Економија
Сите кои зборуваат германски се добредојдени во Мајорел Скопје
Мајорел вработува повеќе од 50 претстававници за корисничка поддршка со германски јазик
До крајот на оваа година Мајорел ќе креира до 200 позиции за почетно ниво
По објавата за доаѓањето во Скопје претходно во јануари, водечкиот глобален провајдер на следната генерација решенија за сеопфатно корисничко искуство (CX) најавува отворање на повеќе од 50 слободни работни места за корисничка поддршка за почетно ниво, во следните три месеци. Локалниот тим ќе обезбедува услуги за клиентите на германски јазик преку пораки, телефонски разговор и е-пошта за еден од своите клиенти, глобален бренд за патувања.
Компанијата во Скопје брзо расте, во април Мајорел назначи локални таленти на клучни менаџерски позиции, како што се Елена Мановска како локален менаџер во Скопје и Александра Аргир како менаџер за човечки ресурси во земјата, меѓу другите.
„Возбудена сум што сум дел од самиот почеток на ваков амбициозен проект во рамките на една навистина глобална компанија за аутсорсинг на бизнис процеси (BPO). Има многу можности за раст за кандидатите кои ни се придружуваат на почетокот на нашето патување во Скопје. Нудиме платени обуки за сите вработени и не бараме претходно искуство од луѓе кои аплицираат за позициите за корисничка поддршка на клиентите. Се фокусираме главно на германскиот јазик и комуникациските вештини на апликантите“, рече Александра Аргир, додавајќи дека пакетот за компензации и бенефиции е конкурентен за локалниот пазар.
Компанијата ветува покрај платата неколку поволности за привлекување нови таленти, од бонуси за добредојде и перформанси до програми за благосостојба и приватно здравствено осигурување, меѓу другото.
Според описот на работното место на официјалната веб-страница на компанијата, заинтересираните кандидати мора да поседуваат многу добри вештини за комуникација и самоизразување, пишување и јазични вештини: германски C1 ниво и добро познавање на англискиот јазик. Мајорел напомена дека тие ја таргетираат претежно помладата генерација за почетните позиции, со што обезбедуваат флексибилен распоред, а вработените можат да изберат да работат со скратено работно време или договори со полно работно време.
„Со нетрпение очекуваме да го зголемиме тимот и да ја пополниме нашата неверојатна и нова канцеларија со локални таленти. Се наоѓаме во срцето на центарот на Скопје, со одлични транспортни врски, во модерен деловен објект од 4 ката. Јас лично бев вклучена во дизајнирањето на канцеларијата од самиот почеток. Се фокусиравме на создавање пријатна средина, обезбедувајќи простор каде што нашите вработени можат да се повлечат, да се релаксираат и да се забавуваат. Планираме серија настани за оние кои сакаат да не’ посетат и да дознаат повеќе. Сите детали за идните настани ќе бидат објавени на нашата Фејсбук страница“. изјави Елена Мановска.
За Мајорел
Дизајнираме, градиме и испорачуваме сеопфатни решенија за корискички искуства (CX) од следната генерација за многу од најпочитуваните светски дигитални и вертикални водечки брендови. Нашиот сеопфатен глобален отпечаток од исток кон запад во 35 земји на пет континенти, со приближно 69.000 членови на тимот и 60 јазици, ни овозможува да испорачаме флексибилни решенија кои ја користат нашата експертиза во културните нијанси, за кои веруваме дека се од суштинско значење за вистинската извонредност во CX . Имаме длабока експертиза во доменот на целосно технолошко-агументирано корисничко искуство. Дополнително, нудиме дигитален ангажман на потрошувачи, CX консалтинг и иновативен пакет на сопствени дигитални решенија за вертикали на индустријата. Ние сме глобален лидер во услугите за содржина, довербата и безбедноста. Ние веруваме дека „ различниот – разноликиот Majorel“ е нашата култура на претприемништво.
Повеќе за компанијата прочитајте на ЛИНКОТ.
