Економија
Турција ќе ја зголеми економската соработка со Македонија, поддршка за турските компании да инвестираат кај нас

Министерот за надворешни работи и надворешна трговија, Тимчо Муцунски, денеска беше домаќин и оствари средба со министерот за надворешни работи на Република Турција, Хакан Фидан, кој е во официјална посета на нашата земја.
Станува збор за прва посета на странски министер за надворешни работи по формирањето на новата Влада, што воедно е силна потврда за одличните и долгогодишни односи меѓу двете земји, како партнери и сојузници во НАТО.
Муцунски се заблагодари за поддршката од Турција за справување со пожарите и истакна дека посетата е јасен сигнал за интензивниот политички дијалог меѓу двете земји, растечката заемна доверба, партнерство и пријателство, што заеднички ги градиме и негуваме во интерес на нашите граѓани.
„Оваа посета и нашата денешна средба се уште еден значаен момент во нашите билатерални односи бидејќи претставува прва официјална посета од странски колега – министер по моето стапување на должноста министер за надворешни работи и надворешна трговија. Особено ми е драго што тоа е токму министерот за надворешни работи на Република Турција, почитуваниот Хакан Фидан. Ова е силна потврда за сѐ поинтензивниот политички дијалог меѓу двете земји, растечката заемна доверба, партнерството и пријателството што заеднички ги градиме и негуваме“, истакна министерот Муцунски во своето обраќање.
На средбата помеѓу двете делегации беа разменети мислења за прашања поврзани со билатералните односи и можностите за унапредување на соработката преку конкретни активности во повеќе области. Двајцата министри разговараа за унапредување на односите во областите што се од заемен интерес, со посебен акцент на економската соработка и можностите за нејзино продлабочување како од надворешнотрговски така и од инвестициски аспект. Заемно беше поздравена досегашната целокупна економска соработка, но исто така беше констатирано дека таа го нема достигнато посакуваното ниво од двете држави. Постојат многу можности што треба максимално да бидат искористени од страна на државите и бизнис-субјектите од двете земји.
Во разговорите беше потенцирана успешната соработка и во рамките на одбраната, образованието и културата, но и одличната комуникација и соработка во делот на регионалните иницијативи и мултилатералните организации.
Турскиот министер нагласи дека нашата земја има посебно место за него и дека Турција особено ги цени пријателството и сојузништвото со Македонија.
„Разговаравме како можеме да ја унапредиме оваа соработка. Како Турција, изразуваме дека имаме интерес да потпишеме стратешки совет за соработка. Турција има цел да ја зголеми билатералната економска соработка од една на две милијарди и ќе продолжиме со поддршка на турските компании да инвестираат во земјата. Продолжуваме и со воената соработка преку учество на заеднички вежби“, истакна турскиот министер Фидан по средбата.
Министерот Муцунски го запозна својот колега со актуелните состојби во регионот од нашата перспектива, која е целосно насочена кон ЕУ-реформскиот процес и побрза интеграција во Европската Унија. Стана збор и за актуелната позиција на државата во однос на процесот на интегрирање, при што министерот Муцунски особено укажа на фактот дека предвидливоста во процесот на пристапувањето во ЕУ не е само процедурална работа, туку таа е и камен-темелник на нашата стабилност и напредок нагласувајќи дека токму тоа е она што на граѓаните им дава надеж и чувство за насока, ги мотивира нашите реформи и ги потврдува нашите аспирации кон поширокото европско семејство.
На средбата беа разменети мислења и за заедничките предизвици со кои се соочуваат нашите земји во контекст на миграцијата, радикализмот, како и предизвиците наметнати од тековните глобални случувања поттикнати од руската воена агресија врз Украина, како и последните состојби на Блискиот Исток. Беа споделени грижи и очекувања за смирување на сите воени дејства и запирање на страдањата на цивилното население во засегнатите земји. Министрите разменија мислења и за други актуелни прашања од надворешната политика.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Цените на нафтата се искачија над 66 долари

Цените на нафтата денес се искачија над 66 долари на меѓународните пазари, при што водечките производители објавија само умерено зголемување на понудата кон крајот на годината и индикации за стабилна побарувачка за гориво во САД.
На лондонскиот пазар, цената на барел попладне беше за 1,04 долари повисока од вчерашното затворање, на 66,49 долари. На американскиот пазар, барелот се тргуваше по цена повисока за 1,13 долари, на 62,86 долари.
Инвеститорите беа изненадени од објавата на почетокот на неделата од водечките производители дека имаат намера само умерено да ја зголемат понудата кон крајот на годината.
Групата од осум членки на Организацијата на земјите извознички на нафта (ОПЕК) и нејзините сојузници објавија во неделата дека ќе испумпаат само дополнителни 137.000 барели дневно на пазарот во ноември.
Тие веќе ја зголемија понудата за 411.000 барели дневно во септември.
„Осумката“ забележа дека изгледите за глобалната економија се „стабилни“ и дека пазарните индикатори се „моментално здрави“, судејќи според „ниското ниво на залихи“.
Пазарите очекуваа октомври да означи само краткорочен одмор во забрзаната нормализација на залихите.
Економија
Гувернерот Славески: Финансиската едукација и дигиталната писменост се неопходни во услови на зголемени ризици и дигитализација

