Економија
Субвенција од 2 денара за килограм откупени сливи

Владата на денешната седница донесе одлука за воведување нова мерка за стабилизирање и решавање на проблемот со откупот на сливи, соопшти Министерството за земјоделство шумарство и водостопанство. Конкретно, сите правни лица откупувачи на сливи регистрирани за преработка на земјоделски производи и правни лица регистрирани за вршење трговија со земјоделски производи, кои извршиле откуп на сливи од реколтата 2018 година од домашно производство, ќе добијат субвенција од 2 денара за килограм откупени сливи. Одлуката стапува во сила со објавување во „Службен весник“.
„Оваа нова мерка ќе го поттикне договорениот откуп на произведената слива од родот 2018 и ќе ја подобри конкурентноста на домашната преработувачка индустрија. Субвенцијата ќе важи за количините сливи што ќе се откупат до 15 септември 2018 година по откупна цена не пониска од 5 денари за килограм индустриски сливи. Исто така, новата субвенција ќе ја добијат и оние откупувачи што ќе откупат свежи сливи, со кои на еден од состаноците што ги одржа тимот од МЗШВ е договорено откупната цена за оваа слива да не биде пониска од 8 денари за килограм“, изјави министерот за земјоделство, шумарство и водостопанство, Љупчо Николовски.
Министерот посочи дека новата мерка е донесена заеднички со производителите, преработувачите и откупувачите на сливи на работните состаноци што тимот од МЗШВ изминативе денови ги одржа со сите засегнати страни. Притоа Николовски додаде дека Министерството за земјоделство, шумарство и водостопанство изминатава една и пол година воведува системски мерки за поттикнување на равојот на земјоделството.
„Минатата година субвенциите за овошни насади, вклучително и за сливите, ги зголемивме 10 отсто. По овој основ зголемени субвенции добија над 2.500 производители на сливи за што се исплатија 64 милиони денари. Со годинешната програмата за директни плаќања 20 отсто ја зголемивме субвенцијата за одржување овошни насади, вклучително и за сливите, за развојната категорија овоштари што имаат од 1 до 5 хектари. Тие ќе добијат 39.600 денари субвенција за хектар. Исто така, во програмата за оваа година ги зголемивме субвенциите за предадено овошје во преработувачки капацитети од 2 на 3 денари за килограм. Дополнителен поттик за производството и откупот на сливи е новата мерка од 2 денара субвенција за откупувачите, што сега ја воведуваме“, изјави министерот.
Николовски потенцира дека ова е прва година во која се зголеми и поддршката за преработувачките капацитети не само во делот на директните исплати туку и во делот на нивната поддршка преку ИПАРД-програмите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
МЗШВ: Во четвртиот квартал од 2025 година ќе биде објавен јавниот повик за претприемачите во прехранбената индустрија

Министерството за земјоделство, шумарство и водостопанство ја информира јавноста дека во четвртиот квартал од оваа година ќе биде објавен Јавниот повик 02/2025 за користење на средства од ИПАРД Програмата 2021-2027, мерка 3 – „Инвестиции во основни средства за преработка и маркетинг на земјоделски и рибни производи”.
Оваа мерка претставува исклучителна можност за македонските претприемачи во прехранбената индустрија да ги унапредат своите капацитети и да станат поконкурентни на домашниот и меѓународниот пазар.
Мерката 3 – „Инвестиции во основни средства за преработка и маркетинг на земјоделски и рибни производи”од ИПАРД Програмата овозможува финансиска поддршка за модернизација на преработувачките капацитети, инвестиции за преработка и маркетинг на земјоделски и рибни производи, како и усогласување со европските стандарди. Преку оваа мерка се поддржува зголемувањето на конкурентноста на земјоделското производство и земјоделско-прехранбениот сектор во целина.
Средствата за оваа мерка се обезбедени преку Инструментот за претпристапна помош за рурален развој на Европската Унија (ИПАРД Програмата за периодот 2021 – 2027 година).
Министерството ги повикува сите заинтересирани да започнат со навремена подготовка на потребната документација и да ги следат официјалните објави на Агенцијата за финансиска поддршка во земјоделството и руралниот развој.
Економија
Издадени првите лиценци за батериски систем за складирање на електрична енергија од обновливи извори

Регулаторната комисија за енергетика, водни услуги и услуги за управување со комунален отпад (РКЕ) ги издаде првите лиценци за батериски систем за складирање на електрична енергија од обновливи извори на компанијата ЕНЕРГО СОЛАР СИСТЕМИ.
Станува збор за два батериски системи со вкупна инсталирана моќност од 2 600 kW, што се инсталирани во склоп на две различни фотонапонски електроцентрали кои се веќе изградени и во функција.
„Издавањето на овие лиценци во кои се вклучени батериски системи за складирање на електрична енергија, всушност го означува почетокот на еден нов инвестициски циклус во енергетиката. Воведувањето на батериите во пракса значи забрзана енергетска транзиција преку создавање на одржлив, ефикасен и еколошки енергетски систем во земјава. Во РКЕ очекуваме голем број сопственици на ФЕЦ да поднесат барање за инсталирање на “сториџи“, но исто така очекуваме интерес да појават и компании кои би биле самостојни оператори на складишта само со батериски системи. Употребата на батериите ќе придонесе за сигурно и доверливо функционирање на системите, а едновремено и за економски посигурен и поефикасен енергетски пазар. Истите можат да даваат услуги на операторот на електропреносниот систем за балансирање на истиот, како и одржување на одредени параметри на мрежата во пропишани граници. Складирањето на енергија во периоди кога има вишок и нејзино користење во периоди кога потребите од електричната енергија се зголемуваат се очекува дека ќе влијае и врз намалување на вкупните трошоци во системот.“ посочи Марко Бислимоски, претседател на РКЕ.
Условите, постапката и потребната документација за добивање на лиценца за складирање на електрична енергија се уредена во Законот за енергетика и Правилникот за лиценци, .
Економија
Владата усвои измени: Се укинува ослободувањето од ДДВ за онлајн пратки во вредност до 22 евра

Со цел зајакнување на домашната економија, поддршка на локалните компании и создавање нови работни места, Владата усвои измени и дополнувања на Законот за данок на додадена вредност, со кои се укинува ослободувањето од ДДВ за онлајн пратки во вредност до 22 евра. Законските измени веќе се во собраниска процедура, а нивното спроведување се очекува да има директни позитивни ефекти врз економијата и работењето на домашните компании.
Со оваа мерка, околу 4 милиони денари месечно, колку што во одредени периоди изнесува прометот кон странските онлајн платформи, ќе се пренасочат кон домашното стопанство. Овие средства ќе придонесат за развој на локалните компании, отворање нови работни места и исплата на повисоки плати на вработените.
Ова претставува значаен чекор во заштита и поддршка на домашната економија, особено во услови на зголемена глобализација и дигитална трговија.
Дополнително, измените ќе помогнат во намалување на сивата економија, имајќи предвид дека досегашниот систем овозможуваше злоупотреби – односно увоз на стоки ослободени од данок кои понатаму се продаваат на домашниот пазар.
Со оваа измена, државата испраќа јасен сигнал на поддршка за домашните компании кои создаваат додадена вредност и вработуваат граѓани во земјата, велат од Министерството за финансии.