Економија
„Порше“ прослави двојна победа во Ле Ман на 24-часовниот маратон

„Порше“ уште еднаш направи историја и ги освои двете класи на ГТЕ на најтешката и најдолга трка во светот. Во прокатегоријата Porsche 911 RSR, со стартен број 92, го заврши 86-тото издание на „24 часа Ле Ман“ на првото место по изминати 344 круга. Возачкото трио Kévin Estre (Франција), Laurens Vanthoor (Белгија) и Michael Christensen (Данска) беа на водечката позиција речиси за целото времетраење на 13.626 километри долгата тркачка патека. Ова беше победа број 106 за „Порше“.
Сестринското возило (# 91), кое го пилотираа Richard Lietz (Австрија), Frédéric Makowiecki (Франција) и Gianmaria Brun (Италија), совршено ја заокружи двојната победа за Porsche во класата ГТЕ-про. Французинот Frédéric Makowiecki посебно се истакна борејќи се во епскиот дуел и еден и пол час ги одбиваше сите напади за да се избори за второ место. Со овие два триумфа на 24-часовниот маратон во Франција, Porsche го продолжи своето водство во класификацијата на возачите и производителите на Светското првенство на FIA WEC.
„Порше“, управуван од Dempsey-Proton Racing, ја прослави импресивната победа во класата GTE-Am. Покажувајќи инспиративно возење, младите Porsche-професионалци Matt Campbell (Австралија), Christian Ried (Германија) и Porsche јуниорот, Julien Andlauer (Франција), ја освоија 107-тата победа во оваа класа за Porsche. На само 18-годишна возраст Julien Andlauer стана најмладиот победник во GTE-Am класата на Ле Ман.
„Апсолутно совршен викенд за ‘Порше’. Не можеш да посакаш повеќе од ова во годината кога ја прославуваме нашата годишнина. Невозможно е да се планира вакво нешто, но кога ќе се случи, тоа чувство не може да се опише. Им честитам на сите возачи, на тимовите и на вработените што го направија овој успех возможен. Сето тоа прави навистина да се гордеам“, изјави Dr Wolfgang Porsche, претседател на Надзорниот одбор.
Комплетните резултати се достапни на fiawec.alkamelsystems.com.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
„Соработка за економски напредок“: средба меѓу гувернерот на Народната банка и претседателот на Стопанската комора

Во духот на заедничката определба за поттикнување на економскиот развој и за зајакнување на институционалната соработка, во Народната банка денес се одржа средба меѓу гувернерот Трајко Славески и претседателот на Стопанската комора на Северна Македонија, Бранко Азески.
На средбата беше нагласена важноста на постојаниот дијалог помеѓу носителите на економската политика и бизнис-заедницата, особено во контекст на актуелните светски и регионални економски предизвици. Претседателот Азески истакна дека Комората е подготвена за понатамошна активна соработка со Народната банка, изразувајќи поддршка за професионалноста и кредибилитетот што гувернерот Славески ги носи на оваа позиција, известува Народната банка.
Во разговорот беа отворени теми поврзани со монетарната политика, финансиската стабилност, пристапот до финансии за стопанството, како и улогата на Народната банка во создавањето поволно деловно опкружување. Двете страни се согласија дека со заемна отвореност и координација може да се придонесе за поефикасно исполнување на стратегиските економски цели на земјата.
Гувернерот Славески ја истакна заложбата на Народната банка за транспарентност, предвидливост и поддршка на стабилноста, како предуслов за одржлив раст. Тој упати благодарност за поддршката и изрази задоволство од иницијативите на Комората за продлабочување на комуникацијата со институциите од финансискиот сектор.
Средбата заврши во конструктивен дух, со договор за засилување на соработката преку редовни консултации и размена на анализи и мислења од заеднички интерес, се наведува во соопштението од Народната банка.
Економија
Се зголемува цената на дизелот

Регулаторната комисија за енергетика, водни услуги и услуги за управување со комунален отпад на Република Северна Македонија (РКЕ) донесе Одлука со која се врши зголемување на малопродажните цени на нафтените деривати во просек за 0,93 % во однос на одлуката од 2.06.2025 година.
Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините за 1,833%, кај дизелот за 3,057%, кај екстра лесното масло за 3,388% и кај мазутот зголемувањето е за 3,088%.
Курсот на денарот во однос на доларот во изминатиот период по кој беа формирани цените со претходната пресметка е понизок за 0,5243%.
Малопродажните цени на бензините ЕУРОСУПЕР БС-95 и ЕУРОСУПЕР БС-98 не се менуваат.
Малопродажните цени на ЕУРОДИЗЕЛ (Д-Е V) и на Екстра лесното масло за домаќинство на (ЕЛ-1) се зголемуваат за 1,00 ден/лит.
Малопродажната цена на Мазутот М-1 НС се зголемува за 0,624 ден/кг и сега ќе изнесува 38,486 ден/кг.
„Напоменуваме дека ова се максималните цени на нафтените деривати од 00:01 часот на 10.6.2025 година. Трговците на големо и трговците на мало со нафтени деривати и горива за транспорт можат да ги формираат цените на одделни нафтени деривати и горива за транспорт и пониско од највисоките утврдени цени“, велат од РКЕ.
Економија
Објавени повици за самовработување, за млади до 29 години грант до 10.000 евра, а за невработени над 29 години грант до 7.000 евра

Министерот за економија и труд, Бесар Дурмиши, заедно со директорот на Агенцијата за вработување на Република Северна Македонија, Селајдин Белули, денеска официјално го објавија отворањето на јавниот повик за Мерка 1.1 и Мерката 1.2 во рамки на Оперативниот план за вработување за 2025 година, кои имаат за цел поддршка на самовработувањето на невработените граѓани регистрирани во Агенцијата за вработување.
Мерката 1.1 е наменета за лица над 29 години и обезбедува финансиска поддршка од 430.500 денари односно 7.000 евра за основање на нов бизнис, а Мерката 1.2 се однесува за млади до 29 години, кои имаат можност да добијат поддршка до 615.000 денари или 10.000 евра за основање сопствен бизнис.
Двете мерки, исто така, вклучуваат обука за претприемништво, подготовка на бизнис план и менторство за 6-месечен период за целните групи, вклучувајќи ги и лицата со попреченост, припадниците на ромската заедница и жените од руралните средини.
„Овие мерки не се само финансиска помош, туку се директна инвестиција во потенцијалот на граѓаните и во развојот на локалната економија“, истакна министерот Дурмиши на прес-конференцијата.