, рече премиерот, за граѓаните да имаат уште повисоки примања.
„И нормално, ние како Влада продолжуваме и понатаму да работиме за уште повисоки примања на работниците, затоа што тоа е наша цел, да испорачаме тоа што граѓаните од нас очекуваат.“, објасни Мицкоски.
Економија
Финансиска и енергетска стабилност како приоритет – средба на министерката Божиновска со гувернерот Славески

На работната средба на министерката за енергетика, Сања Божиновска, со гувернерот на Народната банка, Трајко Славески, се разговараше за тековните енергетски проекти и нивните финансиски импликации врз компаниите и економијата.
Во фокусот на разговорот беа влијанијата на новите регулативи за декарбонизација и зелената енергетска транзиција на Европската Унија, кои носат значајни предизвици, но и можности за развој на обновливите извори на енергија во нашата земја, како и нивното значење за домашните компании и целокупната економија. Беше нагласено дека за компаниите е потребна поддршка во приспособувањето кон овие промени, за да се намалат финансиските оптоварувања и да се зачува конкурентноста на домашниот пазар.
Гувернерот Славески и министерката Божиновска се согласија дека финансискиот сектор е главен поддржувач на транзицијата кон поголема енергетска одржливост, соодветно соработката помеѓу Министерството за енергетика и Народната банка е значајна за креирање на мерки кои ќе ја поддржат економијата во целина, особено во услови на глобални економски предизвици.
На средбата беше истакнато дека развојот на енергетскиот и рударскиот сектор е од клучно значење за зајакнување на финансиската независност на земјата и обезбедување енергетска стабилност која ќе ги штити интересите на граѓаните и компаниите и ќе обезбеди отпорност на земјата кон надворешни економски шокови.
Во наредниот период ќе се работи на конкретни иницијативи и политики за олеснување на пристапот до финансиски средства за инвестиции во зелена енергија и технолошки модернизации, со цел да се поддржи економскиот раст и одржливоста, но за да се обезбедат ефективни решенија кои ќе ги поддржат компаниите во процесот на прилагодување, како и стабилноста на националната економија.
Економија
Божиновска: Меѓународни експерти за енергетика и Германското друштво за меѓународна соработка со поддршка за енергетскиот форум

Министерката Сања Божиновска оствари работна средба со Давид Оберхубер, директор на Германското друштво за меѓународна соработка (GIZ) во нашата земја.
Средбата беше фокусирана на зајакнување на тековната соработка меѓу министерството и ГИЗ, со посебен акцент на подготовките за претстојниот 14. Меѓународен форум за енергија за одржлив развој кој ќе се одржи од 28 до 30 октомври 2025 година во Скопје, под мотото „Од цели до акција: Напојување на иднината со одржлива енергија“
Настанот е организиран од Министерството за енергетика, рударство и и минерални суровини, во партнерство со Програмата за развој на Обединетите нации (УНДП) и петте регионални комисии на Обединетите нации.
ГИЗ, како долгорочен партнер на Македонија во областа на одржливиот развој и енергетиката, ја потврди својата подготвеност да даде активна поддршка на настанот – преку мобилизација на меѓународни и домашни експерти, како и учество во концептуализација и организација на тематски панел-дискусии, информираат од кабинетот на министерката.
Во рамките на средбата, беше направен преглед на тековните проекти што се реализираат со поддршка на Германското друштво за меѓународна соработка, особено во доменот на енергетската ефикасност. Двете страни изразија задоволство од досегашните резултати, кои покажуваат конкретен напредок во унапредувањето на националните капацитети и подобрување на условите за поефикасно управување со енергетските ресурси.
Покрај актуелните иницијативи, разговарано беше и за идните правци на стратешка соработка. Притоа, беа разгледани можности за развој на нови заеднички проекти за 2026 година, кои би се фокусирале на поддршка на процесот на енергетска транзиција, дигитализација на енергетскиот сектор, како и унапредување на институционалните капацитети преку техничка и експертска помош.
Божиновска ја нагласи важноста на континуираната поддршка од страна на ГИЗ, оценувајќи ја оваа соработка како исклучително вредна за унапредување на одржливите и инклузивни политики во енергетскиот сектор. Таа додаде дека Министерството останува отворено за понатамошно продлабочување на партнерството, со цел обезбедување стабилна, зелена и иновативна енергетска иднина за граѓаните на Македонија.