На годишниот состанок на регионалниот проект за техничка помош во областа на финансиската едукација, поддржан од ОЕЦД и Министерството за финансии на Холандија, што се одржува во Сараево во организација на Централната банка на Босна и Херцеговина, гувернерот на Народната банка, д-р Трајко Славески, истакна дека во услови на зголемени економски ризици и брза дигитализација, финансиската едукација и дигиталната писменост се неопходни за користење на предностите од финансиските услуги и за обезбедување сеопфатен раст.
„Во време кога инфлацијата расте и кога има зголемени каматни стапки и широка достапност на дигиталните финансиски услуги, се јавува нужна потреба од јакнење на финансиската и дигиталната писменост. Дигитализацијата носи нови можности, како поефикасни и поевтини финансиски услуги, но истовремено создава и нови ризици – од онлајн измами, прекумерно задолжување, до загрозување на личните податоци“, порача гувернерот.
Тој зборуваше на панел-дискусијата на тема „Унапредување на финансиската едукација за посилен раст“, на која учествуваа гувенерите на централните банки на Босна и Херцеговина и Молдавија, заменик-гувернерката на Грузија и вицегувернерот на Хрватска. Разговорот беше насочен кон улогата на финансиската едукација во зајакнувањето на економскиот раст, како и во справувањето со новите ризици предизвикани од дигитализацијата на финансиските услуги.
Гувернерот Славески нагласи дека посебно внимание треба да им се посвети на младите и на потрошувачите со ограничено финансиско искуство. „Зголемувањето на финансиската и дигиталната писменост е од огромна важност за граѓаните и за претприемачите за да можат да ги препознаат придобивките, но и ризиците од новите дигитални финансиски производи и услуги. Само така можеме да ја искористиме дигитализацијата како алатка за поголема вклученост и стабилен економски раст“, додаде тој.
Во рамките на зголемувањето на вклученоста, Народната банка ги спроведува и активностите на иницијативата „Кодекс за финансирање на жените претприемачи“ (WeFi Code), како национален координатор, заради намалување на родовиот јаз во пристапот до финансии и поддршка на женското претприемаштво. Во оваа иницијатива, покрај Народната банка, се вклучени 18 институции од јавниот, приватниот и граѓанскиот сектор, меѓу кои шест банки и две штедилници.
Народната банка со своето учество ја потврди својата заложба за унапредување на финансиската едукација, дигиталната писменост и вклученоста, во услови на брзи економски и технолошки промени.
Економија
Божиновска на средба со Плаколм и раководството на ЕВН Македонија: Компанијата покажува како странските инвестиции можат да придонесат кон стабилност и дигитализација на енергетскиот систем

Министерката за енергетика, рударство и минерални суровини, Сања Божиновска, оствари средба со австриската сојузна министерка за Европа, интеграција и семејство, Клаудија Плаколм, и со раководството на ЕВН Македонија, во рамки на работната посета што австриската делегација ја реализираше во земјава.
На средбата присуствуваше и Мартин Памер, амбасадор на Република Австрија во Република Македонија, заедно со претставници од австриската амбасада.
Фокусот на разговорите беше насочен кон успешната соработка меѓу Министерството за енергетика и компанијата ЕВН Македонија, како пример за одговорно и партнерско делување меѓу државата и енергетскиот сектор.
Божиновска истакна дека ЕВН Македонија е значаен партнер во енергетската транзиција на земјата, посочувајќи дека примерот на компанијата покажува како странските инвестиции можат да придонесат кон стабилност, модернизација и дигитализација на енергетскиот систем.
„ЕВН Македонија е пример како странски инвеститор може да соработува со државните институции на начин што создава додадена вредност – не само за економијата, туку и за општеството“, нагласи Божиновска.
Во рамки на посетата, делегацијата имаше можност да се запознае со технолошките и организациските достигнувања на компанијата, меѓу кои и современиот диспечерски центар за дигитално управување со дистрибутивната мрежа на национално ниво.
Австриската министерка Клаудија Плаколм изрази задоволство од постигнатото ниво на енергетска соработка меѓу двете земји и од синергијата меѓу јавниот и приватниот сектор во Северна Македонија, истакнувајќи дека таа соработка е позитивен пример за поширокиот регион.
Двете министерки потврдија дека постои заеднички интерес за продолжување на размената на искуства и добри практики, со фокус на одржлив енергетски развој и зелена транзиција.