Економија
Онлајн-играч на Лото 7 доби шестка вредна над 5.000 евра

Најголемата добивка од претходното коло Лото 7, во вредност од 348.297,50 денари, е 6-ка од одиграна комбинација преку онлајн-платформата на Државна лотарија.
Извлекувањето од 33. коло се реализира на 25 април, во сабота. Добитникот, со иницијали Р.Т., верува во среќата, има 31 година, живее и работи во Гевгелија и станал онлајн-учесник во игрите на среќа со оглед на новонастанатата ситуација.
„Нашиот онлајн-добитник, во саботата, од удобноста на својот дом во Гевгелија, во 13:27 часот, ги уплатил и одиграл своите 8 комбинации Лото 7, а вечерта го следел ТВ-извлекувањето. Кога беа извлечени броеви 3, 5, 6, 7, 25, 31 и 36, не можел да верува дека на екранот ги видел наредени сите броеви од вториот до седмиот од својата прва одиграна комбинација, сите освен првиот кој го оддели од 7-ка“, информираат од Државна лотарија.
Иако не ја открил симболиката на броевите, Р.Т. во телефонскиот разговор соопштил дека редовно ги игра токму овие броеви затоа што имаат огромно значење за него.
Од уплатениот депозит за игра, во вредност од 300 денари, одиграл 160 денари и за таа сума добил 348.297,50 денари, или над 5 000 евра.
По средствата нема да доаѓа на ниту една од благајните на Државна лотарија, што е една од најголемите предности на онлајн-играњето Лото 7 и Џокер.
Во телефонскиот разговор добитникот споделил дека е редовен лото-играч, но поволноста за онлајн-учество во Лото 7 и Џокер решил да ја користи согласно ситуацијата.
Досега имал помали добивки, најмногу од играта на среќа Џокер, кои ги користел за понатамошна игра, но ова е првата добивка која преку корисничкиот профил ќе си ја префрли на трансакциска сметка.
Р.Т. од Гевгелија е првиот онлајн-учесник на игрите на среќа на Државна лотарија што освои поголема добивка.
Иако Државна лотарија ја овозможи услугата за онлајн-уплата и учество во игрите на среќа Лото 7 и Џокер уште во октомври минатата година, токму во сегашни услови се гледа дека е повеќе од добредојдена.
„Нашиот најнов добитник упати многу позитивни коментари за практичноста и едноставноста на онлајн-уплатата и учеството во игрите на среќа Лото 7 и Џокер, истакнувајќи ја предноста што може да се игра од дома (место во вакви времиња да оди на продажно место). Како најголема предност ја издвои брзата исплата на средства“, информираат од Државна лотарија.
Никогаш не размислувал каде би ги потрошил парите доколку му се падне 7-ката, иако првпат среќата го донела толку близу до неа, но сепак оваа добивка би ја искористил за патување кое одамна го посакувал, секако откако ќе се среди ситуацијата со коронаирусот.
„Честитајќи му на Р.Т. од Гевгелија, потсетуваме на предностите за онлајн-учество во игрите на среќа Лото 7 и Џокер, како и на актуелната кампања ‘300 + 100’“, се вели во соопштението на Државна лотарија.
Повеќе информации играчите може да добијат на социјални медиуми, на броевите на центарот 02 323 7777 и вибер-бројот 076 313 052 како и на www.loto.mk
(ПР текст)
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Лагард предупредува: Економијата на ЕУ зависи од странските работници

Претседателката на Европската централна банка (ЕЦБ), Кристин Лагард, изјави дека приливот на странски работници во изминатите години значително ја поттикнал економијата на еврозоната, помагајќи да се надомести намаленото работно време и падот на реалните плати.
Говорејќи на годишниот симпозиум на Федералните резерви на САД, што се одржува во Џексон Хол, сојузната држава Вајоминг, Лагард нагласи дека миграцијата кон Европската Унија довела до рекорден број жители и покрај негативниот природен прираст.
„Странските работници дадоа значителен придонес за европската економија. Тие овозможија да се компензираат структурните предизвици, како што се пократкото работно време и пониските плати во одредени сектори“, изјави Лагард.
Таа додаде дека иако растот на бројот на работници ја поддржа економската стабилност, одредени влади на земјите-членки воведуваат ограничувања за нови мигранти, поради зголемено незадоволство кај дел од локалното население.
Според Лагард, оваа динамика ќе остане еден од клучните фактори во обликувањето на идните економски и социјални политики во Унијата.
Економија
Македонија е големо градилиште, над 1.200 проекти во општините, велат Перински и Николоски

