Економија
ССК: Новите рестриктивни мерки за угостителскиот сектор се селективни и непрецизни

Туристичко-угостителската комора на Македонија истакнува дека новите рестриктивни мерки што ги усвои Владата се селективни и непрецизни поради што се доведува во прашање ефектот што тие треба да го постигнат. ТУК досега ги поддржуваше сите здравствени мерки, кои придонесуваат за намалување на последиците од пандемијата и активно го промовира почитувањето на протоколите за работа, но сега смета дека единствен ефект од новите решенија ќе биде драматично влошување на состојбата на угостителскиот сектор.
„Повеќепати досега беше изнесено барање Комисијата за заразни болести и Министерството за здравство да презентираат епидемиолошки анализи, кои ќе покажат дека угостителството е поголема причина за ширење на заразата отколку некои други сектори, како меѓуградскиот и градскиот транспорт, работата на шалтери, работата во големи работни колективи, партиски активности. Досега не се презентирани такви податоци поради што мора да заклучиме дека угостителството е избрано за рестрикции како пример пред јавноста поради немањето желба или можност власта да се справи со други жаришта. Највидлив пример за несоодветното однесување на надлежните институции е нереагирањето на прославите што беа организирани во партиски штабови надвор од сите протоколи, без дистанца и со блех-музика.
Мерките се непрецизни бидејќи не е јасно на кои угостителски објекти се однесува. Да потсетиме дека кога претходно имаше рестрикции, Државниот пазарен инспекторат толкуваше дека тие ги вклучуваат и хотелите. Исто така, саканиот ефект – сузбивање на епидемијата – сметаме дека нема да се постигне и доколку угостителските објекти работат ограничено, а другите сектори функционираат редовно. Во такви услови луѓето само ќе се префрлат од угостителските во другите објекти што работат. Исто така, нејасно е и каков ефект ќе даде ограничување на работењето на угостителските објекти во земјата ако не се забрани патување во странство. Сакаме да нагласиме и дека неопходно е воведувањето дополнителни рестриктивни мерки да биде паралелно проследено со обезбедување соодветни економски мерки за поддршка на секторот“, се вели во соопштението на Сојузот на стопанските комори.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Три концесии за експлоатација на минерални суровини еднострано раскинати

Владата, по предлог на Министерството за енергетика, рударство и минерални суровини (МЕРМС), донесе три одлуки за едностран раскин на Договори за концесија за експлоатација на минерални суровини и една одлука за одбивање на ново барање за концесија. Одлуките се веќе објавени во Службен весник на Република Македонија.
Од формирањето на Министерството до денес, вкупно се донесени 34 одлуки за едностран раскин на концесии поради непочитување на законските одредби за експлоатација на минерални суровини, неплаќање на концесиски надоместоци согласно утврдениот тарифник, непочитување на мерките за заштита на животната средина, пренесување на концесијата на друг субјект без согласност и експлоатација надвор од одобрениот експлоатационен предел.
Од Министерството информираат дека во моментов се во тек и повеќе постапки за раскин или одбивање на продолжување на концесии по исти или слични причини. Во истиот период констатиран е и раскин на 11 дозволи за експлоатација поради истек на договорот за концесија.
МЕРМС води и регистар на одземени концесии и тој од следниот период поради поголема транспарентност ќе биде јавно објавен на сајтот на министерството.
Министерката Сања Божиновска истакна:
„Нашата цел е транспарентно и одговорно управување со природните ресурси. Со засилената контрола и примената на законските мерки, обезбедуваме фер и одржлива експлоатација, која носи економски придобивки за државата и поддршка за локалните заедници. Овие одлуки се директна последица на посветените активности и системската работа на Министерството за воспоставување на највисоки стандарди за транспарентно и фер управување со природните ресурси, подобрување на наплатата и зајакнување на контролата врз обврските на концесионерите. “
Економија
Мицкоски: Неколкукратно е зголемена бројката на апликанти за мерката млад земјоделец во вредност од 70 милиони денари

Поради изборните ограничувања, мерката млад земјоделец не можеме да ја промовираме, иако огласот е завршен, филтерот е направен, 117 корисници односно апликанти за околу 70 милиони денари, вели Христијан Мицкоски, претседател на Владата на Република Северна Македонија одговарајќи на новинарско прашање.
Премиерот Мицкоски истакна дека за разлика од 2023 година кога имало само 44 апликанти, односно само 18 корисници, истата денеска е зголемена неколкукратно односно на 117 апликанти.
Можеби бројката 117 не значи многу грандиозно, но ако се има предвид дека во 2023 година од 44 апликанти, само 18 имаме корисници, тогаш станува збор за неколкукратно зголемување. Така што веднаш по завршување на локалните избори кога веќе ќе ги немаме оние законски ограничувања, и формално ќе биде ставена во функција оваа мерка за поддршка на младите земјоделци.
Економија
Во јули годишен раст од 13,0 отсто на вкупните депозити и од 13,0 отсто на вкупната кредитна поддршка

Анализирано на годишно ниво, вкупните депозити бележат раст од 13,0%, којшто во поголем дел се должи на растот на депозитите на секторот „домаќинства“, при помал раст и на депозитите на корпоративниот сектор, извести Народната банка.
На годишна основа, вкупните кредити бележат раст од 13,0%, поради повисоките кредити на двата сектора, со поголем придонес на корпоративниот сектор.
Најновото соопштение за монетарните движења е достапно на линкот