ПР
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Комисијата за осигурување од автомобилска одговорност направи измени на тарифникот, Предлог-одлуката е доставена до Владата
Комисијата за осигурување од автомобилска одговорност денеска одржа нова седница на која ја разгледа Анализата за оправданоста и исправноста на донесените одлуки на друштвата за осигурување, подготвена и доставена до Комисијата од страна на Агенцијата за супервизија на осигурувањето, како регулатор на работењето на осигурителниот пазар.
По разгледување на Анализата, а врз основа на наодите, Комисијата за осигурување од автомобилска одговорност одржа седница и утврди потреба од измени на Тарифата за премии за осигурување и подготви Предлог-измени и дополнувања на Тарифата на премии со кои се доуредува член 3 во насока на заштита на корисниците, извести Министерството за финансии.
Предложените измени се насока на утврдување на опсег од 15% до 30% во кој друштвата за осигурување можат да го определат делот на премијата за вршење дејност на осигурување од автомобилска одговорност, а за секој износ на овие трошоци над 30% да побараат претходна согласност од Агенцијата за супервизија на осигурување. Ова значи враќање на цената на осигурувањето од автоодговорност на ниво од пред 25 април 2024 година.
Дополнително беше утврдено дека Комисијата најдоцна до 30 септември секоја година до Владата да доставува предлог за минимална и максимална стапка на техничка премија за осигурување за следната година.
Одлуката за донесување нова тарифа се заснова на Анализата на АСО со која се укажува дека на 23.04.2024 година, 11 друштва за осигурување кои вршат работи на осигурување во групата на неживотно осигурување доставиле известувања до Агенцијата за супервизија на осигурување за донесени одлуки на нивните органи на управување за зголемување на премиите за задолжително осигурување од АО, при што се повикуваат на одредбите од Тарифата на премии за осигурување од АО, објавена во „Службен весник на РМ“ бр. 191/2018, според кои одредби имаат можност самостојно да одлучат за висината на делот од премијата за спроведување на дејноста, односно т.н режиски додаток при одредувањето на крајната премија по договор за осигурување (член 3 од Тарифата). Притоа известувањата на друштвата до АСО не содржат финансиски анализи за изминати периоди, ниту пак конкретни проекции за очекуван развој на ризиците кои ги преземаат во осигурување. Единствен аргумент на кој се повикуваат друштвата за осигурување се растечките трошоци од работење, кои не се непосредно поврзани со настанување на ризиците, односно со настанатите и очекуваните штети, соопшти Министерството за финансии.
Дополнително, ставот на Комисијата е поткрепен со мислењето на АСО како регулатор дека ваквото постапување на Друштвата за осигурување влијае врз стабилноста, сигурноста и предвидливоста на функционирање на целиот систем на осигурување во насока на штета на осигурениците, односно сопствениците на моторни возила.
Предлог-одлуката што ја усвои Комисијата за осигурување од автомобилска одговорност на денешната седница е доставена на усвојување до Владата на РС Македонија.
Состојбите на пазарот ќе се следат и во наредниот период и ќе се преземаат соодветни одлуки, врз основа на анализи и во еден отворен и транспарентен процес. Во врска со донесените одлуки од страна на осигурителните компании за зголемување на висината на бруто-премијата за осигурување од автомобилска одговорност во втората половина од април 2024 година, Министерството за финансии ја свика Комисијата за осигурување од автомобилска одговорност која одржа седници на 26, 29 и 30 април и 02 мај 2024 година со цел да ги разгледа сите аспекти од носењето на овие одлуки, се додава во соопштението на Министерството за финансии.
Економија
Ковачевски: Поддршката за домашните компании продолжува, СДСМ нема да се откаже од подобра и европска иднина за државата
Претседателот на Социјалдемократскиот сојуз на Македонија, Димитар Ковачевски, денеска оствари средба со претседателот на Стопанската комора на Северозападна Македонија, Менди Ќура, и со членовите на комората, на која што се разговараше за ефектите од досегашните економски мерки, за идните мерки на СДСМ, како и за нивните предлози, за тоа што е потребно да се направи во следниот период за развој на приватниот сектор и економијата.