Во моментов целата Македонија е едно големо градилиште, а само во општините се реализираат повеќе од 1.200 активни проекти поддржани од Владата и Министерството за транспорт, истакна Александар Николоски, потпретседател на ВМРО-ДПМНЕ и министер за транспорт, на Саем-Отчетот на градоначалниците на ВМРО-ДПМНЕ.
„Тоа се само проекти преку Министерството за транспорт, а да не зборуваме за големите инфраструктурни проекти како автопатите Охрид-Кичево, Кичево-Букојчани, Букојчани-Гостивар, Гостивар-Тетово, Прилеп-Битола, како и експресните патишта Прилеп-Градско и Куманово-Крива Паланка. Сега започнатите проекти се завршуваат, а граѓаните гледаат резултати“, рече Николоски.
Министерот подвлече дека ова ја враќа самодовербата кај граѓаните и покажува дека Македонија е способна да води големи проекти.
„Не е само патната инфраструктура, туку и железничките линии, аеродромите, авио линиите и обновливите извори за енергија. Во помалку од година дена завршивме еден проект со вредност од половина милијарда евра“, додаде тој.
Министерот за локална самоуправа, Златко Перински, истакна дека Владата финансирала околу 1.200 проекти во сите општини.
„На првиот повик беа пријавени 288 проекти, од кои 137 се завршени. На вториот повик беа поднесени 887 апликации, а прифатени беа 828 проекти. Кумулативно, тоа се околу 1.200 проекти кои се реализираат со помош на централната власт“, рече Перински.
Министерот додаде дека општините се соочувале со големи предизвици и немале поддршка од претходната власт.
„Ние им помогнавме да ги детектираат проблемите, да обезбедат одржливост и да ги реализираат поголемите проекти. Секој градоначалник се бори да направи што е можно повеќе, а по изборите се надеваме дека мотивацијата ќе биде уште поголема“, рече Перински.
Економија
Вреди: Поддршка за 200 нови зелени работни места во микро, мали и средни претпријатија

Од Вреди како коалициски партнер на Владата денеска објави историска мерка за поддршка на создавање нови работни места преку зелени инвестиции, во соработка со Министерството за економија и труд и Агенцијата за вработување.
Оваа мерка ќе овозможи вработување на 200 невработени граѓани во микро, мали и средни претпријатија, кои ќе добијат финансиска поддршка преку неповратен грант од 250.000 до 750.000 денари, во зависност од бројот на новите работни места: 250.000 денари за едно работно место, 500.000 за две и 750.000 за три.
Грантовите ќе овозможат компаниите да инвестираат во нова опрема и машини, софтвер и лиценци, како и технологии за обновлива енергија и материјали за енергетска ефикасност. На тој начин, мерката создава не само работни места, туку и зелени работни места кои придонесуваат за одржлива економија.
Јавниот повик е отворен за сите микро, мали и средни претпријатија кои ги исполнуваат законските услови, со приоритет за стратешките сектори: преработувачка индустрија, земјоделство, шумарство, водостопанство, водоснабдување и управување со отпад, градежништво и транспорт. Апликациите можат да се поднесуваат до 1 септември секој работен ден од 08:00 до 14:00 часот во Центрите за вработување низ целата земја, а сите информации се достапни на веб-страницата на Агенцијата за вработување.
„Ова е чекор кој покажува дека владата не се мери со слогани, туку со резултати. Инвестираме во вработување, развој, зелена економија и безбедна иднина за сите. Ова е промената што ја ветивме – влада која работи со срце и визија“, се наведува во соопштението.