Во изминатиот период, изминативе месеци посветивме сериозно внимание, на иста маса разговаравме со откупувачите и земјоделците за пласманот на зелката од оваа реколта и постигнавме одличен резултат, истакна министерот за земјоделство, шумарство и водостопанство, Цветан Трипуновски одговарајќи на новинарско прашање за пласманот на зелката.

„Одличниот резултат го постигнавме поради тоа што заеднички покажавме дека кога ќе се постигне договор и истиот ќе се почитува, македонскиот земјоделец може да добие вистинска цена како што доликува“, појасни министерот.

Трипуновски посочи дека досега согласно податоците со кои што располага Министерството, девизен прилив кај македонските градинари од овој регион кои што произведуваат пролетна зелка се движи некаде околу 32 милиони евра.

„Ова е уште еден показател дека македонските земјоделци ќе ја добијат вистинската грижа“, истакна министерот.

„Денеска сум во општина Босилово, каде што имаше тематски состанок, разговаравме за откупот на земјоделски производи, младиот компир од реколта 2025 година“, истакна министерот за земјоделство, шумарство и водостопанство, Цветан Трипуновски.

„На состанокот заедно со откупувачите на оваа култура, како Министерство, како вистински медијатор седнавме и разговаравме за продолжување на откупот на компирот од оваа реколта“, појасни министерот.

Трипуновски додаде дека резултатот кој што денеска е постигнат е на задоволство на земјоделците.

„Она што сакам да го потенцирам е дека продолжуваме да се грижиме и да го цениме трудот на македонскиот земјоделец, за да работи со профит, со рентабилност. Затоа што може само така да ја вратиме довербата према институциите и да го зголемуваме земјоделското производство“, истакна министерот.

Тој посочи дека министерството и Владата посветено се грижат за земјоделците и работат во нивна корист се со цел да се зголеми земјоделското производство во Македонија.

Министерот за економија и труд, Бесар Дурмиши, присуствуваше на централниот панел на Сараевскиот бизнис форум 2025, каде ја сподели својата визија за одржлив економски развој преку реформи, регионална соработка и инфраструктурно поврзување.

На овој меѓународен форум на високо ниво, Дурмиши ги презентираше приоритетите на Владата на Северна Македонија за привлекување инвестиции и градење сигурна клима за домашните и странските бизниси. Тој ја истакна важноста на соработката во стратешките сектори како што се дигитализацијата, енергетиката и работната сила, како и посветеноста на градењето одржливи политики кои даваат резултати.

„Економскиот развој, создавањето работни места и зголемувањето на довербата на инвеститорите се приоритети кои бараат посветеност, стабилност и конкретно делување. Тоа го градиме секојдневно преку одржливи политики и регионална соработка“, рече министерот.