Ковачевски по средбата, во изјава за медиуми, речедека со сите стопански комори досега имало успешна соработка, потенцирајќи дека и во време на најтешки кризи се Владата предводена од СДСМ, носеше правилни мерки за заштита на економијата, ликвидноста на компаниите и стандардот на граѓаните.
„Во тоа време направивме девет пакети антикризни мерки, во кои што учествуваа секогаш и претставниците на Стопанските комори, вклучително и Стопанската комората на Северозападна Мкаедонија. На тој начин успеавме да спасиме 80.000 работни места во 20.000 компании. Подоцна продолживме со зголемување на минималната плата, за која што секогаш имаше поддршка од оваа комора меѓутоа и од другите, и до зголемување дојде и на просечната плата“, рече Ковачевски.
Во однос на поддршката за домашните компании, Ковачевски посочи дека тоа е еден од приоритети на СДСМ и дека преку Законот за финансиска поддршка на инвестиции, домашните компании за прв пат добија поддршка од држвата, која со новата четиригодишна програма на СДСМ и Коалицијата за европска иднина, ќе се зголеми.
„Во текот на изминатите години, како Влада имаме обезбедено 100 милиони евра финансиска поддршка за домашните компании. За наредниот четиригодишен мандат, планираме над 180 милиони евра, што ќе отвори нов циклус на инвестиции кај домашните компании“, рече Ковачевски.
На средбата, како што кажа Ковачевски, се разговарало и за клучните реформи во државата кои што се поврзани со евроатлантските интеграции на Северна Македонија, при што Ковачевски потенцираше дека СДСМ како партија не се откажува од интегрирањето на државата во ЕУ, согласно со преговарачката рамка која што е усвоена.
„Веќе оваа недела ќе биде усвоена реформската агенда која што е дел од Планот за раст на Западен Балкан, во кој што точно ќе бидат наведени реформите кои што ќе треба да се прават со цел да се повлекуваат траншите за Македонија. Тоа ќе бидат реформи во сите области од економијата, јавната администрација до правосудството и добрососедските односи“, истакна Ковачевски.
При тоа, Ковачевски потенцираше дека најголем дел од предлозите на Стопанската комора на Северо-западна Македонија, кои што беа дадени уште пред изборите, се веќе имплементирани во четиригодишната програма на СДСМ и Коалицијата за европска иднина.
„Значи тоа зголемување понатамошно на минималната плата, зголемување на просечната плата и секако поддршка нова на индустријата, особено на компании кои што се извозно ориентирани и определување на доволна сума на финансиски средства за капитални инвестиции во државата. Ние имаме предвидено 3,5 милијарди од кои што 2,7 милијарди се за инфраструктурни проекти во државата во наредниот четиригодишен период.Тука би го додал и земјоделството, предвидуваме поддршка во земјоделството во четиригодишниот период од 1,3 милијарди евра, што секако ќе значи зголемено производство на храна, зголемен извоз на храна и зголемен извоз на земјоделски производи“, исткана претседателот на СДСМ, Димитар Ковачевски.
Економија
АСО: Владата преку измени на тарифникот да ги намали цените на полисите за задолжително осигурување од автомобилска одговорност
Агенцијата за супервизија на осигурување (АСО) ја охрабрува Владата, согласно своите законски надлежности, да ги заштити правата на осигурениците и преку измени во Тарифникот да ги намали цените на полисите за задолжително осигурување од автомобилска одговорност.
АСО како регулатор на пазарот на осигурување уште еднаш јавно информира дека е целосно неоправдан и без основа потегот со кој осигурителните компании ги зголемија цените на осигурувањето од задолжителна автомобилска одговорност.
Клучните аргументи против зголемување на цената се наведени во анализата што е доставена до надлежната комисија при Министерството за финансии.
Зголемувањето на цената на осигурувањето не е во функција на јакнење на заштитата на осигурениците. Напротив, како што се додава, ова зголемување на цените е само и исклучиво во функција на покривање на трошоците за оперативно работење на компаниите за осигурување.